sexta-feira, 30 de maio de 2014

“Iha Ermera Estudante 60 ‘Hadau Malu’ Kadeira 10”

.

Jornal Independente -Sesta-Feira, 30 Maiu 2014

Estudante iha eskola Ensinu Baziku Sentral Fatqeru, Railako, Distritu Ermera, enfrenta difikuldade ba kadeira no meza, kada sala iha deit kadeira 10 no meza 10 ho numeru estudante nain 60, signifika atu tuir prosesu aprendizazen, estudante nain 50 tenke tuur iha rai.

Diretor eskola, Cornelo Maio Nascimento dehan, falta meza no kadeira sai preokupasuan boot ba eskola ne’e.

“Maioria estudante mak sei kontinua hakdasak iha rai hodi tuir prosesu aprendizajen,” informa Cornelio ba Jornalista sira iha eskola baziku Bairo Grilos, Dili, horsehik.

Nia dehan, iha sala ida iha deit kadeira 10 no meza 10 ho numeru estudante hamutuk nain 60.

Eskola ne’e, Cornelio hateten, iha sala hamutuk 5, ho total estudante hamutuk nain 600 resin, signifika sala ida estudnate nain 120 mak okupa.

Atu rezolve problema ne’e, Diretor ne’e hateten, parte eskola tenki fahe ba turma rua (2) dader no lokraik, nune’e kada sala estudante nain 60 mak okupa.

Ho numeru estudante ne’ebe boot, nia dehan, estudante sira tenke hadau malu kadeira no meza, no sira ne’ebe la hetan tenki tuur iha rai hodi tuir prosesu aprendizajen.

Aleinde problema ne’e, eskola ne’e mos infrenta problema moru ne’ebe monu no to’o agora governu seidauk tau atensaun hodi hadia.

Hataan ba preokupasuan ne’e, Diretor Distrital Ermera, Domingos Lopes rekonese problema ne’e.

“loos ne’e realidade, estudante sira balun sei tuur iha rai,” dehan nia.

Kona-ba mosu neebe monu, nia dehan, dadauk ne’e iha ona programa reabilitasaun, no eskola ne’e sei hetan perioridade.
 .

Sem comentários:

Publicar um comentário

Nota: só um membro deste blogue pode publicar um comentário.