quarta-feira, 21 de maio de 2014

"Tinan 40 FRETILIN: Hamutuk Hateke Ba Oin"

.
Foto de, Harold Maria Menezes Moucho
Jornal Independente - Kuarta-Feira, 21 Maiu 2014 

Partidu Frente Revolusionariu Timor Leste Independensia (FRETILIN), selebra ezistensia Partidu nian bad ala tinan 40 (20 Maiu 1974-20 Maiu 2014), serimonia ne'e hala'o iha Tasitolu, Tersa (20/5). 

Liu husi nia diskursu, Prezidenti Partidu FRETILIN, Francisco Guterres Lu-Olo hateten, FRETILIN komemora nia eizstensia ba dala 40 no mai ho istoria FRETILIN nian ne'ebe naruk tebes, maske nune'e luta FRETILIN nian atu liberta povu no nasaun ne'e husi kiak no mukit seidauk remata. 

Nia konta katak, iha inisiu Luta FRETILIN ba libertasaun rai doben ida ne'e, to'o ohin loron maske hetan ona nia liberdade, maibe luta prinsipal ne'ebe sai hanesan FRETILIN nia mehi no vizaun husi uluk kedas no sei kontinua mak hakarak atu liberta povu husi nakukun, kiak no mukit ba moris ne'ebe mak saudavel. Lu-Olo hatutan, FRETILIN la'o husi dalan ne'ebe nakonu ho fatuk, dalan ne'ebe nakonu ho ai-tarak, lao iha dalan ne'ebe tuur iha kilat nia tutun, la'o iha dalan ne'ebe tuur nafatin iha mehik no kroat nia rohan, maibe FRETILIN konsege la'o to'o rohan hodi hetan independensia mai Timor Leste. 

Dalan naruk ne'e komandante boboot no Camarada sira hanesan membru Comite Central FRETILIN (CCF) nian kuaze atu mate mohu iha funu laran, inklui Prezidenti Nicolau Lobato ne'ebe mak hahi nia ho estatua foin dadauk ne'e. 

"Tinan 40 ida ne'e lori ita hasoru malu fila fali (ho Nikolau Lobato) iha dalan kurzamentu ida," tenik Lu-Olo. 

Nia dehan, FRETILIN halo tinan 40, iha dalan kurzamentu ida ne'e atu koalia ba malu, oin ba oin, lori TL ba dalan ida ne'ebe diak liu no ida ne'e importante tebes ba hotu-hotu iha momentu ne'e atu hateke ba oin hamutuk, atu bele sukat forsa ho kbit hamutuk atu bele hakat ba oin hodi bele tane rain ne'ebe bokur tiha ona, oinsa bele kuidadu hodi bele fo fuan no isin ba be-oan sira. Lu-olo dehan, sira ne'ebe sei sai hanesan sasin moris ba Luta FRETILIN nian tempu naruk nia laran ne'ebe nakonu ho susar no terus mak hanesan Xanana Gusmao, Jose Ramos Horta no sira seluk ne'ebe sei moris. 

Maski iha tempu funu nian, ema barak mak hakarak atu kontinua hanehan povu no rai ida ne'e, maibe tanba FRETILIN tama ona iha povu sira nia fuan no FRETILIN sai ona povo nia klamar, mate ka moris hakarak deit mak ukun rasik an. 

Lu-Olo dehan, bainhira iha rezistensia nia laran, nia ema sira kuaze atu mohu ona iha inimigu nia liman, maubere ain tanan sira komesa laran taridu ona, maibe sei iha ema ida ne'ebe fo naroman ba Maubere oan sira mak Kay Rala Xanana Gusmao, atu kontinua hatutan mehi ne'ebe iha ona hodi sai ba realidade, no ohin loron said uni ona.
.

Sem comentários:

Publicar um comentário

Nota: só um membro deste blogue pode publicar um comentário.