quarta-feira, 5 de março de 2014

"Xanana Sei Tiru Mauk No Aitahan Matak"

.

Jornal Independente - Tersa-feira, 04 Marsu 2014 

Primeiru Ministru (PM) Kay Rala Xanana Gusmao sei tiru tuir komandante Konsellu Revolusaun Maubere (KRM) Paulino Gama 'Mauk Moruk' no kordenador Konsellu Popular Demokratiku (CPD-RDTL) Antonio Aitahan Matak bainhira halai fali ba ailaran. 

Tan ne'e, xanana nu'udar mos Ministru Defeza no seguransa autoriza FALINTIL-Forca defeza Timor Leste (F-FDTL) atu atua Grupu Mauk Moruk no Grupu Aitahan Matak hodi bele rende no intrega farda military illegal kopasus Indonezia nian ba estadu. 

"Hau aviza ba imi ne'ebe hatais hela farda atu intrega an, selae hau ba ita kaer liman tiha, imi halai sa'e ba foho, depois parese kilat musan mak sei haree imi," informa PM xanana durante partisipa diskusaun iha PN, segunda horsehik. 

Eis komandante FALINTIL ne'e konsidera deklarasaun husi grupu Mauk Moruk demais liu ona hodi fo ameasa ba soberania estadu TL liliu iha area politika, social no juridiku. Tan nee, Governu sei la premiti grupu Mauk Moruk no CPD-RDTL atu kontinua hala'o sira nia asaun kontra estadu no bosok povu. "Ba CPD-RDTL, ohin nuudar Ministru Defeza no Seguransa hau sei la tolera ona imi, tamba imi hotu hatais baret merah, hau sei buka imi, no haree imi nia baret merah ne'e hakerek ho saida?," tenik Xanana.
 .
"CPD mos halo bandeira ne'ebe viola tiha ona konstituisaun 1975 ne'ebe imi seidauk lee, tanba bandeira ida imi halo boot tebe-tebes, ida ne'e imi la iha prinsipiu baziku". Hau haree Antonio Aitahan Matak mos uz aona baret merah, tamba iha tempu okupasaun, ami iha ai laran hau la haree nia tau baret merah, maibe derepenti deit, Autahan Matak mos tentara tiga bulan hotu, no Egas mos Koronel ona," tenik PM Xanana. Durante iha PN, Ministru Defeza ne'e mos fakar sai pekadu aat Mauk Moruk, hafoin rende husi ailaran ho kilat ba hamutuk ho Kopasus Indonesia hodi sae kareta hodi haleu Timor-Leste hodi husu povu atu labele luta ba independensia Timor-Leste. 

"Hau mos hare, CPD-RDTL nian kuartel jeral ida toma iha neba, iha CPD-RDTL ne'ebe iha tinan 1999 hasa'e bandeira Mera Putih lao ho maluk balun hakarak dehan Autonomia ho Indonesia mak dalan diak liu, ohin loron defende restorasaun la partisipa iha restaurasaun no temi beibeik konstituisaun 1975, hodi Mauk Moruk mai aproveita Konsellu Revolusaun Maubere, kuandu sira temi suspende konstituisaun, sira hakarak konstituisaun 1975, tanba hau hatene senor Antonio Aitahan Matak, senhor Egas no sira matenek konese duni konstituisaun 1975 no konese duni saida mak revolusaun?" informa Xanana iha PN. 

Xanana mos konsidera CPD-RDTL oras ne'e dadauk kaer hela konstituisaun illegal hodi kampania ba povu katak, Governu kopia konstituisaun Portugal nian. Lolos tinan 20 nia laran, dehan Xanana, bainhira Mauk Moruk ba Olanda lolos tenki aprende lei barak, laos fila mai TL konsidera fali konstituisaun RDTL illegal. 

"Hau dehan hela ba Aitahan Matak komesa 2001 katak, konstituisaun 1975 nian, konstituisaun marxista, hau uluk mos marxista la aprende barak, aprende oituan hodi hare ba mundu ne'e muda ona tanba iha tinan 1987, no Mauk Moruk rasik sei lembra e hau hatene katak ema barak sei lembra iha vila hatene propaganda saida mak senhor Mauk Moruk depois nia hatais farda military ho nia pankat maijor nian ba rai liur koalia katak, FRETILIN komunista no nia lao ba fatin barak tan," tenik Xanana. 

Ministru Defeza no seguransa ne'e husu ba Povu Timor-Leste atu labele tuir grupu illegal ne'ebe fo sai deklarasaun kontra estadu. Parte seluk, PM xanana mos preokupa ho publikasuan media nian ne'ebe la sukat katak, informasaun ne'ebe media publika dala ruma prezudika mos situasuan seguransa nasional nian. "hau husu mos ba media, atu sukat mos sira nia responsabldiade ba seguransa nasional, maibe estadu ho laran mos no laran luak premiti hela mos," nia apela. 

Xanana apela ba povu tomak tenki matenek no labele naran intrega osan ba grupu illegal ne'ebe aproveita hela situasaun. A

pela povu lalika fiar voatus katak, kilat illegal lori tama iha TL ne'e lalos, tanba estadu garante nafatin estabildiade segurans alao diak hela. 

Nia dehan, Governu TL sei kordena ho Governu Indonezia hodi buka turi farda military Indonesia nian ne'e se mak suporta tama TL.

 "Ami sei halo investigasaun ba farda sira ne'e mai husi ne'ebe, tanba iha fulan ida ne'e, hau sei ba Jakarta hodi husu Ministru Defeza no Seguransa Indonesia no ba hasoru prezidenti susilo hodi servisu hamutuk hodi haree se mak haruka farda ne'e mai no se mak sosa," dehan Xanana Gusmao. 
.

Sem comentários:

Publicar um comentário

Nota: só um membro deste blogue pode publicar um comentário.