terça-feira, 22 de abril de 2014

Deklarasau konjuntu sosiedade civil relasaun operasaun PNTL no F-FDTL ba implementasaun rezolusaun PN

,

DEKLARASAUN KONJUNTU SOSIEDADE SIVIL RELASAUN HO OPERASAUN KONJUNTU PNTL NO F-FDTL BA IMPLEMENTASAUN REZOLUSAUN PN no. 5/2014 HO REZOLUSAUN KONSELLU MINISTRUS No. 8/2014 - 22 Abril 2014

Nu’udar ita hotu hatene katak, bazeia iha Rezolusaun Parlamentu Nasionál No.5/2014 kona-ba ‘grupu ilegál’ sira, ne’ebé fó sai iha dia 3 Marsu 2014, Polísia Nasionál Timor-Leste (PNTL) halo ona atuasaun ba grupu Konsellu Popular Demokrátiku–Repúblika Demokrátiku de Timor-Leste (CPD-RDTL) no grupu Konsellu Revolusaun Maubere (KRM) iha distritu 13.

Durante tempu ne’e ita hare katak, PNTL halo sosializasaun kona-ba konteúdu rezolusaun númeru 5/2014 no mós halo atuasaun ba sede grupu CPD-RDTL iha Territóriu Timor laran tomak hodi losu ai-riin bandeira, hatún bandeira, rekolla farda, rekolla dokumentus CPD-RDTL no rekolla mós kartaun membru CPD-RDTL, nune’e mós halo kapturasaun ba lider KRM nian no halo operasaun hodi bolu hikas membru sira ne’ebé halai ba foho Matebian hodi lori ba hasoru Justisa.

Tuir monitorizasaun NGO nian hatudu katak durante atuasaun ne’e maioria membrus grupu CPD-RDTL no KRM entrega an no mós entrega atributus sira no halo koopera di’ak tebes ho PNTL iha distritus 13 iha Timor-Leste. Maske nune’e hare ba katak, konflitu ida ne’e involve komunidade rihun ba rihun no relasaun ho konflitu pasadu nian. Tan ne’e presiza esforsu integradu ida hodi reintegra sira ba komunidade no prevene akontesimentu hanesan iha futuru mak ami husi sosiedade sivíl hato’o Preokupasaun no Ezijensia hanesan tuir mai ne’e:

1. Ami husi Sosiedade Sivíl preokupa tebes ho Rezolusaun rua husi estadu ba KRM no CPD-RDTL. Ami hanoin katak se ema ruma halo krime inklui membru husi organizasaun rua ne’e bele kaer sira lori ba justisa, maibé labele uza prizaun preventiva nudár substitui ba justisa iha tribunal. Timor-Leste iha kódigu penál no tuir Konstituisaun RDTL, krime ba kondena ema privadu ka indivídu la’ós grupu tomak. Timor-Leste iha nia kódigu penál tanba ne’e bele uza ba kondena ema halo krime la’ós desizaun polítiku hanesan rezolusaun sira agora nian ne’ebé polítiku sira mak deside.

2. Preokupa katak rezolusaun agora nudár presedente ka toman ladi’ak ba futuru katak estadu bele aplika mós ba grupu komunidade seluk ka balun iha ita nia rai ne’ebé diferente ho polítika governu ka estadu nia mós bele halo rezolusaun tuir Polítiku sira nia hakarak hodi taka ho polítikamente (halo rezolusaun) la tuir lei no sistema justisa mak vigora iha ita nia rai.

3. Ami hanoin katak sidadaun hotu iha liberdade espresaun bazeia ba Konstituisaun, kódigu penál no konvensaun internasionál sira ne’ebé TL deside nudár lei doméstiku ita nia. Sidadaun ida bele organiza malu iha grupu hodi ko’alia de’it ba públiku seidauk halo krime ne’e laiha dalan atu kondena sira hanesan saida mak polítiku sira hanoin no halo agora. Ami mós hanoin lei la obriga sidadaun sira tenke lori kartaun eleitorál ba fatin públiku sira tanba ne’e operasaun ne’ebé halo check point ba povu nia kartaun eleitorál ne’e la tuir Lei.

4. Maske nune Ami husi Sosiedade Sivil hakarak hato’o Parabens ba eis membru CPD-RDTL sira hotu ne’ebé hatudu ona nia maturidade hodi koopera di’ak tebes ho PNTL no F-FDTL hodi entrega an, entrega atributu no sasan kroat hotu hodi kumpri lei no reintegra hikas sira nia an ba komunidade. Ida ne’e nudar simbolu ita bo’to sira nia hadomi ba povu no nasaun liu kontribui ba estabilidade Timor Leste.

5. Ami mós hakarak hato’o ba PNTL no F-FDTL ne’ebé hatudu tiha ona nia profesionalismu iha operasaun konjuntu ida ne’e. Maske nune ami Ejiji nafatin ba PNTL no F-FDTL ne’ebé halao operasaun iha Baguia, Quilicai no Laga no fatin seluk atu halo atuasaun ho profesional nafatin, tane a’as diretus humanos povu terus nai’n ida nian.

6. Ejiji ba Sua Excelencia Prezidente Repúblika nu’udar orgaun ne’ebé iha papél atu garante unidade nasionál no estabilidade nasionál atu dezenvolve estratejia diálogu nasional ba ema rezistensia no veteranu sira, fasilita rekonsiliasaun entre funu nai’n sira ba diverjensias politika sira ne’ebé akuntese durante rezistensia nian. Ida ne’e importante atu prevene akontesementu hanesan iha futuru. Realidade hatudu katak, durante ne’e ita nia estadu promove deit rekonsiliasaun ba inimigu ukun rasik an nian hodi haluha tiha rekonsiliasaun entre funu nai’n sira hodi kauza polemika sira hanesan CPD-RDTL, KRM no selseluk tan.

7. Ejiji ba veteranu, kombatentes libertasaun nasionál sira hotu atu kontinua hatudu ita bo’ot sira nia heroismu atu la monu ba lasu politika ohin loron nian. Ami espera atu veteranu tenki sai heroi nafatin hodi tane a’as povu no martires sira nia mehi ne’ebé ita bo’ot sira mós kontribui tiha ona hodi liberta katak “ Ukun rasik An no Moris Diak”.

8. Ejiji ba Tribunal atu halao prosesu justisa tuir kódigu penál no tuir konstituisaun RDTL katak krime ba kondena ema privadu ka indivídu la’ós grupu tomak. Tribunal tenki hala’o nia mandatu ho independente atu labele kondena ema tuir dalan polítika nian, katak labele uza prizaun preventiva hodi substitui ba justisa iha tribunal.

9. Ejiji ba Governu atu organiza planu integradu ba reintegrasaun eis membru CPD-RDTL, KRM no selseluk tan ba sira nia komunidade. Planu reintegrasaun ida ne’e importante hodi evita konflitu komunitáriu hafoin operasaun konjuntu PNTL no F-FDTL. Planu integradu ida ne’e inklui fasilita diálogu ho membrus komunidade iha Distritus atu bele hamenus tensaun no rumores liu husi klarifika pozisaun governu, diskuti papel sidadaun no estadu, no identifika konfuzaun ne’ebé mósu relasiona ho operasaun bazeia ba rezolusaun no 5/2014.

10. Ejiji ba Parlamentu Nasional atu debate relatoriu Chega! no implementa rekomendasaun sira Chega! nian hodi hametin rekonsiliasaun entre Timoroan relasaun ho konflitu ne’ebé akuntese iha pasadu. Nune’e mós atu aprova lei instutuisaun memoria hafoin CAVR, lei rai no lei reparasaun ba vitima ne’ebé sei kaduka hela iha Parlamentu.

11. Ejiji ba ba Sosiedade Sivíl no Igreija Katolika no lider relijiozus atu hatudu nia papel nu’udar orgaun intermediariu no independenti hodi kontinua hametin konfliansa ba komunidade no politiku sira bele fasilita dialogu ba konflitu sira ne’ebé mósu iha ita nia sosiedade.

12. Ejiji mós ba Prpvedoria Direitus Humanos e Justisa (PDHJ) atu halo monitorizasaun ativu iha asuntu direitu humanus nian durante implementasaun Rezolusaun no operasaun konjuntu PNTL no F-FDTL nian iha baze. 13. Sociedade Sivil mos prontu hodi halo monitoizasaun ba operasaun konjunta ne’e atu asegura katak operasaun ne’e respeitu direitus humanus ba ema hotu.

Ami ne’ebé halo Deklarasaun:
1. Belun
2. Fundasaun Mahein
3. Ba Futuru
4. Search for Common Ground (SFCG)
5. Ita ba Paz
6. La’o Hamutuk
7. CRS
8. CEPAD
 9. ETCRN
,

Sem comentários:

Publicar um comentário

Nota: só um membro deste blogue pode publicar um comentário.