quarta-feira, 14 de maio de 2014

KILAT RAJADA UMA, NO DAPUR IDA HETAN SUNU IHA SUKU GURCA-KELIKAI

.

Fórum Estudante Maubere - 14 de Maio de 2014

BAUCAU - Fórum Estudante Maubere - Hanesan media balun hatún ona informasaun kona-ba akontesimentu operasaun iha Suku Gurusa husi ekipa operasaun konjunta hasoru grupu KRM no CPD.

Dia 12 Maiu 2014 oras 8.30 dadeer san ekipa operasaun konjunta hale’u tiha uma ka sede Kompañia Kona-ba Matebian (Sede CPD-RDTL) nia hodi sunu no halo tiroteiu iha fatin refere.

Sede ba CPD ka KRM ne’e hetan sunu no dapur ida mós hetan sunu tomak. Tuir fonte ne’ebé lakohi publika nia naran hatete katak razaun sunu uma ho dadur ne’e tanba autoridade seguransa hetan ba musan iha uma laran, bala musan ne’e SP2 nia.

Fonte ne’e mós hatete katak bala musan ne’e sira hetan husi rai kuak bainhira sira halo uma ka harii sede ne’e, sira deskonfia kilat musan sira ne’e uluk militár Indonézia mak soe hela iha fatin ne’e.

Laos uza ba tiru malu agora nia. Iha momentu akontesimentu ne’e mós laiha tiru malu husi parte rua maibé husi Kok mak tiru. Iha operasaun ne’e mós KOK kaer membru KRM no CPD hamutuk na’in lima, nia naran mak Carlos Correia, Justino Correia, Alcino Pereira, Gaspar Freitas no Marcal Freitas.

Tuir fonte ne’e mós hatete katak fatin ne’e hetan atake tanba mós hatudu dalan husi komunidade no xefe suku tuan suku gurusa nia. Tiroteiu iha fatin ne’e halo populasaun sivíl sira barak mak trauma no Komandante Kompañia kona Matebian Sr. Anacleto Da sivla ho kódigu Timor-Fretilin ne’e too agora seidauk hetan nia paradeiru.

Kona-ba alegasaun sira ne’e parte estadu, governu no Kok halo hasoru membru CPD no KRM ne’ebé sei subar hela ne’e, tuir fonte ne’e hatete katak ami laiha kilat buat ida, ami nia kilat mak ami nia polítika istóriku no razaun restaurasaun RDTL.

Durante ne’e ami nunka uza kilat tanba kilat mak iha metinaro hotu ona ne’e, iha ami laiha ona kilat tanba ne’e ami husu ba públiku tomak labele kondena ami ba buat ne’e loloos laiha iha ami nia liman.

Ba asuntu ne’e Governu no autoridade seguransa nia hakarak fila sai projetu hodi hetan osan no rekursu povu nia seluk ko’alia klaru de’it labele uza lia falsu oin-oin hodi kondena ba ami.

Ami hatene katak operasaun hasoru ami ne’e, ema barak bosok no manipula ami hodi hetan osan barak maibé ita nia heroi no matebian sira nunka dukur ba manipulasaun hirak ne’e. Kona-ba kilat Ak, ami nunka haree kilat ne’e depois ukun an tiha, Ak ida ne’e tuir ami hatene uluk depois ukun an, superior sira Falintil nia mak foti hotu kilat husi ami nia liman inklui Ak ne’e iha Aileu, kilat kuaze 500 resin foti tomak. Momentu ne’ebá komandante L7 laiha fatin maibé morteru, no tanke funu nia hale’u tiha ami iha Aileu mak foti hotu, tanba sá mak dun fali mai ami. Ami seidauk husu kilat 500 resin ne’ebé ami hadau husi Indonézia ba Lere, Matan Ruak no Xanana tanba sá husu fali ba ami?

Kilat hirak ne’e ba husu ba sira na’in tolu ka sira seluk tanba sira mak uluk foti hotu iha Aileu. Se hakarak manán osan nonook fahe ba malu de’it hodi aumenta imi nia osan husi projetu sira ne’ebé durante ne’e imi halibur, labele manipula sasán tun sae hodi justifika ba imi nia negósiu hodi povu nia osan.

Ami la’ós kriminozu no ami la’ós na’ok ten, simplesmente ami hakarak reafirma orden revolusaun nia ne’ebé ema balun hakle’uk durante funu naruk nia laran too agora iha era ukun rasik an nia. T

anba ne’e ami nudár ema rezisténsia iha obrigasaun moral no polítika kontinua luta hodi podér popular entrega ikas ba nia na’in loloos no atributu tomak revolusaun nia tenke Restaura total iha Timor-Leste.

Laiha restaurasaun ami nia luta nunka para no nunka remata istória tomak Povu Maubere nian jerasaun tomak.

Ami kontinua la’o iha dalan ba A Luta Kontinua.
.

Sem comentários:

Publicar um comentário

Nota: só um membro deste blogue pode publicar um comentário.