terça-feira, 27 de maio de 2014

"Semana Oin, FRETILIN Aprezenta Kazu Indikasaun Korrupsaun MS Ba MP"

.

Jornal Independente - Tersa-Feira, 27 Maiu 2014 

Bancada FRETILIN iha uma fukun Parlamentu Nasional (PN) iha semana oin sei aprezenta faktu kona-ba kazu korrupsaun ne'ebe deskonfia Ministru Saude Sergio Lobo envolve, ba Ministeriu Publiku (MP) hodi investiga. 

Deputada Maria Angelica Rangel dehan, Bancada FRETILIN fiar katak, nia identifika ona erru ne'ebe Ministru Saude komete mak mosu ona konflitu interese no indikasaun ba mal-administrasaun tanba halo adjudikasaun direta ba kompania Istana Group Lda, ne'ebe nia alin rasik ninian. 

Aleinde ne'e, bancada FRETILIN mos rona informasaun katak, Diresaun Nasional jestaun Finansas no Aprovizionamentu Ministeriu Saude, hato'o pedidu kanselamentu kontratu ho kompania Istana Group, maibe Ministru Lobo rasik lakohi rona orden ne'e. 

Tuir Bancada FRETILIN katak problema ida ne'e afeta ba distribuisaun ai-moruk ba ospital sira iha rai laran. Deputada Maria dehan tan katak, realidade hatudu katak durante besik tinan rua ona ai-moruk iha ospital sentral, referal, ho sentru saude sira iha teritoriu laran tomak manus ai-moruk. 

Iha OJE 2013 parlamentu nasional aprova orsamentu ba MS atu sosa ai-moruk ho valor milaun U$7 maibe parte governu asina kontratu ho Kompania Kimia Farma Indonezia ho Valor orsamentu millaun $11, dehan deputada. Maibe, Maria hatutan tan, sira akomapnia durante ne'e ai-moruk ne'ebe fa'an husi Kimia Farma, folin karun ka sa'e maka'as kompara ho klinika privadu sira seluk. 

"Ami Bancada FRETILIN mos sei entrega faktu no dadus hirak ne'e ba Ministeriu Publiku iha semana oin atu prosesa tuir lei ne'ebe vigora iha Timor-Leste," dehan Deputada Maria iha uma fukun PN, horsehik. 

"Ami husu imi (jornalista) atu kontinua akompania tanba semana oin ne'e ami entrega ona faktu hirak ne'e ba Ministeriu Publiku," dehan nia. Antes ne'e, Ministru Lobo husu ba Bancada Opozisaun FRETILIN atu hatudu faktu ba Tribunal no Ministeriu Publiku (MP) no la'os halo de'it deklarasaun politika ne'ebe laiha baze legal. 

Nia mos akresenta, nia parte prontu hata'an iha Tribunal bainhira dadus hirak ne'e Bancada FRETILIN hato'o ba Ministeriu Publiku.

Bele lee tan iha jornal Tempo Semanal: Parte I: Deskonfia Mafia Iha MS Ba Prosesu Sosa Ai-Moruk
Parte II : Deskonfia Mafia Iha MS Ba Prosesu Sosa Ai-Moruk
 Parte III: Deskonfia Mafia Iha MS Ba Prosesu Sosa Ai-Moruk
.

Sem comentários:

Publicar um comentário

Nota: só um membro deste blogue pode publicar um comentário.