quarta-feira, 14 de maio de 2014

"Proposta Lei ZEESM Pasa Iha Jeneralidade"

.

Jornal Independente - Tersa-Feira, 13 Maiu 2014 

Proposta Lei Zona Espesial Ekonomia Sosial Merkadu (ZEESM) pasa ona votasaun iha jeneraldiade Parlamentu Nasional (PN) ho total votu afavor 56 no abstensaun 1. 

Proposta lei ZEESM kona-ba estatuta rejiaun Oekuse-Ambeno ho Numeru 12/III (2a) hamutuk artigu 37, ne'ebe hatam husi Governu iha loron 30 Marsu 2014 liuba. Vise Prezidenti Parlamentu Nasional, Adriano do Nascimento hateten, Proposta lei ZEESM ne'ebe aprova oha ina jeneralidade, meza deside sei hatama iha Komisaun A PN atu deskute iha espesialidade. 

 "Hau husu ba komisaun A atu bele prepara ajenda no kalendariu hodi haree no deskute nia espesialidade, liuliu artigu pur artigu para lori mai fali iha plenaria hodi deskute iha plenaria ba final Global, atu hafasil ita halao servisu Oekuse ninian," dehan nia iha Plenaria PN horsehik. 

Iha fatin hanesan, Prezidenti bancada FRETILIN, Aniceto Guterres hateten, Lei ZEESM ne'e presiza hatuun ba komisaun A atu hala'o diskusaun iha espesialidade, maibe la taka dalan mos ba deputadu sira seluk atu envolve iha diskusaun Komisaun A PN nian. 

"Hau hanoin deputadu husi komisaun seluk bele partisipa iha diskusaun espesialidade hodi fo opiniaun," dehan nia. Entertantu, Prezidenti Bancada CNRT, Natalino dos Santos, fo apresiasaun ba lei ZEESM ne'ebe ho karakter lei foun, neebe importante duni ba dezenvolvimentu nasaun ne'e nian. Entertantu, membru Bancada FRETILIN, Estanislau da Silva ne'ebe fo votu abstensaun ba proposta lei ZEESM ne'e hateten, presiza halo klarifikasuan iha lei ZEESM, tanba barak mak sei duvida. 

Tanba ne'e nia ladun konkorda atu diskusaun halao iha Komisaun A PN nia laran deit, maibe husu atu halo diskusaunaberta iha plenaria hodi bele esklaresidu no bele hetan opiniaun variedade husi ema hotu-hotu, inklui publiku. 

"Ita haree lei ZEESM ne'e fo estatutu ba reijaun Oekuse hanesan area turizmu deit, tanba ne'e presiza klarifikasaun didiak no se bele karik lei ne'e mai deskute iha plenaria la'os ba deskute fali iha Komisaun A," nia afirma. 

Entertantu, Primeiru Ministru Xanana Gusmao agradese votu konfiansa, ba ita nia hanoin ida atu lao tuir saida mak konstituisaun obriga ita, atu halo no inovasaun ida atu ita buka introdus," tenik xefe Governu iha plenaria PN. PM Xanana husu ba komisaun A atu fo perioridade ba ZEESM no hare liu ba estatutu rejiaun OOekuse-Ambeno. 

"Hau mos buka kumpriende oituan tanba hau laos jurista maibe tanba saida mak iha lei ne'e ita hakarak hare ba estatutu ne'e, tanba ne'e fo norma atu ba hasori objetivu no direitu atu ita bele fo estatutu ida ita dehan espesial ne'e," dehan Xanana. 

 "Hau mos husu ba komisaun A atu deskute iha espesialidade no labele haluha termu lei, termu professional, atu dehan katak, autoridade ba ZEESM la'os independenti ne'ebe Independente tebe-tebes," nia afirma. Xanana dehan, lei ne'e la sai husi planu jeral no Master Plan ZEESM nian, ne'ebe tenki kontribui ba preparasaun iha tinan 2015, atu nune'e, Governu bele book ona planu ne'e. 

"Hau sente katak, iha buat barak ita presiza deskute iha lei ZEESM ne'e tanba buat ne'e foun, ne'ebe ita presiza hare duni profundu, tanba ne'e ami dudu imi atu ita halo lalais oituan," dehan Xanana. 
.

Sem comentários:

Publicar um comentário

Nota: só um membro deste blogue pode publicar um comentário.