sexta-feira, 13 de junho de 2014

"Loron 12 Setembru TDD Kontinua Julga Eis ME Joao Cancio"

.

Jornal Independente - Kinta-Feira, 12 Junu 2014 

Tribunal Distritu Dili (TDD) ajenda ona orariu julgamentu ba Eis-Ministru Edukasaun (ME), Joao Cancio Freitas, ne'ebe deskonfia komete krime antisipasaun no Ekonomiku Negosiu relasiona ho fornesimentu material Televizaun Edukasaun (TVE), iha tempu Kuartu Governu Konstitusional. 

Ofisial Justisa iha Tribunal Distritu Dili (TDDIL) ne'ebe lakohi fo sai nia naran hateten, Tribunal Distritu Dili ajenda julgamentu ona ba Eis-Ministru Joao Cancio ba loron 12 Setembru 2014, tuku 09:30 Oras Timor-Leste (OTL). 

"Oras ne'e daudaun parte Tribunal, advogadu no arguidu nian esforsu hela buka testamunha nain rua (2) ne'ebe seidauk hetan nia paradeiru," dehan nia, iha Tribunal Distritu Dili, horsehik. 

Antes ne'e, iha loron (3/6/2014), Tribunal Distritu Dili deside adia julgamentu ba Eis-Ministru Edukasaun (ME), Joao Cancio Freitas, tanba sasin sira la marka prezensa iha julgamentu ne'e. Tanba ne'e, TDD fo loron lima (5) atu notifika testamuna nain rua (2) ne'e. 

Advogadu Arlindo Dias hatete, julgamentu ne'e adia fali, tanba testamuna ne'ebe ba sira ne'e importante ba kazu ne'e la marka prezensa no oras ne'e iha Australia. 

Audensia julgamentu ne'e prezide husi Juis koletivu Julio Gantes, Jose Maria de Araujo no Francisca Martins, Ministeriu Publiku (MP) aprezenta husi prokuradora Gloria Alves, no arguidu hetan asistensia husi akipa advogadu ho naran SJG ne'ebe kompostu husi defensor Publiku Manuel Sarmento, advogadu Privadu, Jose Guterres no Arlindo Dias.
.

Sem comentários:

Publicar um comentário

Nota: só um membro deste blogue pode publicar um comentário.