sexta-feira, 25 de abril de 2014

"Soke Fuju Iha Portu Dili, Mateus Mate Iha Fatin"

.

Jornal Independente - Sesta-Feira, 25 Abril 2014 

Kareta fuju ne'ebe para iha Porto Dili nian oin hamosu asidente trafiku, horikalan, maizumenus tuku 10:30 oras Timor-Leste, motorizada ida, mate iha fatin wainhira soke fuju husi kotuk. 

Tuir informasaun husi sasin balun iha fatin akontesementu katak, vitima halai ho velosidade maka'as husi dirasaun Motael ba palasiu Governu. Iha Portu Dili nia oin, vitima ne'ebe sa'e motor Mio-Z ho numeru matrikula F.2945 derepenti halai loos ba kareta fuju ho numeru matrikula 50.851 ne'ebe para hela. 

Vitima ne'ebe identifika ho naran Mateus Pereira deskonfia ho kondisaun lanu no la uza kapaseti. Akontesementu halo vitima nia ain tohar no ulun rahun, vitima mate kedan iha fatin. 

Hafoin asidenti ne'e, Polisia Tranzito too kedan iha fatin akontesementu. Tuir Polisia Tranzito, Ajente xefe Armando Bere, nia parte sei lori kundutor fuju ba polisia Distritu Dili hosi husu informasaun. 

Nia dehan, nia parte mos sei halo investigasaun ba akontesementu ne'e. Iha kalan ne'e, Polisia Tranzito tenki kontaktu familia vitima, maibe lakonsege, no polisia kontaktu ambulansia hodi lori vitima ba Ospital hodi halo prosesu autopsia.
.

Sem comentários:

Publicar um comentário

Nota: só um membro deste blogue pode publicar um comentário.