quarta-feira, 4 de junho de 2014

Odamatan Ba Remodelasaun Nakloke; "Alkatiri Sujere Troka MNEK no Ministru Balun"

.

Jornal Independente - Kuarta-Feira, 04 Junu 2014 

Eis Primeiru Ministru Mari Alkatiri sujere ba Primeiru Ministru Xanana Gusmao atu troka lider Ministeriu Negosiu Estranjeirus Kooperasaun (MNEK) no Ministru balun ne'ebe halo viazen ba estranjeiru la para no laiha kooperasaun servisu diak. 

Tuir Alkatiri katak, Ministeriu Negosiu estranjeiru no kooperasaun hanesan agora dadauk ne'e la serve, tenki iha dinamika foun. 

"I la'os MNEK mesak de'it, porque CPLP ne'e la'os halo de'it relasaun negosiu estranjeiru nian, maibe CPLP ba Edukasaun, saude, Forsa armadas no CPLP ne'e hotu, Sekretariu Estadu hotu-hotu tenke funsiona diak liu," hateten Mari Alkatiri iha Aeroportu Internasional Nicolau Lobato, Komoro horsehik. 

Tuir planu, iha tempu besik nia laran Primeiru Ministru Xanana Gusmao sei halo retiru ida iha Sub Distritu Maubara, Distritu Likisa hamutuk ho nia membru V Governu konstitusional tomak. 

"Retiru iha Maubara, hau la'os membru Governu, hau laos Xefe do Governu i hau lahatene, hau retira mak ba Oekusi, maibe hau rona dehan atu retiru ida iha Maubara, mas prontu, hau hakarak dehan deit katak hau retirada husi Dili hau ba Oekusi," dehan Alkatiri ho hamnasa. 

Alkatiri esklarese katak, retiru iha Maubara ne'e posiblidade no pozitivu sei akontese duni, tanba ne'e tenki halo duni remodelasaun ba estrutura Governu ne'ebe mak bokur demais liu. 

"Hau rona ona, no tenki halo duni, se ita hakarak atu prejidi no Prezidenti ba CPLP durante tinan rua no hakarak CPLP ne'e iha dinamika foun tenki iha remodelasaun," dehan nia. 

Planu atu halo retiru iha Maubara ne'e rasik, antes ne'e PM Xanana hamutuk ho eis Primeiru Ministru Mari Alkatiri deklara no hato'o ona ba iha membru governu sira bainhira partisipa iha serimonia kultura ba Planu Zona Espesial Ekonomia Sosial no Merkadu (ZEESM) iha Oekusi fulan Marsu liu ba. 

Iha Oekusi, PM Xanana ne'ebe hetan akompania husi eis PM Mari Alkatiri tatoli ba membru Governu sira ne'ebe mak iha momentu nee hola parte iha enkontru ida iha Otel Inur sakato katak, "Lalika hirus, lalika tanis, labele laran moras bainhira imi nia naran tama hotu iha lista atu hetan remodelasaun,". 

 Tan ne'e, eis Primeiru Ministru Mari Alkatiri bainhira atu hala'o viazen ba Guine Bissau, iha Aeroportu Internasional Nicolau Lobato hatete, tuir nia observasaun durante ne'e hafoin V Governu Konstitusional, membru Governu sira la hatudu sira nia prestasaun servisu ne'ebe diak atu hadia povo no nasaun ida ne'e nia vida moris. 

Alkatiri dehan, problema barak durante ne'epovo infrenta hanesan kona ba infra-estrutura, saude, edukasaun, ekonomia no seluk tan, maibe husi loron ba loron problema hirak ne'e membru Governu sira nunka atu fo atensaun seriu. 

"Hau dehan katak Ministeriu boot rua, ita nia atensaun boot liu ne'e fo ministeriu rua, kuandu sala oituan ita dehan kedas, mas kuandu iha uma bee mos laiha mas adavezes ita la hatene," hateten Alkatiri. 

Tanba ne'e Alkatiri dehan, Governu tomak ne'e tenki servisu hamutuk, saude atu diak halo nusa mas iha uma labarrik sira hemu bee foer, sistema saude ne'e biar diak halo nusa mos sei la augenta. 

Agora, Governu tomak ne'e mak funsiona la diak, no ida-idak halo konforme nia hakarak, laiha integrasaun no laiha servisu hamutuk ne'ebe diak. 

Nune'e, eis Primeiru Ministru ne'e mos lamenta ho atividades viazen ba estranjeirus husi membru Governu sira ne'ebe barak liu do ke rezultadu servisu. Alkatiri dehan, durante ne'e partidu Opozisaun sempre halo kritika ba servisu membru Governu sira nian, maibe membru Governu sira rona kritika hirak ne'e tama husi tilun loos sai fali husi tilun karuk. 

 Iha semana hirak liu ba, bainhira marka mos prezensa iha seminariu ida ne'ebe koalia kona ba rezultadu ezekusaun orsamentu jeral estadu (OJE) 2014 ba primeiru trimestre ne'ebe mak realiza husi Ministeriu Finansas (MF) iha Timor Plaza, PM Xanana sente triste ho prestasaun servisu husi membru governu sira ne'ebe mak kontinua lahatudu nia rejultadu ne'ebe diak. 

PM Xanana dehan, rezultadu ezekusaun OJE husi membru Governu sira iha periodu primeiru trimestre foin mak atinji porsentu 15, ni rezultadu ezekusaun iha porsentu 15 nia laran ne'e maioria barak liu husi viazen estranjeiru no Distritu maibe rejultadu servisu kiik tebes. 
.

Sem comentários:

Publicar um comentário

Nota: só um membro deste blogue pode publicar um comentário.