segunda-feira, 14 de abril de 2014

"Grupu Deskonesidu Ta'a Timor-oan Iha Indonezia"

,

Jornal Independente - Segunda-Feira, 14 Abril 2014 

Estudante Timor-oan nain rua (2) ne'ebe hala'o estudu iha Jogjakarta-Indonesia, hetan ataka husi ema dekonesidu iha Kuarta (02/4). 

Exaldinho de Jesus do Graca Pereira (Quinho) no Lelo dos santos Martins hetan hataka husi grupu deskonesidu iha tuku 1:15 madrugada oras Indonesia, bainhira vitima nain rua ne'e sai husi sira nia fatin (kos) iha area Jantin-Jogja, atu ba sosa hahan. 

Iha akontesementu ne'e Quinho nia liman fuan loos no karuk tohar, no Lelo nia kakorok kotuk no kotuk laran Nakles. 

"Kalan ne'e ami rua sai atu ba haan, amis ai husi dalan kontrakan ne'e ami haree ema barak hamrik, ami rua taka odamatan boot kontrakan, pas atu lao sai, ami hare kuaze ema nian 30 dehan, "Timor-Leste" ne'ebe ami mos hakfodak, sira mai balun lori tudik, balun lori pistola, samurai no besi kanu taa kedas ami nain rua," Quinho konta iha Aeroportu Komoro, bainhira fila husi Indonesia mai, Sabadu (12/4). 

Grupu ne'e, nia dehan balun taka oin no sleuk la taka oin, maibe nia ho Lelo lakonese ema sira ne'e. "Sira sai mai ne'e atu oho kedas ami, sorte alin nain tolu sai mai ajuda ami nain rua, tanba kanek raan fakara barak entaun oin nakukun," dehan nia. 

Hafoin akontesementu ne'e, vitima nain rua hato'o kedas keixa ba Polisia Indonesia. 

Nune'e, aman husi vitima Lelo, Pedro dos santos Martins husu ba Governu Timor-Leste ho Indonesia presija konsidera ne'e hanesan kazu seriu, nune'e bele rezolve. 

Pedro triste tanba sira lakon osan barak hodi trata sira nia oan ba eskola, maibe hasoru problema ne'ebe sira hotu la espera durante ne'e.
.

Sem comentários:

Publicar um comentário

Nota: só um membro deste blogue pode publicar um comentário.