quinta-feira, 13 de março de 2014

Komunidade Laga fó apoiu ba Konsellhu Revolusaun Maubere

.

 Timor Hau Nian Doben - 13 de março de 2014

KOMUNIDADE LAGA NIA LIAN BA TIMOR HAU NIAN DOBEN

Situasaun atuál iha Laga-Samalari-Lalulai-F-FDTL lokaliza besik fatin konfrontasaun.

Hafoin PNTL unidade Batallaun Orden Públiku no Task Force lansa atake iha Laga-Lalulai situasaun trauma kontinua hela iha memória Povu nia. Povu nia liberdade ba hala’o atividade loron-loron hahú menus ona tanba sei ta’uk ba akontesimentu iha dia 10 Marsu 2014 ne’ebé kilat tarutu hanesan uluk militár Indonézia atake iha fatin refere. Ohin dia 12 kuarta feira populasaun nia partisipasaun iha bazar triloedade (Bazar Lokál ida besik fatin akontesimentu) la másimu no ema barak halai fila lalais ba sira nia uma. Tanba iha informasaun balun ne’ebé hatete katak operasaun boot sei akontese tan iha fatin refere tanba Polísia kanek iha area operasaun ne’e.

Kona ba Populasaun ne’ebé tesi ai hodi taka dalan ba movimentu transporte públiku sira, tuir komunidade sira katak tesi ai boot sira ba taka dalan ne’e sira halo tanba fó solidariedade ba nia malu sira ne’ebé hetan atake husi PNTL iha momentu ne’ebá. Oras ne’e daudaun transporte Públiku simu malu pasajeiru iha Suku Sagadate-Laga, husi Laga ba simu pasajeiru husi Bauguia iha Sagadate, hanesan mós husi Bauquia hetan karreta iha Sagadate tanba ai-boot sira taka hela ba dalan ne’ebá.

Tuir komunidade ida ne’ebé lakohi publika nia naran hatete katak ohin dia 12 loro-kraik mais ou menus F-FDTL karreta liu tolu mak lokaliza iha Larisula-Laga besik ba fatin akontesimentu atake polísia nia. tuir komunidade ne’e katak prezensa F-FDTL ne’e atu halo saida seidauk klaru tanba seidauk rona direta husi Forsa sira ne’e nia ibun. Tuir populasaun katak oras ne’e daudaun sira hahú ta’uk tanba preseza F-FDTL ne’e ho mandatu ne’ebé seidauk klaru ba sira.

Tuir komunidade sira katak Membru Konsellu Revolusionáriu sira ne’ebé halo konfrontasaun ne’e seidauk hatene sira nia paradeiru, sira ba iha ne’ebé ami seidauk hatene tanba sira halai namkari hotu ita seidauk hatene loloos agora sira iha ne’ebé. Ami hanoin ami nia maluk sira ne’e, tanba sira terus ona tinan barak, dezde okupasaun ilegál Indonézia nia too agora sira kontinua simu terus ida ne’e.

Kona ba sira sala ka loloos, ne’e polítika no lei mak hatene malu maibé nudár funu maluk no família ami tenke hanoin malu tanba sira la’ós integrasionlista no oportunista hanesan sira ne’ebé konspira ho maun boot sira iha Dili ne’ebá, hodi fahe povu nia riku soin ba malu. Ami hatene sira (KRM) defende lia-loos katak sira defende prinsipiu moris iguál ne’ebé Fretilin hanorin ba povu iha ai-laran durante funu, ba ida ne’e ami fiar metin iha sira maibé diferensa polítika ulun boot sira nia ne’e kestaun polítika ne’ebé sira presiza besik ba malu hodi ko’alia beibeik labele rende ka lakon pasiénsia ba diálogu ka ko’alia malu nudár maun no alin labele hare malu hanesan inimigu.

Membru Konsellu Revolusionáriu ne’ebé PNTL kaer hodi lori ba iha Baucau ami seidauk klaru sira nia paradeiru tanba seidauk konfirma tanba ta’uk karik polísia bele deskonfia no intimida tan sira bainhira vizita, seidauk hatene mós katak ema na’in rua ne’e hetan ona prosesu justisa ka lae inklui hetan ona advogadu ba defende sira ka lae. Ami espera katak polítiku sira bele rezolve sira nia kestaun diferensa no povu bele livre inklui sira na’in rua ne’ebé hetan kapturasaun forsada husi polísia iha operasaun nia laran.

Ita hotu hein saida mak sei akontese iha aban ka bainhira relasionadu preseza F-FDTL nia iha samalari-saelari no bazar fatin Teriloeda’e.

Espera katak dame hela ho povu sivíl no komfrontasaun hela ba sira ne’ebé buka na’ok povu nia riku soin tomak.
.

Sem comentários:

Publicar um comentário

Nota: só um membro deste blogue pode publicar um comentário.