quinta-feira, 24 de abril de 2014

"FFTL Lori AMANTE Ba Tribunal"

.

Jornal Independente - Kuarta-Feira, 23 Abril 2014 

Federasaun Fotebol Timor-Leste (FFTL) lori ona grupu AMANTE ba Tribunal, tanba senti ofendidu husi akuzasaun oioin. 

 Antes ne'e, grupu AMANTE akuza Prezidenti FFTL Francisco Kalbuadi Lay halo mafiozu, manipulasaun no halo korupsaun boot. Tan ne'e, tuir Direktur tekniku FFTL, Orlando Mendes hatete, sira lori ona AMANTE ba iha Tribunal tanba senti ofenidu. 

Oras ne'e, kazu prosesa dadauk ona iha Tribunal no hein deit atu ba tuir prosesu julgamentu. "Agora dadaun kazu ne'e ninia prosesu la'o ona iha Tribunal, tanba sira halo defamasaun maka'as ba prezidenti Federasaun, ne'e duni sei hasoru malu iha Tribunal ne'eba," dehan Direktur tekniku FFTL, Tersa (22/4), iha edifisiu FFTL, Kampo demokrasia, Dili. 

FFTL mos lakohi dialogu, tanba konsidera AMANTE nuudar grupu kikoan no illegal, nia dehan grupu AMANTE hanesan grupu ida hadomi bola iha tinan sanolu (10) laran la halo buat ida. "Ami lakohi hasoru AMANTE tanba sira ne'e grupu illegal, sira koalia iha kotuk maka'as maibe nunka halo buat ida," esplika nia. 

Diretor tekniku FFTL ne'e akresenta katak, FFTL iha ninia estatutu rasik ne'ebe aprova husi FIFA, tan ne'e, AMANTE ne'e illegal, ne'e duni la rekonese sira, maske iha nasaun demokrasia ema hotu koalia maibe tenki tuir nia dalan. Iha fatin ketak, Porta Voz AMANTE, Jose Luis Oliveira hateten, FFTL lori AMANTE ba iha Tribunal ne'e sira nia direitu, tanba lei mos preve bainhira ema ruma senti sai vitima husi hahalok no lia-fuan ema seluk nian. 

Tanba ne'e, AMANTE mos pronto ba Tribunal, atu deskobre lia los. 

"Hau senti kontenti bainhira sira lori ba Tribunal, ne'e duni ami hein, tanba ami lori ona ba Tribunal, hein sira lori ba, depois Tribunal halo prosesu hodi buka lia loos ne'e iha ne'ebe," konta Jose. 
,

Sem comentários:

Publicar um comentário

Nota: só um membro deste blogue pode publicar um comentário.