terça-feira, 11 de março de 2014

Dr. Mari Alkatiri "Osan Minarai, Tusan Ida Ba Povu TL"

.

Jornal Nacional Diario - Tersa-feira, 11 Marsu 2014 

Eis Primeiru Ministru (PM) iha primeiru Governu Konstitusional, Dr. Mari Alkatiri afirma katak, osan minarai nian ne'ebe Estadu Timor-Leste (TL) iha ne'e, hanesan tusan boot ida ba povu Timor-Leste tomak, povu TL tomak iha direitu atu simu osan ne'e, maibe iha mos dever atu haburas osna ne'e para bele sai bo'ot liu tan. 

Tanba ne'e Mari Alkatiri husu ba setor privadu sira atu hahu hari'i ho inisiativa propria ida ba negosiu nian hodi hamoris ekonomia nasaun nian. "Ita hatene katak ita riku ona tanba ita iha osan husi minarai, osan minarai ne'e balu dehan, maromak mak fo mai ita, balun dehan natureza mak fo mai ita, maibe hau hanoin buat rua ne'e hotu karik, ne'e la'os rikusoin, maibe ne'e tusan ida, tusan ida ne'ebe ita simu hanesa tusan hotu-hotu atu tau ba ita nia liman, emprezariu sira nia liman para atu buras, atu halo funan hodi sai bo'ot liu,"relata Alkatiri iha nia diskursu bainhira partisipa serimonia inagurasaun ba edifisiu GND iha Jacinto ball Room Kuluhun, Dili sabadu (08/03). 

Alkatiri dehan, se ema hotu TL ho hanoin hanesan ida ne'e, signifika aban bain rua TL sai riku, kuandu loron ida TL iha kbi'it rasik, TL bele halo osan rasik duque osan mai husi minarai nian. "Bainhira ita mai ho ita nia kbiit rasik ona, it abele halo tan osan barak liu doque osan ita simu husi mina rai, entaun it abele riku ona, se ida ne'e mak laakontese ita sei kiak mukit rai, tanba ne'e emprezariu sira tenki hanoin didi'ak," dehan Alkatiri. Tanba ne'e Alkatiri husu ba emprezariu sira hotu-hotu, atu komesa hanoin buat ida ne'e didiak. 

"Hau nia mensazen badak ne'e la'os ba emprezariu sira de'it, maibe ba hotu-hotu, ba Governu, ba ami be, balun dehan lideransa nasional, no balun dehan lideransa tuan, no ba ita hotu, para it abele halo misaun ida que importante, osan labele tama iha bolsu karuk, ita hasai fali husi bolsu los depois lakon tiha deit," Salienta Alkatiri. 

Alkatiri mos husu ba GND atu servisu hamutuk ho Konsorsiu sira seluk hanesan CNT, atu bele halo buat diak ba nasaun ida ne'e. "Tamba ami rasik mos dehan, "HAMUTUK ITA BELE, SE ITA LA HAMUTUK ITA LA FIAR AN, ITA LA LA'O BA OIN," afirma Alkatiri. 
.

Sem comentários:

Publicar um comentário

Nota: só um membro deste blogue pode publicar um comentário.