terça-feira, 8 de abril de 2014

"Xanana Sujere FRETILIN Sai Boot Liu"

.

Jornal Independente - Segunda-Feira, 07 Abril 2014 

Prezidente Partidu Concelu Rekonstrusaun Nasional Timor-Leste (CNRT) atual Primeiru Ministru Kay Rala Xanana Gusmao dehan, nia espera FRETILIN bele boot liu tan iha futuru. 

FRETILIN halo konferensia nasional iha centru Konvensaun Dili durante loron rua, sabadu, (05/04)-Domingo (06/04). 

 "Kamarada Prezidenti FRETILIN, Francisco Guterres Lu-Olo, Kamarada Sekretariu Jeral Dr. Mari Alkatiri, membrus Comite Central no konfrensista sira hotu, hau espera hau nia solidaridade boot hodi husu katak husi konferensia ida ne'e, partidu bele sai boot liu, bele vizaun konstrutiva tanba ita nia rai presiza tebe-tebes," dehan Xanana liu husi telefone ba konferensia horsehik. 

"Embora hau iha partidu seluk, hodi CNRT nia naran deseiza ba imi susesu, pensamentu ne'ebe pozitiva no konstrutiva, tanba ita hotu tenki tau povu Timor-Leste no ita nia rai doben Timor-Leste, uluk liu," tenik tan nia. 

"Ho respeita boot ho espiritu solidaridade boot ba partidu ne'ebe tinan 40 kotuk ba hau aprende hadomi ita nia rai no ita nia povu," dehan xanana ho mata be'en. 

 Xanana dehan, susesu FRETILIN mos sei sai susesu ba partidu sira seluk iha rai ida ne'e. 

 "Husu ba kamarada sira tomak hametin nafatin ideias tinan 40 ninian ho hanoin foun ba era globalizasaun ninian ita ohin loron ne'e infrenta, hakuak boot ho hanoin susesu ba imi tomak, tanba imi nia susesu mos sei sai susesu ba partidu sira seluk no ba ita nian rain, obrigadu ba opotunidade ida ne'e, hakuak boot ba imi hotu," nia afirma. 
.

Sem comentários:

Publicar um comentário

Nota: só um membro deste blogue pode publicar um comentário.