domingo, 4 de maio de 2014

Maun Taur no Maun Xanana keta sama tan veteranus sira

.

Opiniaun hosi: Alexandre Ferreira

Ha'u lee dekarasaun Maun Xanana no Maun Taur iha media no hau hanoin kala  sira rua haluha tiha ona sira mai husi ne'ebe. Karik sira agora mos sai ona traidor ba povu no ba rai lulik ne'e.

Taur no Xanana hakarak hakerek mesak  istoria foun ida no hakerek bosok iha libru katak sira nain rua mak funu mesak, sira mak heroi mesak no veteranus sira la halo buat ida, naran veteranus deit ba halimar.

Imi nain rua keta traidor, moris ona hanesan ema bot, uma diak, kareta diak, oan sira ba escola diak no imi  haluha lalais que  imi nia maluk sira sei susar no terus nafatin iha tempu independensia. 

Imi tur, ho otonomista no traidores sira, han, hamnasa, kaer liman, karik mos rei sira nia kidung, no ba imi nia maluk sira que funu ho imi ba rai lulik ne'e hetan independensia que too ohin loron meioria sei terus no mukit no imi la tau matan ba sira maibe, mesak autonomistas, traidores, opurtinistas sira mak goza duni independensia ne’e. Nain rua sai traidor ona ba rai lulik no povu ?

Maun Xanana dehan katak nia sei la fo tan projetu ba veteranus sira, tanba laiha kualidade no estraga deit osan, hau sei hamnasa hela.

Xanana Gusmão haluha tiha ona que nia kaer ukun kleur ona, nia sefia Governu AMP no ita hotu hare que laiha kualidade, dadaun ne'e nia mos sefia Bloku Koligasaun, alias Bloku Kriminozu no laiha mos kualidade. Tinan tinan sira aproba millaun ba millaun dolar ba OJE no to'o agora povu rai lulik ne'e sei mukit, hamlaha no terus ba beibeik. Osan bot OJE nian ba los ne'ebe? Se veteranus la bele kaer projetu entaun Maun Xanana mos la bele kaer ukun, tanba ita hare ona que Maun bot nia ukun sala tebes no nia laiha kapasidade.

Prezidenti Taur mos hare buat hotu maibe nia nonok hela. Uainhira nia koalia kona ba veteranus sira, halo ameasu deit, ameasu koa sira nia pensaun tanba sira joga karta no toba deit. Maibe Prezidenti la hanoin que karik sira mos baruk serbisu ba rai ne'e, tanba sira no povu nunka hetan benefisiu, opurtunistas, ema que mai  husi rai  liur no otonomistas sira mak hetan benefisiu bar barak no goza barak independensia ida ne'e, maibe veteranus no povu mak sosa ho RAN no RUIN independensia ne'e. Haruka sira servisu ba otonomistas sira ba goza tan sira nia kosar wen? Kala Maun Taur hanoin katak MAUBERE sira ema beikten fali?

Tanba sa mak Maun Taur la haruka deputadus sira no membru governu sira mos servisu ho diak ba ita rai no povu ? Tanba sa Maun Taur  la ameasu koa deputadus sira nia salariu que bobot tebes no sira la halo buat ida diak ba rai no povu ne'e? Maun Taur tetu didiak lai. La bele obriga deit ema que fo ona kontribuisaun bot tebes ba ita rai ba servisu , sira nia pensaun  kompara mos ho otonomistas, oportunistas no traidores sira que tur iha Governu nia laran, veteranus osan que Governu fo kiik tebes. Kala Taur Matan Ruak mos hakarak ona esplora no hanehan Timor oan no hakiak no hadomi deit ema traidor  no otonomistas sira?

Imi bele sama povu, veteranus to'o iha ne'ebe deit, maibe nafatin sei hela ema ida ba koalia lia los, nafatin. Tanba ita nia matebian sei proteije ema que koalia lia los no loron ida, ita nia matebian sei babeur imi hotu.

Imi nain rua hafoer ona Timor Lorosa'e istoria, ohin loron imi trata barak ona veteranus sira, komandante FALINTIL nain rua Xanana haruka ona ba komarka, MAUN BOT L7 TRIBUNAL FO TIR ba nia.

Maun Taur taka ibun metin, nonok hela, karik hamutuk ho PN no PM koko hamate veteranus nia dignu no hafoer sira naran, nune'e sira mes mesak mak sai herói bot ba rai lulik ne’e, sira mes mesak maka funu to’o  Timor hetan independensia, vetaranus sira la bale buat ida?

Saida tan imi ba halo ba veteranus? Hakarak hasai projetu, hakarak hasai pensaun. Tan sa la tau sira hotu nomos sira nia família hotu iha kampu konsentrasaun ida, taka metin, tau TNI sira ba halo vijilansia ba sira, nune'e imi bele hakilar ba mundu tomak katak imi mak heroi mesak, imi mak manu aman Timor Lorosa’e nian. Laiha ona ema nem ida tan que ba kontra imi, tanba iha imi nia let iha deit otonomistas, traidores no ema que mai husi rai liur ba goza tebes MAUBERE nia RAN no kosar wen. Ida ne'e mak imi hakarak karik?

Imi bele sama veteranus sira, veteranus sira bele kiak no mukit maibe imi rua la konsegue hasai sira nia DIGNU, (karik imi lakon ona imi nian) ,maibe veteranus sei la lakon, sei la lakon………………….

Tuir ha'u nia hanoin diak liu duni veteranus sira hakiduk husi maun bot sira ne'e tanba bele hafoer duni veteranus naran. Tanba veteranus balun sei koalia duni lia los no defende MAUBERE nia mehi, la trai, maibe balun sira sulan kedas ba komarka, maibe sira la bele sulan sira hotu, nafatin ema ida sei la traidor ba MAUBERE nia mehi………………..

Prezidenti nia let mos hahu ona ho ema oportunista barak, ema UDT barak los mak tabele metin  ba Maun Taur no Maun bot hahu hadomi hakiak ema sira ne'e iha Prezidensia nia laran?

Uainhira Maun Taur halo kampanya, nia dehan que nia mai ba halibur ema hotu laos ba fahe, imi sei hanoin ka lae? Maibe la dehan katak ba haluha no trata at veteranus sira. Karik uainhira koalia halibur ema, koalia deit ba ema ilite deit?

Maun Taur keta fiar traidor, opurtunista no milisia sira, Maun bot nia naran sei bot iha Timor Lorosa’e tomak, povu MAUBERE sei hadomi maun to’o mate, maibe, tenki atensaun no matan moris se lae, bele akontese hanesan Maun Xanana que  ohin loron ninia naran foer no dois tebes. Ba manan eleisaun 2012, nia la manan hanesan Maun Taur que manan  tanba povu fo fiar tomak ba Maun bot, Xanana ba manan tenki sosa votus ho MAUBERE nia osan rasik. Moe bot.

Imi nia ibun bot temi naran veteranus uainhira imi koalia kona ba projetus. Ha’u husu deit, veteranus hotu mak kaer projetu? Veteranus hotu riku ona? Laos imi rua que uza veteranus balun ba manan votus no hetan pozisaun PR no PM? Veteranus balun sei kiak nafatin, estadu la tau matan ba sira, balun mate tanba laiha osan ba sosa aimoruk, balun laiha osan ba haruka oan sira ba eskola diak hanesan imi nia oan. Tetu didiak, la bele koalia arbiru deit. Ita nia matebian sei halo justisa no lia los sei manan.

 Maun Taur no Maun Xanana keta sama tan veteranus sira……………..
 .

Sem comentários:

Publicar um comentário

Nota: só um membro deste blogue pode publicar um comentário.