quinta-feira, 27 de março de 2014

Lider sira nia arogansia no tirania sei sakrifika povu nia oan sira

.

Timor Hau Nian Doben - 27 de março de 2014

Situasaun jerál iha Laga Lalulai kontinua la’o di’ak maske populasaun balun kontinua ta’uk no trauma, tanba rona autoridade polísia no F-FDTL sei halo operasaun boot iha fatin refere. 
.
Operasaun ne’e sei halo bainhira membru prinsipál husi Konselhu Revolusionáriu Maubere lakohi entrega an.

Tuir populasaun balun hatete katak agora sira bele halo atividade loron-loron, la’o di’ak maibé ami sei ta’uk tanba rona katak iha ami nia fatin sei sai fatin operasaun boot husi autoridade seguransa sira hasoru membru Konselho Revolusaun Maubere .

" Ami triste tebes, tanba rona komandante Lere ko’alia ba media atu tiru mate ema ne’ebé uluk apoiu no kuidadu sira too funu remata.

Karik ema seluk mak ko’alia nune’e Lere mak atu hatán hodi salva nia alin sira nia vida maibé nia mak firme tesi nia alin sira nia vida ba mate ami bele simu de’it ho matan been tanba sira ami nia oan no ami nia alin.

Karik operasaun ne’e akontese sei limite ami nia atividade loron-loron nia, ami mós sei hetan investigasaun ho forsa bainhira buka membru Konselhu Revolusionáriu Maubere la hetan.

Ami nia fatin ne’e fatin ba operasaun iha tempu okupasaun Indonézia nia maibé tanba sá agora estadu Timor-Leste hakarak halo tan?

Ami sente konfunde ba ida ne’e, karik buka Mauk Moruk bele ba hetan iha komarka, tanba nia mak deklara revolusaun tanba sá tenke mai halo operasaun iha ami nia rai? Haktuir Populasaun ne’ebé lakohi fó sai nia naran."

Xefe Suku Samalari hatete katak aban sesta dia 28 Marsu membru CPD-RDTL hamutuk 100 resin sei entrega nia an ba autoridade seguransa nia iha Suku Samalari-Laga inklui 60 resin husi Lalulai, no seluk Nunira, Libagua no Alagua-Bauguia balun.

Tuir planu serimónia entrega an ne’e sei hola parte husi komandante F-FDTL General Lere Anan Timor no autoridade relevante sira seluk iha nasionál no lokál. Xefe Suku ne’e mós klarifika katak membru prinsipál husi Konselhu Revolusionáriu Maubere ne’ebé involve iha Lalulai seidauk iha informasaun klaru atu entrega an.

Maske nune’e autoridade sira kontinua hein sira atu entrega an ba autoridade sira maibé karik too nia tempu rasik seguransa sira halo operasaun hodi buka solusaun ba kazu ne’e.
.

Sem comentários:

Publicar um comentário

Nota: só um membro deste blogue pode publicar um comentário.