quinta-feira, 1 de maio de 2014

TVTL Hala'o Intervista ho PM Xanana Gusmao kona ba implementasaun ZEESM Distritu Oecuse

.

TVTL - 30 Abril 2014

Jornalista TVTL Alice Benigna Hala'o Intervista ho PM Xanana Gusmao Kona Ba Implementasaun ZEESM Distritu Oecuse.

Alice Benigna: Senor Primeiru Ministru, mosu preokupasaun balun hateten katak, kuandu ZEESM ne'e fo mos vantazen ba nasaun vizinu ne'ebe besik, liu-liu (Indonesia), oinsa sa Primeiru Ministru nia hare kona ba ida ne'e?

PM Xanana Gusmao: Ita iha mundu globalizadu entaun ita iha mundu Globalizadu ne'e ital abele senti katak, ita ne'e diak ona iha ne'e, sira sori-sorin ladiak, ita iha mundu globalizadu ne'e ita senti ita ne'e sidadaun do mundo, se sidadaun do mundo entaun ita dehan ita iha buat ruma, tamba sa mak dezde 2007, iha 2004 mos Tsunami iha rai seluk hau husu populasuan tau osan hau lori ba ne'eba, maske oituan maibe hatudu katak povu ida ne'e iha espiritu solidaridade maka'as, ita mos laiha osan iha momentu ne'eba, ita iha fundu petroleum maka'as hanesan ohin loron karik ne'e oin seluk, mais hahu husi ne'eba iha Amerika mos ita fo osan, iha ITI ita fo, iha China ita fo, ita tau oituan-oituan ita ajuda, tamba ita tenki simu katak iha mundo globalizadu ne'e ita la mesak, kuandu ita presiza ema sira ne'e mai entaun ema presiza ita tenki ba, tamba ida ne'e maka labele hanoin katak, ida ne'e fo benefisiu ba sorin, lae, tamba ida ne'e hotu maka ohin loron iha Indonesia ho Australia iha konsetu trilateral ida. Oecuse bele sai hanesan Ponte ida para produtu sira ne'e mai ita deskarega husi Oecuse ba Eropa ba Afrika, it abele exporta sasan ba Eropa sein taca, ita bele exporta ba Xina, ita bele exporta ba Amerika, ita bele exporta ba Singapura, ita bele exporta ba fatin hotu-hotu ita iha Kouta la selu taca. Agora, ita mesak la konsege, ita mesak atu produs saida no exporta saida, tamba ne'e mak ita nia hanoin kona ba ekonomia tenki loke luan liu, loke luan liu, aproveita ita hanesan ponte ida para lori rai ne'e ba exporta ne'eba, Governu tenki iha Bisnismen, Bisnismen ne'e la'os dehan ba halo negosiu, lae, tamba nasaun global ne'e, nasaun ida atu moris tenki liu husi bisnis, ho nia politika to'o ne'ebe, ho nia direitus humanus to'o ne'ebe, buat hotu bele la'o maibe bisnis kuandu lao la diak ita monu, ita hare Portugal, Spanha fraku tebe-tebes. Kuandu Bisnis la la'o ita la bele, ne'e ita tenki aprende, ita tenki aprende tamba ita nia rai ne'e riku, ita nia produsaun too ne'ebe ita la konsege kompete ita mak produs han, produs han deit ne'e la la'o, ho ida nee mak ita loke, ho ida ne'e mak ita dehan Zona Espesial ne'e, ita hare Portu Mahata hadia ne'e ba de'it Ro Nakroma, portu Mahata iha ne'e se karik ita hanoin diak liu tan entaun ita tenki hadia halo luan, tenki boot tamba aproveita situasaun iha Indonesia, se ita la halo ida ne'e entaun sei problema iha futuru. Kompetisaun ne'e hanesan ne'e, Bisnis tenki ho kompetensia makaas katak, nia bele iha osan, nia bele iha buat hotu-hotu mais nia atu halo sei kleur, entaun ita halo kedas, katak, se mak lais nia mak sei hetan, buat sira ne'e hotu maka mai iha ne'e atu koalia hodi povu tomak hateten, hodi intelektual sira intende, se la'e, ita atu halo buat ida problema, halo fali buat ida problema, intende mos katak buat ne'e mai la'os atu mai halo de'it uma iha ne'e lae, buat ne'e buat boot

Alice Benigna: Senor Primeiru Ministru, ita hatene katak, foin lalais ne'e ita tinan kotuk liu ba Senor Primeiru Ministru rasik fo konfiansa ba iha Senor eis Primeiru Ministru Mari Alkatiri atu toma tesponsablidade tomak ba iha projetu ZEESM boot ida ne'e, razaun tamba saida? 

PM Xanana Gusmao: Rajaun fundamental maka ida ne'e, halo esprensia tinan nen iha Governu, hau ba tinan-tinan dala rua dala tolu ba Parlamentu Nasional e hau hare katak, buat ida ne'ebe boot tebe-tebes hanesan ne'e, se hau tau Ministru ida mak ba, nia la hatene, atu kaer ninia Ministeriu ga atu kaer buat boot ne'e, ne'e ita la ba, tamba ida ne'e mak ita boot sira hotu kumprende, imi sei lembra katak, foin dadauk iha Parlamentu ih artigu oitavu ezizi Governu fulan-fulan tenki ba hata'an iha Parlamentu nia halo ona saida, iha fulan tolu-tolu ami haruka, mais agora ne'e fulan tolu tolu sira (PN) sei bolu, imi halo ona saida ba osan ne'ebe ami aprova, tamba sa? Tamba sa? Presiza esplika, presiza atu fo hatene katak membru governu sira tenki loro-loron ne'e hanoin ba saida mak atu halo ba aban no ohin ne'e halo ona saida? la'e ita maka hean hela, hean...hean....hean maibe ro mos la mai iha tasi ibun, ro mos la ba tasi laran hena hela, ita nia problema ita nia frakeza iha estadu ne'e sei hanesan ne'e, iha mos membru do governu iha mos administrasaun publiku iha kraik ne'ebe dehan, o la halo hau mos la halo, o manan osan barak liu hau mos la halo, dala ruma mai foun tan entaun o hatene saida, hau iha ne'e tinan 10 ona hau mak liu o, buat sira ne'e hotu. Tamba ida ne'e se hau fo tan ba Ministru ida atu haree ba ida ne'e sei la lao, tamba ida ne'e maka iha ema ida ho esperensia, esperensia iha juridika, esperensia Governasaun, buat sira ne'e hotu mak entrega ho bele lidera hodi reprejenta estadu ba interese nasional tamba ida nenee buat boot ida, Primeira Ves mak ita atu halo, ami mos ba aprenzenta iha Wasintong, ba IMF ami aprejenta, ba mos fati-fatin koalia beibeik, Banku Mundial haruka nia Vise Prezidenti no dehan ami intersante tebes ho imi nia planu foun ne'e, intersante tanba buat foun ba Timor-Leste. 

 Alice Benigna: Intersante liu-liu ba nasaun Vizinu ne'e karik sira fo apoiu masimu ba ida ne'e (ZEESM)? 

 PM Xanana: Hau tenki dehan, iha Xina hau nu'udar Primeiru Ministru hasoru sira, Xina mos intersante ba dezenvolvimentu rai laran, ita iha rai laran mak hakilar malu maibe ema iha rai liur ne'e apresia tamba sira dehan imi foin 12 imi nia hanoin luan tiha ona hanesan ne'e, rai barak tinan 70-80 tiha ona osan barak liu maibe sei nune'e hela de'it, ne'ebe ema apresia ida ne'e, komu sira apresia ida ne'e maka sira konvida, sira konvida atu ba, ba iha Konferensia ASIA ninian, mais komu hau aprezenta iha konferensia Bao ninian, sira halo kedas vizita ofisial ba prezidenti no prezidenti Parlamentu Partidu ne'eba nian e depois mak mai Primeiru Ministru, komu hatene katak, ita atu kria Zona Ekonomia Especial iha Oecuse vizita ne'e haruka ami la'o ba la'o mai ba to'o iha fatin ida ne'ebe sira 20 anos atras mak foin hahu, atu hatudu katak, hare ami 20 anos atras mais ami nia ne'e mamuk, ami kria Zona Espesial Ekonomia imi haree to'o iha ne'eba, ne'e hatudu sira nia interese ba buat ida ne'eba, ba ita nia hanoin luan, sira dehan mai ami katak, barak mai vizita Timor mai koalia no sira dehan ami kongratula imi tamba sa, tamba tinan 12 deit imi nia hanoin ne'e luan. Hau mos ba Prezidenti Republika atu koalia oituan nia dehan nune'e, imi ba, antes hau ba prezidenti hau servisu ne'eba tinan 18, hau hatene, hau hatene ami adopta politika sira hau hatene e depois hau ba Selma, Selma dehan nune'e, imi keta halua Zona Espesial Ekonomia ne'e imi kria, kria ho diak ba, tenki fo benefisiu ba Povu tomak, tuir ami nia hanoin imi iha ona hanoin foun ba dezenvolvimentu, nebee iha interese tebe-tebes husi nasoens sira ne'e, ne'e mak sira hakarak envolve an mos iha ne'e, Banku Mundial mos hakarak fo apoiu, apoiu ne'e la'os apoiu ho osan, apoiu ne'e ho sira nia hanoin nebe agora ita hakarak halo saida ba ita nia rai, nebee iha interese boot tebe-tebes, tamba ida ne'e maka hau dehan katak, buat boot ne'e iha rai vizinhu sira hatene katak sira bele aproveita ou mai investe tamba potensial barak tebe-tebes. 

 Alice Benigna: Liga ba rekursu umanus no mos komponentes estrutura ne'ebe maka toma konta ba iha ZEESM ne'e rasik, hau hanoin kuandu rekursu umanus la sufisiente ital abele halo buat ida, Senor Primeiru Ministru, oras ne'e dadaun saida mak Governu hala'o hodi prepara ita nia rekursu umanus ne'ebe sustentavel atu responde preokupasaun ne'e? 

PM Xanana Gusmao: Agora vem, kona ba ida ne'e atu dehan uluk nune'e agora ita hanoin katak lansa primeira pedra ne'e buat ne'e hahu ona, la'e, ne'e sei iha faze ida ita atu monta uluk infraestrutura balun, tamba sa, hau fo ezemplu deit, uluk kuandu temi ema hotu hakilar kona ba eletrisidade, agora simu tiha ahi obrigadu de'it mos laiha. Ba investimentu atu tama iha ita nia rai, atu iha industria, atu iha turizmu, atu iha buat seluk, infraestrutura bazika laiha ema la tama, tamba ida ne'e maka hau hare katak, buat ida eletrisidade ne'e sei buat ida ke kumpleksu oituan, la'os hanesan estrada nebe ita halo, ne'e mak hahu uluk aposta iha eletrisidade, eletrsidiade ne'e la'os atu fo deit ba populasuan sira maibe atu fo ona konfiansa ba industria sira, turizmu atu iha tenki iha ahi, depois estrada, depois bee, buat tolu ne'e mak importante. 

Alice Benigna: Mezmuke tarde maibe ita hatene katak projeitu ZEESM ne'e sei implementa maibe mosu preokupasuan balun ne'ebe hanesan kapasidade emprezariu Timor-oan, oinsa obnservasaun Governu nian rasik ba iha kapasidade atu kompete ida ne'e? 

PM Xanana: Bom, hanesan mos iha Suai sei involve sira, ita dala ruma hakarak entrega karik ne'e ita lao oituan tamba difikuldade boot iha ita nia emprejariu sira mak jestaun, se hau hakarak kompara husi 2007 mai iha ne'e balun seidauk hatene hadia, balun hadia dadauk ona, balun baruk oituan, balun sei fraku, karik ida ne'e atu dehan loloos tenki iha formasaun manajerial ba emprensa sira, mais hau hare hanesan ita dehan karik perkembangan dezenvolvimentu iha ona, sinais pozitivu maske seidauk to'o 100%. 

Alice Benigna: Karik Governu bele ajuda emprejariu Timoroan, karik tamba kapasidade finanseiru la to'o? 

 PM Xanana Gusmao: Ne'e los, hau rai osamentu tinan ida ne'e hau nia idea atu tau kedas ona kinentus miloens dolar Amerikanu, pois hau koalia ho eis Primeiru Ministru Mari Alkatiri no ami koalia tun koalia sa'e nia (Mari) dehan prepara uluk lei, nia dehan se o tau tiha ne'eba lei laiha mos ita la book. 

Alice Benigna: Liga Oituan ba aspeitu legal, saida mak atu garante se enkuantu lei ne'e rasik seidauk iha, saida mak atu garante atu investidor sira ne'e bele mai investe, liu-liu projetu ne'e hahu implementa iha baze? 

PM Xanana Gusmao: Semana kotuk ami halo reuniaun ida iha Konselu Ministru mais ami ho konkluzaun katak, diak liu ami halo lei, ami kontaktu ona ho Parlamentu Nasional, halo tiha lei kona ba ida ne'e hodi aprova lalais tiha depois husi lei ne'e maka ami kaer halo fali dekretu lei ida, sira prepara hela iha semana mai ne'e ami sei enkontru iha Konselu Ministru hodi ba Parlamentu Nasional halo debate. 

Alice Benigna: Senor Primeiru Ministru, Projeitu ZEESM ne'e la'os rojeitu pilotu aliende iha hanoin ida atu implementa projeitu ne'e iha ZEESM, se karik periode tuir mai ne'e Distritu ne'ebe mak sei hetan oportunidade, katak Atauro mos tama iha planu ne'e? 

PM Xanana Gusmao: Atauro Sim, tamba ne'e mak iha ita nia konstituisaun dehan nune'e, Artigu iha hau (Xanana) haluha tiha ona maibe iha ne'ab dehan devizaun administrative ita nia rai, ita nia estadu iha kompetensia ona atu haree ba extra-ordinariu ba iha ida ne'e, pais tomak, ba Atauro ho Oecuse ne'e mak especial, ne'e mak ohi hau temi atu haree mos ba Atauro, Atauro la'o hanesan ne'e, Atauro iha oituan de'it e Atauro ne'e ita atu aproveita ne'e aproveita ba turizmu, depois ida ne'e mos Senor Mari Alkatiri sei tau matan ba Atauro, iha fatin seluk ita la'o neineik, mais lao neineik ne'e hare tuir ba iha potensial kada reijaun ninian. 

 Alice Benigna: Ikus liu, Senor Primeiru Ministru, durante loron hirak ne'e tuir observasaun, Senor Primeiru Ministru rasik mai iha ne'e, hala'o enkontru ho lia nain sira depois iha tempu badak ami mos rona informasaun enkontru mos ho membru Governu tomak inklui Eis Primeiru Ministru Mari Alkatiri, ne'e tamba saida? 

PM Xanana Gusmao: Hau atu dehan de'it ZEESM hodi mos oportunidade atu mai hatudu ba Oecuse katak, ne'e la'os Governu nian de'it, ne'e la'os Partidu ida nian, ne'e estadu ninian atu hahu buat importante tebe-tebes, agora mos atu koalia buat ida, tamba tinan mai 2015 ami mai koalia mos kona ba preparasaun ba 2015 nian, tamba ne'e mak hare hotu tiha Master Plan ne'e saida mak atu prepara to'o 2015 ema barak atu mai ne'e bele kumpletu ona, ida ne'e mak ami mai Oecuse, seidauk iha rejolusaun ami sei halo rejoluzaun, sira mos propoin hau sai Prezidenti Komisaun Organizadora ba 2015, Senor Mari Alkatiri Prezidenti ZEESM ho tan Oecuse nia oan sira para membru grovernu sira mai hare dehan katak, sim iha Master Plan ne'e la'os atu dehan ba hare fali estrada Oesilo, laos atu ba hare fali Ponte, lae, mais se 2015 atu selebra iha ne'e infraestrutura bazika sei nesesariu saida? Estrada, Aeroportu ida ne'e mak atu desidi hodi fo hatene ba ema hotu katak, tenki hahu ona para to'o 2015 bele hotu atu selebrasoens ne'e bele sai diak. 

Alice Benigna: Obrigado barak ba Senor Primeiru Ministru nia marka prezensa hodi dada lia ho ami. 

PM Xanana Gusmao: Obrigado mos ba ita (Jornalista TVTL) ne'ebe mai dada lia to'o Lifau.
.

Sem comentários:

Publicar um comentário

Nota: só um membro deste blogue pode publicar um comentário.