terça-feira, 11 de março de 2014

Atake iha Laga: "Polítiku sira bosok ten, relatóriu polísia nia mós bosok ten"

.

Timor Hau Nian Doben - 11 de março de 2014

KOMUNIDADE LAGA NIA SASIN BA TIMOR HAU NIAN DOBEN

Akontesimentu loloos iha Laga-Lalulai dia 10 Marsu tinan 2014, ne’ebé Polísia Nasionál Timor-Leste husi unidade Batallaun Orden Públiku no Task Force distritu Baucau lansa atake ba fatin konsentrasaun Konsellu Revolusaun Maubere ne’e.

“Komandante polísia distritu Baucau halo reportajen katak PNTL ba halo aproximasaun persuasive mak Mauk Moruk nia elementu sira atake ho tiru no tuda granada. Informasaun kona ba Konsellu Revolusionáriu mak tiru PNTL ne’e bosok no inventadu.".

Tuir komunidade sira ne’ebé hela besik iha fatin akontesimentu ne’e hateten katak antes loron ida atake ne’e polísia hala’o ona sosializasaun ba fatin refere no membru Konsellu Revolusionáriu ne’e dehan katak, laiha ema ida mak bele hatún bandeira ka hasai farda maibé imi ba lori ami nia komandante mai mak hasai bandeira no farda husi ami nia isin lolon.

Depois rona tiha resposta husi Konsellu Revolusionáriu delegasaun polísia ne’e fila hikas ba Baucau. Iha dia 10 dadeer madrugada tuku hat PNTL husi unidade rua temi iha leten ba serku metin fatin refere no tuku lima rai sei nakaras polísia hahú tiru ba membru KRM iha fatin ne’e, polísia sira duni sai sira ne’ebé hela iha barraka ne’e ba foho leten, iha tempu hanesan granada ka bomba ida tarutu hodi kona ba polísia sira no rezulta pesoál Polísia nia ida kanek iha ain.

Oras ne’e daudaun Polísia ne’e hetan ona asisténsia médiku iha Ospitál Baucau.

Komandante polísia husi distritu Baucau mós halo relatóriu katak grupu ne’e lori kilat automátiku hodi tiru ba PNTL, maibé ne’e mós komandante ne’e forma lia falsu, tanba ema sira iha grupu ne’e kuaze hotu mai husi gerrilleiru kontra Indonézia nia okupasaun ilegál, tanba ne’e karik sira iha armamentu militár ka kilat no kro’at seluk tan laiha polísia ida mak sai husi fatin refere, sira mout hotu iha ne’e tanba ne’e laiha razaun ba komandante atu kondena ami lori kilat ka kro’at seluk hasoru PNTL nia asaun kruél no brutal ne’e. iha fatin seluk Komisáriu PNTL Longhinos Monteiro hateten katak grupu ne’e lori kilat hitu hodi tiru hasoru PNTL, maibé ida ne’e mós laiha fundamentu no uza lia bosok hodi kondena ami. Iha fatin Operasaun polísia kaer mós elementu Konsellu Revolusaun Maubere nia na’in rua no oras ne’e daudaun hela iha sela Baucau.

Seidauk ema ida mak ba haree na’in rua ne’ebé polísia kaptura katak seidauk klaru oinsá sira nia kondisaun moris nudár ema iha sela laran. Karik la hetan violasaun ruma? Ka la hetan tratamentu kruél ruma husi polísia ne’e? Presiza iha investigasaun independente hodi konfirma situasaun tomak husi akontesimentu ne’e.

Ami mós rona reportajen husi RTL distritu Baucau nia ne’ebé dehan katak iha tiru malu entre membru Konsellu Revolusionáriu no PNTL maibé informasaun ne’e mós laloos tanba realmente PNTL mak mai atake ami la’ós ami mak ba atake PNTL iha sira nia kuartél jerál ka iha sira nia uma laran.

 Ami mós kondena maka’as ba polítiku balun ne’ebé bandu atu media sira labele halo kobertura ba ami nia atividade sira ka saida de’it mak akontese kona-ba ami, ne’e nudár jenosídiu ba umanidade no atentadu boot ba estadu direitu demokrátiku, tanba sira lori rezolusaun produtu polítiku ne’e taka ba kompeténsia tribunal sira nia, no agora mai taka media tomak mai ami.

Operasaun militár ne’e, PNTL sira nia servisu ka sira nia desizaun hodi hala’o patraun sira iha PN no Governu maibé labele halo operasaun militár ho eskala boot bazeia ba razaun manipulada sira no lia bosok sira.

Polítiku sira bosok ten, relatóriu polísia nia mós bosok ten. Tanba ami tomak laiha kilat, ami populasaun ne’ebé simplesmente manifesta ami nia deskontentamente ba estadu atuál tanba prosesu restaurasaun loloos seidauk akontese hodi hadalan ba povu maioria mak kontinua moris terus no grupu kiki oan mak moris riku no kontinua uza riku soin povu nia ba hariku an.

Iha ne’ebé estadu direitu demokrátiku? Rezolusaun nia forsa mak liu Konstituisaun? Produtu polítiku mak boot liu prinsipiu legal katak Juis de’it mak iha kompeténsia atu hasai mandatu kapturasaun? Populasaun ida ne’ebé parte ba Konsellu Revolusaun ne’e?
.

Sem comentários:

Publicar um comentário

Nota: só um membro deste blogue pode publicar um comentário.