sexta-feira, 27 de junho de 2014

"Livre Kontaktu, Governu Deve TT Millaun $8"

.

Jornal Independente -Sesta-Feira, 27 Junu 2014 

Governu Timor-Leste deve Timor Telecom (TT) nia osan hamutuk millaun $8 resin tanba de'it uza telefone livre. Tusan ne'ebe mak Governu deve husi TT ne'e hahu husi mandatu Governu Aliansa Maioria Parlamentar (AMP) to'o ohin loron iha mandatu Governu Bloku Koligasaun (BK). 

 Relasiona ho tusan TT nian iha Governu hamutuk millaun $8 ne'e, Bancada FRETILIN liu husi nia Vise Prezidente, Deputadu Francisco Branco iha Uma Fukun Parlamentu nasional preokupa tebes. 

Tanba tuir deputadu ne'e katak, Governu la'os atu halo tusan de'it ba iha projeitu sira maibe governu mos halo tusan ba TT. "Tusan ne'e Governu mak halo ba TT besik millaun $8, ida ne'e mak bancada FRETILIN preokupa loos, afinal la'os tusan sira seluk deit hanesan tusan projeitu emerjensia, tusan barbarak losos, maibe tusan mos ba uza telefone ne'ebe livre," hateten deputadu Branco iha PN, (25/6). 

Branco dehan, tusan ne'e akontese tanba servidor estadu sira uza telefone deskontroladu. "Ohin loron deskontroladu tomak, ema hotu-hotu uza telefone livre atu komunika ba malu, ita konkorda membru Governu sira presiza, inklui diretor sira mos presiza, maibe laos atu uza narnaran de'it, ema ida bele uza telefone ne'ebe free purke se lae ema abuza," dehan Branco. 

Nia fo ezemplu, membru Governu ida iha direitu ba telefone livre, maibe lori ba uma depois too iha uma nia rai hela bele uza livre no impaktu mak osan selu saugate deit, ida ne'e mak akontese tanba deskontroladu total," tenik Branco. 

Nia dehan, tuir loloos, atu uza telefone gratuitu tenke sentraliza fila fali iha Ministeriu Finansas (MF) hodi regulariza no estabelese regra ne'ebe mak bele kontrola, se mak bele kaer telefone gratuira, no se mak labele kaer no iha direitu osan hira. Bainhira Ministru no Sekretariu estadu ida no diretor ida kuandu nia mandatu remata tenke para ona uza telefone livre ne'e," dehan Branco. 

"Ema servidor estadu ne'e, dezempena ona iha mandatu automatikamente para kedan, agora razaun mak ema balun sai tiha ona mos sei uza nafatin telefone livre," tenik nia. 

Tuir Branco, haree ba asuntu ida ne'e, PN sujere ona ba MF atu buak maius selu tusan ne'e. "Ami hateten, halo nusa-nusa mos Governu tenki buka dalan ida atu selu tusan ida ne'e tanba TT, alende estadu TL sai hanesan asionista no ita nia Timor-oan servisu iha ne'eba nain 1.800, ne'e duni Governu liu husi MF tenke buka halo oinsa bele selu tiha, prioridade selu uluk mak porsentu 50," tenik Bianco.
.

Sem comentários:

Publicar um comentário

Nota: só um membro deste blogue pode publicar um comentário.