terça-feira, 15 de abril de 2014

"Grupu AMANTE Konsidera Estadu Tilun Diuk No Matan Delek Ba Problema FFTL"

.

Notisia Husi TVTL - Segunda-Kalan, 14 Abril 2014 

Grupu AMANTE hala'o asaun pasifiku hodi husu ba lideransa iha nasaun ida ne'e atu halo reforma ba estrutura FFTL. 

Grupu AMANTE kontinua esforsu nafatin hodi halo manifestasaun pasifika, sira husu mos ba joventude hadomi Foteboll atu apoiu sira no husu ba lideransa iha nasaun foun ida ne'e tenki tau atensaun ba problema ne'e hodi halo reformasaun ba strutura FFTL. 

"Atu bolu konsensia ita nia nain ulun sira atu hare problema FFTL, ne'e problema publiku, problema povu nian, problema nasaun nian, maibe infelismente esforsu ne'ebe ke ami halo, ita harea katak, ita nia estadu ne'e hanesan tilun diuk, matan Delek, fuan to'os ba problema ne'e, to'o agora ita seidauk haree medidas konkretu ruma husi ita nia orgaun estadu, tamba ne'e mak ami agora komesa ona halo manifestasaun hodi ezizi reforma ba FFTL," dehan Porta Voz AMANTE. 

Hatan ba asaun ne'e, Vice Prezidenti no Sekjen FFTL hateten, sira sei la halo asaun ruma lori kontra tamba PreZidenti da Republika husu ba strutura FFTL atu kontinua hala'o sira nia kna'ar hanesan baibain, labele rona grupu seluk. 

"Prezidenti da Republika ameno ami, ami halo ami nia servisu hon didiak, servisu onestu, hatudu nafatin vontade servisu, buat grupu ne'e imi lalika rona, ami sei kaer metin nafatin katuas nia lia fuan ne'e, atu halo buat ruma mos ami lakohi, atu hata'an mos ami lakohi," dehan Alexio Cobra. 

"FFTL iha ninia sistema rasik, iha ninia estatuta ne'ebe rejistu iha Ministeriu da Justica, iha nia statuta organizasaun ne'e organizasaun privadu, ema ne'ebe iha direitu atu mai koalia kona ba FFTL so ema ne'ebe mak membru FFTL ninian, sira organiza demo ba depois mak ita hare, depois liu tiha paskoa ba mak ita hare tok," dehan Amandio de Araujo. 

Grupu AMANTE sira mos promete katak sira sei halo manifestasaun boot iha semana oin to'o hetan rejultadu ba strutura FFTL. Jornal Independente Tersa-Feira, 15 Abril 2014 "Eis Refujiadu Rihun 7 Iha Indonezia Hakarak Fila" Timoroan sira kuaze hamutuk rihun hitu (7) ne'ebe uluk refujiadu ba Indonezia hafoin referendum iha 30 Agusto 1999 hakarak fila fali mai Timor-Leste.

 Veteranus Ernestu Fernandes 'Dudu' horsehik ba hasoru Prezidenti da Republika Taur Matan Ruak hodi deskute asuntu ne'e. 

 "Hau mai husu ba Prezidenti da Republika no mos PM Xanana Gusmao atu fo sira nia hanoin, nia lia fuan ruma ba maluk sira iha Timor Osidental kuaze rihun 7 ne'ebe hakarak fila mai Timor-Leste," dehan dudu hafoin hasoru malu ho Xefe Estadu iha Palacio Prezidensial. 

 Nia dehan, durante ne'e Timoroan sira ne'ebe hela iha Timor osidental, liu-liu iha Atamabua no Kupang Provinsia Nusa Tenggara Timur, Indonezia sempre husu padre Parokia Ermera katak, sira husu lider sira iha nasuan ne'e atu bele buka dalan oinsa atu sira bele fila fali mai. 

 "Sira husu amu atu ba halo misa, no sira mos husu lider ruma atu ba iha ne'eba, hodi fo hanoin ruma atu bele sira fila, tanba falta ema distritu Ermera rihun 7 sei hela iha ne'eba," dehan nia.

 Dudu dehan, xefe estadu hatudu ninia solidaridade kuandu eis refujiadu sira ne'e fila fali mai Timor-Leste maibe presiza rezolve uluk lai problema sira ne'ebe mak mosu iha rai laran. 

Prezidenti dehan, sei haree kondisaun tanba, hakarak reZolve uluk problema iha rai laran depois mak sei haree fali ida ne'eba," tenik nia. 

Nia dehan, foin lalais ne'e nia parte halao ona inkontru ho Timoroan sira iha Atambua ne'ebe hakarak fila mai Timor-Leste, tanba ne'e husu ba Estadu TL atu prepara kondisaun lori sira fila mai.
.

Sem comentários:

Publicar um comentário

Nota: só um membro deste blogue pode publicar um comentário.