segunda-feira, 16 de junho de 2014

"La Sama Husu MP Deklara Kazu Korrupsaun Ho Evidensia"

.

Jornal Independente - Segunda-Feira, 16 Junu 2014 

Vise Primeiru Ministru, Fernando La Sama de Araujo, husu ba Ministeriu Publiku atu fo sai informasaun loloos ba publiku bainhira koalia kona ba kazu korupsaun ne'ebe deskonfia membru Governu balun envolve atu nune'e la afeta ba ema nia naran diak. 

Kestaun ne'e, Vise Primeiru Ministru La sama dehan hodi responde ba deklarasaun ne'ebe mak hato'o husi Prokurador Jerald a Republika (PJR) Jose Ximenes iha semana ida liu ba katak, MP identifika ona membru governu balun envolve iha aktu krime korrupsaun no mal-administrasaun. 

PJR mos informa katak, MP komesa deteta ona membru Governu balun halo uma iha Bali-Indonezia uza osan povu nian. Nia husu ba membru governu sira ne'e atu prepara aan didiak hodi hataan iha Tribunal iha tempu ida. 

Hataan ba deklarasaun hirak ne'e, Vise primeiru Ministru La Sama dehan, MP tenke analiza didiak lai no halo verifikasaun ida klean kona ba deskonfia sira ne'e, tanba ne'e hamonu privasidade ema nian. 

 "Hau hanoin verifika uluk lai ba, 'mendekati kebenaran' ba mak koalia ba publiku, tanba buat ne'e afeta ema nia "harga diri" no ema nia "nama baik", orsida hau mos lao ofendidu, tanba dehan membru governu sira orsida hau mos lao stress dehan katak hau mos uma iha Bali, iha Jakarta ne'eba," dehan La Sama, iha aeroportu Internasional Nicolau Lobato Komoro, sesta (13/6). 

La Sama dehan, prosesu lei ne'e tenke la'o hanesan ne'e, tanba ne'e nia husu ba parte MP atu halo investigasaun ida klean uluk lai, depois mak kuandu identifika ona tenke buka prosesu para hatene. La Sama rekonese katak, Timoroan balun halo iha rai liur, hanesan Indonezia, Australia no Portugal, maibe la signifika osan ne'e mai husi korupsaun. 

"Karik nia fa'an nia rai mak lori sosa uma, ne'e direitu ema nian, maluk sira balun, la'os membru Governu de'it, maluk sira balu-balun mos iha uma iha liur, karik bolu membru Governu mak nia sosa uma ne'e direitu privadu ema ne'e nian," dehan nia. 

"Se iha duni indikasaun tenke buka atu berifika didiak uluk lai katak osan ne'ebe mak uza sosa no halo uma ne'e osan privadu ka osan husi ne'ebe, se osan ne'e mak mai husi faan karau ka fa'an avo sira nia osan mean karik lori halo uma ida, ita nia lei mos la bandu katak, ema seluk mos bele mai halo uma iha ne'e, aluga ita nia rai hodi halo uma, ne'e iha Timor mos iha direitu atu ba halo uma iha ema nia rain."
.

Sem comentários:

Publicar um comentário

Nota: só um membro deste blogue pode publicar um comentário.