segunda-feira, 17 de março de 2014

Prizaun Preventiva Ba MM-LB La Iha Limite “L-7 Ho Matak Cs Hetan Tir”

.
Foto, Tempo Semanal
Jornal Nacional Diario - Segunda-feira, 17 Marsu 2014

Liu husi audensia primeira interogatoriu iha Tribunal Distrital Dili (TDD), Sabadu (15/3), Juis Singular Jose Maria de Araujo, aplika medida kuasaun prizaun preventiva ba komdandante Konselhu Revolusaun Maubere (KRM), Paulino Gama “Mauk Moruk (MM)” ho komandante Labarik Maia (LM).

Ho desizaun Tribunal nian ne’e, iha tuku 17:30 Otl, loraik neba kedas, Polisia lori MM ho LB ba hela iha prizaun Becora la iha limite, hodi sai mos hanesan bainaka foun iha sala nain sira nia ain fatin hodi hein prosesu kontinuasaun justisa nian.

Husi sorin seluk mos Tribunal deside Termu Indentidade Residencia (TIR) ba eis segundu Komandante FALINTIL Regiaun III, Cornelo Gama “L-7” ho mos membru CPD-RDTL, Antonio Aitahan Matak (ATM), Gil Fernandes (Gil FERDES), ho tan membru CPD-RDTL nain 10 seluk tan ne’ebe Polisia kaptura iha Distritu Aileu, foin lalais ne’e.

Mauk Moruk, L-7, Komodante Labarik, Antonio Aitahan Matak inklui sira seluk to’o iha Tribunal Oras 13.46 Otl ho kareta Prado numeru Matrikula 03.634G, akompania husi komandante PNTL Distritu Dili, Superitendenti Xefi Pedro Belo no hetan seguransa maximu husi membru PNTL ne’ebe ho armas kompletu.

Iha audensia Primeiru interogatoriu ba MM, L-7, labarik maia, ho Grupu CPD-RDTL ne’ebe lidera husi Antonio Aitahan Matan ne’e, hetan seguransa metin, Polisia bandu komunidade sira la bele tama ba Tribunal hodi asiste primeira nterogatoriu ne’e, inklui Jornalista sira.

Komunidade ho aimpatizante Komandante KRM, Mauk Moruk nian labele besik ba Tribunal no tenke asiste hodi hamriik deit iha Estrada ninin Tribunal nia oin.

Polisia husi Unidade Bataliaun Ordem Publiku (BOP) ho Task Force tuba metin iha lina Tribunal nia oin hodi fo seguransa ba audensia primeira interogatoriu ba Mauk Moruk, L-7 ho Grupu COP-RDTL.

Advogadu privadu Mauk Moruk nian, Paulo Remidios informa katak, nia kliente MM ho LB hetan prizaun preventiva, loron no fulan prizaun preventiva ba MM ho LB la iha limite tuir desizaun Triunal nian, maske nune’e, Paulo Remidios sublina katak, desizaun tenke estuda no iha posiblidade atu hatam rekursu ba iha Tribunal Rekursu (TR).

Advogadu Paulo Remedios, ne’ebe reprezenta mos Aitahan Matak hateten, Aitahan Matak la komete krime, maibe iha diferensia atu koalia klaru, tuir nia, arguido hirak ne’e la komete krime, tanba TDD rasik seidauk desidi katak sira komete krime.

“Ema hotu seidauk komete krime, Aitahan Matak ho nia Kamarada sira hamutuk nain 12 liberdade, seidauk iha julgamentu,” informa Paulo Remidios ba Jornalista sira hafoin akompania primeira interogatoriu ba MM, L-7, LB ho Aitahan Matak Cs.

Nia klarifika katak, ba sira ne’ebe hetan TIR, investigasuan sei halao kontinua ba sira, wainhira hetan evidensia foun ruma iha posiblidade halo tan julgamentu ba sira.

Husi sorin seluk, Pedro Aparicio Guterres, nuudar advogadu komandante L-7 nian informa katak, nia kliente L-7 hetan deit TIR ne’ebe nia iha uma, maibe semana-semana tenke aprezenta-an ba polisia.

“hau nia kliente L-7 fila ona ba nia uma ita sei hein kontinuasaun peosesu husi Ministeriu Publiku,” hateten advogadu Pedro Aparicio Guterres.

Mauk Moruk ho L-7 intrega an ba polisia iha uma fatuhada, Dili, Kinta (13/3), ho komandante labarik maia, Polisia kaptura iha nia baze apoiu iha manleuana.

Antonio Aitahan matak ho Gil Ferdes intrega an volontariamente ba polisia iha sesta dader (14/3), tantu elementus CPD-RDTL nain 10 seluk hetan kapturasaun husi Polisia iha Distritu aileu.

Iha audensia primeiru interogatoriu ne’e presidi husi juis Singular Jose Maria de Araujo, Ministeriu Publiku (MP) reprezenta husi Prokuradora Angelina Saldanha ho Prokurador Felismeno Cardoso, tantu arguido sira hetan asistensia legal husi sira nia advogadu privadu, Paulo Remidios ho Pedro Aparicio Guterres.
.

Sem comentários:

Publicar um comentário

Nota: só um membro deste blogue pode publicar um comentário.