quarta-feira, 4 de dezembro de 2013

“PNTL Tiru Iha Fatin Hakoi Mate-Isin Anteiro”

.

Jornal Independente - Tersa-feira, 03 Dezembru 2013 

Polisia Nasional Timor Leste (PNTL), husi Polisia Unidade Task Force, Unidade Espesial Policia (UEP) no Batalaun Orden Publiku (BOP) tiru gas air mata ba joven sira iha fatin serimonia Vuneral ba mate isin Anteiro Herique Lopes, iha Beto Timur, Dili, maizumenus iha tuku 4:30 lokraik, segunda horseik. 

Anterio Herique Lopes (22) husi Distritu Bobonaro mate tanba hetan oho husi ema balun, iha domingu (1/12), iha area Beto Timor Sub Distritu Dom Aleixo, Distritu Dili. 

 Tuir observasaun diariu ne’e katak, PNTL hahu tiru, tanba joven sira balun halo porvokasaun tuda fatuk ba membru polisia ne’ebe mak hala’o seguransa iha prosesu vuneral ba mate-isin Anteiro. 

Akontese tuda fatuk no tiru gas air mata hafoin serimonia vuneral, rejulta labarik ida no ema bot balun lori halai kedas ba Hospital Nasional Guido valadares (HNGV) hodi hetan tratamentu. 

Tuir sasin Juvinal Soares hateten, konflitu ne’e mosu kauza husi kareta trek ida soke motor, nune’e polisia sira atu ba atua, maibe derepenti deit joven balun ne’ebe foin akompania serimonia vuneral nee tuda fali polisia. 

“Hau mos mai hare kareta soke motor ne’e polisia sira ne’ebe mak fo seguransa iha area ne’e halai mai atu haree asidenti ne’e maibe, derepenti fatuk tuda husi parte kraik (area beto laran) mak mai depois polisia mos responde ho tiru,” hateten Juvinal ba INDEPENDENTE iha Beto horikalan. 

Tuir matebian nia familia ho inisial LJ hatete, depois hakoi tiha matebian, Polisia BOP no UEP duni tuir ema ne’ebe mak tuda sira hodi tiru gas air mata tama ba tenda laran ne’ebe mak familia sira sei han hela. 

“Ami han hela maibe derepenti polisia sira tiru gas air mata mai ami nia let,” hateten LJ. Situasuan ne’e halo komunidade sira iha area Beto senti trauma tebes hodi halo sira paniku atu lao sai. 

Ho akontesementu ne’e, labarik kiik ida ho nia inan lori oan ba ospital tanba kona gas air mata, no kareta taxi 2, motor 2 hetan estragus. To’o horikalan, polisia sira kontinua buka tuir ema sira ne’ebe mak tuda iha area Beto Timur.
.

Sem comentários:

Publicar um comentário

Nota: só um membro deste blogue pode publicar um comentário.