sexta-feira, 9 de maio de 2014

"PR Taur Propoin Indultu ba Feto Oho La'en"

.

Jornal IndependenteSesta-Feira, 09 Maiu 2014 

Prezidenti Republika (PR) Taur Matan Ruak propoin ba Primeiru Ministru (PM) Kay Rala Xanana Gusmao atu bele haree didiak problema kazu inan feton balun ne'ebe tama komarka, tanba envolve kazu oho nia kaben, tenke hetan justisa diak no bele hamenus pena prizaun ba sira. 

PM Xanana haktuir katak, foin lalais Prezidenti Republika halo vizita ba prizaun Gleno hodi hare kondisaun prizioneiru sira, identifika katak, justisa inan-feton balun la dun justu. 

Feto sira ne'e balun desidi oho nia kaben, tanba semte terus ona iha tinan barak nia laran, sira hetan baku no intimidasaun beibeik husi sira nia kaben, ne'e duni sira foti desizaun hodi halakon laen nia vida, maski nune'e, juis sira iha Tribunal la dun fo konsiderasaun katak, feto mos terus ba torturasaun no iha prizaun enfrenta problema psikolojia tanba hanon oan no familia. 

Ne'e duni, Prezidenti da Republika propoin ba Governu atu haree asuntu ne'e, hodi bele fo justisa ne'ebe justu ba inan feton sira. 

"Tinan hirak ba kotuk hau lansa ona ideia ida ne'e, hau mos uluk ba hasoru sira, sira dehan justisa ne'e la loos, sira dehan loos duni ami oho ami nia kaben, tamba ne'e ami mai kadeia, maibe justisa la loos tamba la konsidera ami nia terus tinan barak sira (mane baku ami), ami labele tahan terus ona, ne'ebe ami oho sira, maibe justisa haree deit mak ami oho sira, maibe la hare baa mi nia terus," dehan PM Xanana, hafoin enkontru ho PR Taur, iha Palasiu Prezidensial horsehik. 

Xefe Governu rasik rona ona preokupasaunhirak ne'e husi prizioneiru sira iha Gleno, maibe nuudar politiku nain, labele foti desizaun ruma, tanba ne'e kompetensia tribunal nian. 

Maski nune'e, PM Xanana promete atu deskute asuntu ne'e ho juis, prokurador no organizasaun judisiariu sira hodi tetu ideia hamutuk para fo indultu ba inan feton, tuir sira nia prestasaun ka dediakasaun iha prizaun. 

"Ami sei haree bele redus pena prizaun, maibe ami sei halo enkontru ho juis, prokurador, jurista lei sira no advogadu sira hodi haree kestaun ne'e," tenik PM xanana. 

Nune'e, parte Governu mos sei haree ba servisu PNTL nian oinsa aumenta ofisial polisia feto sai barak hodi ba servisu besik liu povu, liu-liu konsola inan feton sira atu moris labele hamosu violensia domestika hodi moris nuudar familia ne'ebe diak iha uma laran ida. 
.

Sem comentários:

Publicar um comentário

Nota: só um membro deste blogue pode publicar um comentário.