quinta-feira, 27 de março de 2014

Povu Nia Oan Dolar Iha Eskola Publiku, "Boot Sira Nia Oan Goza Eskola Privadu"

.

Jornal Nacional Diario - Kinta-feira, 27 Marsu 2014 

Kualidade Edukasaun agora dadauk iha teritoriu Timor laran tomak, liuliu eskola privadu sira soe dook eskola publiku sira, tanba eskola privadu nia kualidade husi loron ba loron sempre iha mudansas iha partes hotu-hotu, maibe eskola publiku fali kontinua hela iha fatin no balun hakiduk fali ba kotuk. 

 Ho ida ne'e iha razaun duni ba ema hotu desidi sira ninia oan sira nia destinu hodi kontinua sira nia oan estudu iha eskola ne'ebe iha kualidade, liuliu iha eskola privadu. 

Lanega katak, povu nia oan sira dollar iha eskola publiku sira ne'ebe mak laiha kualidade, tanba kondisaun ekonomia ne'ebe mak lasufisiente, entertantu ema boot sira nia oan goza iha eskola privadu sira ne'ebe mak selu ho karun, tanba kondisaun ekonomia ne'ebe mak forte. 

Kondisaun eskola sira hahu husi ensinu baziku to'o Universitariu laiha duni kualidade, mesmu balun livre husi propinas tanba menus rekursu humanus, fasilidade, falta biblioteka, laboratorium, falta livrus atu hanorin no mos sira seluk. Maibe eskola privadu ne'ebe iha edifisiu ne'ebe diak, kompleta ho fasilidade, biblioteka, laboratorium inklui rekursus humanus neebe kuaze kumpletu. 

Diferensia sira ne'ebe mak akontese ba eskola publiku no privadu ne'e sai preokupasaun publiku tomak nian hodi kestiaona maka'as, hahu husi Dili laran to'o area rurais. Ho kondisaun publiku nian ne'e, la'os deit sai preokupasuan povu kiik sira nian, maibe sai mos atensaun husi deputadu sira iha Parlamentu Nasional (PN). 

Ho ida ne'e komisaun F Parlamentu Nasional (PN) ne'ebe trata ba asuntu saude, Edukasaun, Kultura, Desportu, veteranus, no Igualidade jeneru halao fiskalizasaun ba eskola Publiku sira iha Teritoriu Timor laran tomak hodi haree rasik ho matan realidade ne'ebe akontese iha fati-fatin. 

Nune'e mos fiskalizasaun membru PN husi komisaun F ne'e ho intensaun mos atu buka tuir destinu Orsamentu Jeral Estadu (OJE) 2013 ho 2014 nian katak, Ministeriu Edukasaun ezekuta orsamentu ne'e tuir nia planu asaun ne'ebe aprezenta iha PN ne'e ga la'e. 

Nune'e, iha fiskalijasaun ne'e deputadu husi Bancada FRETILIN Eladio Faculto lamentavel tebe-tebes, bainhira hala'o fiskalizasaun hodi hare kondisaun eskola sira nian ne'ebe grave tebe-tebes, tanba durante ne'e hahu husi ki'ik to'o boot hotu-hotu ejiji ba kualidade edukasaun, maibe realidade hatudu katak, eskola publiku sira soe dook no at liu kompara ho eskola privadu sira ne'ebe ho kondisaun diak no fasilidade kumpletu. 

Nia hatutan, afinal eskola publiku sira tinan-tinan Parlamentu Nasional (PN) aprova osan bara-barak ba Ministeriu Edukasaun, maibe area Edukasaun sei la'o marka pasu nafatin, pior liu mak kadeira meja , livru no salas kontinua preokupasaun boot ba eskola hotu-hotu. 

Membru PN ne'e mos kestiaona katak, realidade hatudu duni kualidade edukasaun laiha, tanba hasoru problema no difikuldade oioin hanesan mestri, livru, meja no kadeira, sala aula laiha hotu. 

Deputadu husi Komisaun F ne'e husu ba Ministeriu Edukasaun tenke fo atensaun ba eskola publiku sira, tanba bainhira nasaun ne'e atu lao ba oin ho dezenvolvimentu ne'ebe diak mak area edukasaun tenke forte tebe-tebes, se lae aban bain rua sei fo impkatu rekursu humanus iha futuru.
.

Sem comentários:

Publicar um comentário

Nota: só um membro deste blogue pode publicar um comentário.