quarta-feira, 18 de junho de 2014

HAMOSU NOVA LIDERANSA ESTADISTAS (negarawan) HODI HAMETIN ESTADU DE DIREITU DEMOKRATIKU

.
Renato " Apa Sege" Costa
Husi:  Renato “Apa Sege” da Costa Membrus komisaun Ezekutivu BN/BRITAS

“NOVA LIDERANSA” hodi hamosu estadistas nebe diak atu kuntinua kaer ukun hodi hametin estadu de dereitu demokratiku iha futuru oin mai sai fenomenu sosial nebe mak presiza konseitu universal tuir kontekstu Timor nian. Normalmente praktika atu ezekuta servisu hodi hametin NOVA LIDERANSA ho ninia pensamentu tomak nudar pakote integradu nebe involve partes hotu.

Hanoin mos katak, pensamentu NOVA LIDERANSA nudar karateristika uniku nebe hakarak promove linha transferensia husi lideransa atual ba lideransa foun, hodi kuntinua asegura estadu de dereito nudar estadu nebe mak komunga pensamentu unidade nasional hodi harii estadu solidu, soberanu no demokratiku.
Refere ba iha hanoin atu hamosu NOVA LIDERANSA, hodi aprende husi esperensia pasadu no ohin loron nebe mak atraves husi lideres karismatiku nasaun nian hanesan, Kay Rala Xanana Gusmao no lideransa istoriku sira seluk, sai fenomenu nebe obriga ema hotu hotu iha paises ne’e atu fo ninia kontribuisaun no hanoin kona ba tipu ho karateristiku NOVA LIDERANSA nebe mak Timor-Leste presiza.

Rekunhese katak, konstrusaun estadu nebe efikásia kona ba rekursus humanus atu sai NOVA LIDERANSA, laos kestaun ema ida ka rua nian, maibe nudar problema nasional nebe presiza entidades hotu nia hanoin hodi hamosu plataforma nasional, kona ba karateristiku NOVA LIDERANSA nebe mak atu kaer ukun iha futuru Timor Leste nian nudar parte integradu hodi hametin instituisaun estadu.

Ho hanoin ida katak, prepara NOVA LIDERANSA nudar fatores importante hodi suporta lideres tuir mai nebe bele hamosu efikásia , vizaun nebe klara, realista no akuradu kona ba saida mak sira atu halo iha futuru. Vizaun nebe akumuladu husi esperiênsia ho nia konfiansa ba ninia rezistênsia, no mos valor nebe mak atualmente NOVA LIDERANSA atu implementa iha sira nia atividade loron loron, sai sasukat hodi hatene ho diak maneiras lideransa nebe mak Timor-Leste sei hetan. Dalabarak, líder sempre iha objeksaun ba vizaun ho nia propózitu espesífiku. Tamba, úniku líder vizioner mak bele fo rezultadu ekselentes ba ninia kareira lideransa ne’e rasik husi plataforma politika kona ba karateristika no tipu NOVA LIDERANSA versaun Timor Leste nian.

Karateristiku NOVA LIDERANSA tenki lider nebe iha kreatividade no revoluzionárias, barani foti desizaun ho radikalmente hodi halo sai diak liu ho rápidu. Nudar pais nebe hetan nia ukun rasik an liuhusi prosesu nebe naruk, Timor-Leste presiza líder nebe iha empatia ho problemas nebe povu infrenta, laos deit apenas simpátiku. Líder laos deit kumpriende no hatene deit sofrimentu ninia povu, maibe hakarak atu disposta ninia sofrementu ho povu. Líderes tenki servisu ho fuan tamba povu nudar partensia husi lider nia liman no ain nebe merese atu hetan protesaun husi ninia lideres refere.

Husi redasaun badak nebe mak hanesan fo sai iha leten, hatudu katak desde Timor Leste sai país independente hahu’u husi 1999, akontese tiha ona regenerasaun kona ba lideransa tantu iha eskala rejional no nasional. Maibe, tambasa mak to ohin loron iha Timor Leste, liu liu jerasaun foun sira seidauk hetan líder nebe estadista hanesan lideres karismatiku balun nebe mak sei moris to ohin loron. Tamba Líder estadista nudar lider nebe mak koloka nia an ho diak iha komunidade nia let, líder nebe luta ba ninia povu ho fuan verdadeiru hodi haluhan tiha ninia ambisõens pessoais.

Konseitu Universal kona-ba Líder vizionáriu estadista hateten katak nia senti nia an kik kuandu preokupa ho nia problemas nebe mak dok husi valores profétikus,hanesan estratéjia atu halo kampanha, tátika hodi hadau poder liuhusi kualker meiu, eleva reputasaun pessoal hodi manten nia poder iha prósimu mandatu mai. Atensaun husi lider vizionáriu estadista mak líder nebe konstrui baze moris ho justu nebe loke asessu ba grupus sosiais ho nia kamadas hotu. Lider estadista normalmente nudar ema polítikus ida nebe inisialmente transforma ninia konsiênsia ideolójika hodi sai líderes nasaun nian nebe lahare ba ameasas no barreiras polítiku nebe mak iha.

Estadistas nebe mak diak nia sempre hasoru dezafiu nebe bo’ot kuandu nia hakat ba oin hodi transforma nia an sai husi baze polítika partidu nian, no dezafiu própriu sempre mai husi ninia grupu. Imajina tok dezafiu nebe mak estadista ne’e tenki hasoru wainhira nia sai lideres nasaun nian tamba apoiu husi ninia partidu no to ikus mai nia husik hela interese partidu nian hodi fo fatin ba grupu hotu.

Tamba ne’e, atu transforma an sai estadistas nudar dalan nebe étikus no nakonu ho ameasas. Ho nia dezafiu nebe bo’ot tamba tenki barani sakrifika nia an husi aspeitu nebe mais elementar,la tuir linha nebe mak antes ne’e iha tiha ona no rezisti hodi kontra vontade husi ema nebe besik liu nia an. Iha Encyclopaedia Britannica, estadista konsidera nudar pessoal úniku nebe iha esperensia ho nia prinsípius governansa nian .Hodi konsidera mos katak estadista nudar líder nebe sábiu , ábilidade, no líder polítiku nebe mak hetan apresiasaun .

Tuir Rufus Fears (Historiador Americano) nebe fo sai husi Brett & Kate McCay , 2012 iha ninia livru The 4 Qualities of a True Statesman , hateten katak atu sai estadista verdadeiru tenki prense rekezitus hanesan prinsípius nebe forte , moral nebe testadus tebes, vizaun nebe klaru no kapasidade hodi konstrui konsensu hodi alkansa vizaun nebe mak iha. Rekezitus kona-ba kapasidade hodi konstrui konsensu , nudar rekezitus nebe uniku hodi halo diferensia entre estadista ho polítikus. Polítikus bele iha prinsípius , moral no vizaun maibe nia laiha kapasidade hodi mistura konsensu. Estadistas bele halo mudansa polítika ho maneira atu implementa nia polítikas , maibe nia nunka atu lao sai husi nia prinsípius nebe atu realiza ba tempu naruk.

Diferensia ho pessoal polítiku sempre tenta atu satisfa ho nesessidade nebe mak iha ba ninia konstituintes sira. Nia halo asaun ruma sempre refere ba iha aspirasoens ninia povu. Estadista, tuir Fears nia analiza katak ,nia halo buat ruma bazeia ba ninia hanoin kona ba saida mak los no laos bazeia ba opiniãun públika . Vizaun estadista klaru los kona-ba oinsa atu jere estadu no ninia povu hodi hakat ba oin. Nia hatene ho nia deseju tomak kona-ba oinsa atu lori nasaun ne’e hakat ba on tuir mehi nebe mak iha.

Wainhira halo konsensu ho nia kondisaun tomak, estadistas lidera ninia povu atu bele lao tuir ninia idéias. Diferente ho polítikus nebe depende ba publisidade ho propaganda nebe mak iha , tuir Fears metodu ne’e ho naran " instrumentus tiranus " . Estadista balun hanesan Lincoln presidente Estados Unidos ba dala 16. Depois asumi nia knar nudar Presidenti, guerra sivil entre estados Norte no Estados Sul akontese iha 1860. Maske la gosta funu, nia simu realidade ne’e nudar maneira únika hodi salva unidade Estados Unidos. Iha situasaun funu nia laran, presidente Abraham Lincoln emitiu proklamasaun libertasaun nebe afeta tebes ba povu Estados Unidos. Kuntiudu husi Proklamasaun ne’e hateten katak eskravus hotu nebe hela iha partensia husi paises ne’e hodi funu kontra Estados Unidos sei livre hahu’u 01 Janeiro 1863. Deklarasaun ne’e hamosu vontade husi ema hotu nebe luta ba liberdade, no sai sentidu abolisaun kona ba eskravidaun iha Estados Unidos. Ho deklarasaun ne’e Lincoln hetan konsiderasaun masimu nudar estadistas mais infleunsia iha vida luta história Amerikana nian.

Iha fali Reinu Unidus, Sir Winston Leonard Spencer-Churchill, nebe kunhesidus ho naran Winston Churchill, Primeiru-Ministru Reinu Unidu iha 1940-1945 no kuntinua fali asumi nia kargu hanesan Primeiru Ministru iha 1951 - 1955 halo revolusaun bo’ot ba povu Reinu Unidus. Maske hetan kritika tamba ninia konselhu kona ba imperialismu, nia konsege konvense povu Britânicu katak imperialismu to ikus sei liberta populasaun husi kolônia hodi lori povu avansa ba dezenvolvimentu ho nia liafuan,”Hau laiha buat ida mak bele oferese além ran, servisu nebe duro, mataben no kosar ben.Tamba ne’e,ita sei defende ita nia ilha, ho kualker maneiras, ita sei funu iha tasi ibun,ita sei funu iha desembarke,Ita sei funu iha kampu no dalan ninin, ita sei funu iha foho leten no ita nunka atu rende”.

Husi Afrika do Sul, Nelson Mandela heroi bo’ot apartheid nian sai Prezidenti dala ida deit iha ninia kareira politiku.Ho nia karisma no poder nebe mak iha,nia bele sai Prezidente to periodu hirak tuir mai tamba konstituisaun la defini ida ne’e.Maibe nia asumi deit kargu nudar presidenti dala ida deit iha ninia vida tomak.

Nia fo liu importânsia kona ba regenerasaun hodi hamosu líderes foun ba povu Afrikanu. Mandela sai ema nebe ekstraordináriu iha ninia kareira politiku hodi kuntinua halo kampanha kontra AIDS iha mundu tomak to tinan 2004. "Kuandu nia sai husi prizaun, povu Afrika deskonbre katak Mandela sei sai esperansa bo’ot ba buat nebe mak sira hakarak. Mandela ema estadista nebe mais admiradus no respeitadus iha mundu ohin loron” hateten Prêmiadu Nobel da Paz arcebispo Desmond Tutu.

Iha India, Mahatma Gandhi sai estadista verdadeiru ba povu India nian.Tamba kuaze iha ninia vida tomak nia dedika nia an ba independência Índia nian. Nunka desezu atu sai Prezidente ou Primeiru-Ministru maske partidus barak mak suporta nia no nia kuntinua halao nia moris ho simplis. Gandhi kunhesidus ho ninia palavra luta mak:Ahimsa, Hartal,Satyagraha no Swadeshi.

Ba Timor Leste, Kay Rala Xanana Gusmao konsidera ona mos nudar estadista bo’ot nasaun nian nebe mak povu Timor hetan iha tempu ida agora. Ho nia simplisidade no karisma nebe mak iha, Xanana hatudu nia komprimisu bo’ot ba luta libertasaun ninia patria no kuntinua ba ninia povu, hodi lahare ba kores partidus politiku no ninia partisipasaun ba luta pasadu husi ema idak idak hodi tama iha ninia governasaun. Ho nia firmeza nebe mak iha,Xanana forte iha ninia komprimisu rasik hodi bolu hikas Timor oan sira nebe mak moris iha Timor Osidental atu bele mai hamutuk harii Timor-leste nia futuru, maske iha kritikas makas husi rai laran ba ninia komprimisu politiku ne’e. Xanana mos ho barani hodi hakotu diferensia politika pasadu iha Fretilin nia laran, hodi lao hamutuk ba dezenvolvimentu Timor Leste nian hodi involve lideres Fretilin sira asumi kargu importante iha prosesu konstrusaun dezenvolvimentu Timor Leste nian.

Ikusliu, Timor-Leste sei bele hetan estadista iha futuru ida nebe maduru iha ninia asaun no planu ho firmeza wainhira lideres istoriku sira hatur hela paradigma konstrusaun estadu ho dalan nebe los liuhusi demokratizasaun nebe involve ema hotu hotu, hodi bele hamosu lider estadista nebe badinas, neon nain no laran luak iha ninia planu no asaun loron loron. Tamba mundu globalizasaun nebe mak ohin loron iha hamosu dezafios sosiais nebe kompleksus, evolusaun teknolojia no mudansas ambientais signifika katak mundo ohin loron mais interdependentes.

Nova lideransa nebe estadistas presiza hatene ho imediatas nesesidades loron loron hodi hare nesessidades ba futuru oinsa atu bele rezolve. Sira presiza servisu ho partes interessadas hotu ho maneiras ba longu prazu hodi bele hetan solusoens inovadoras nebe benefisia ba ema hotu. Ita hotu hein ho esperansa bo’ot hodi hetan fali lideres estadistas ida nebe mak iha ninia domin ba povu hodi haluhan tiha ninia ambisaun privadu hodi hariku nia an wainhira Xanana rezigna an. Lideres estadista versaun Timor Leste nian sei bele mosu mai publiku wanhira nia hetan apoiu husi natureza no laos produtu husi makina ambisaun politika grupu nian.
.

Sem comentários:

Publicar um comentário

Nota: só um membro deste blogue pode publicar um comentário.