segunda-feira, 10 de março de 2014

Grupu Mauk Moruk iha Laga Lalulai hetan atake husi PNTL distritu Baucau

.

Timor Hau Nian Doben- 10 de Marsu 2014 

Horiseik domingu dia 9 Marsu 2014, loro-kraik Polísia Distrito Baucau na’in hat no sivíl ida hakat ba iha fatin konsentrasaun grupu Mauk Moruk nia iha Baucau-Laga-Lalulai hodi esplika rezolusaun ne’ebe Parlamentu halo ba grupu Mauk Moruk no husu atu hatún bandeira. 

Grupu Mauk Moruk ne’e hatán ba Polísia ne’e katak ami seidauk bele hasai bandeira too ami nia responsavel sira mai ko’alia ho ami “Ami nia komandu mak haruka ami hasa’e bandeira ne’ebé ami defende dezde okupasaun ilegál Indonézia nia, Bandeira ne’e reprezenta ruin no ran nia, reprezenta Saudozu sira tanba ne’e ami iha direitu atu dada hodi prosesa ami prosesu restaurasaun”. 

Úniku ami nia komandu mak bele mai hatún laiha ema ida iha TL mak hatún bandeira ne’e. Rona tiha resposta hirak ne’e PNTL fila fali ba Baucau. 

Ohin dia 10 madrugada tuku lima ema sei toba, Grupu Mauk Moruk iha Laga Lalulai hetan atake husi PNTL distritu Baucau hodi tiru kilat ba fatin ne’ebé grupu ne’e hela ba, iha atake ne’e rezulta kaer membru na’in rua husi Grupu Mauk Moruk mak; ida naran Jose Bobanoko no Domingos Lawateri. 

Polísia uza kilat boot hodi tiru no soe granada ba fatin ne’e hodi rezulta grupu Mauk Moruk halai sai hotu ba foho no populasaun sivíl sira hela besik fatin refere trauma no halai sai husi sira nia uma ba buka fatin seguru. 

Too agora seidauk konfirmadu loloos ema na’in hira husi grupu Mauk Moruk nia mak kapturadu, hira mak kaer no hira mak mate tanba sira hotu halai namkari bainhira polísia atake tama too iha sira nia fatin konsentrasaun. 

Populasaun sivíl balun iha suku viziñu ne’ebé fó solidariedade kadoo ai no lori fatuk boot ba estada boot hodi taka dalan ba Polísia atu tama ka sai maibé Polísia sira tiru kilat boot maka’as hodi duni populasaun hirak ne’e taka too ai laran.
.

Sem comentários:

Publicar um comentário

Nota: só um membro deste blogue pode publicar um comentário.