quinta-feira, 5 de junho de 2014

"Osan Lakon Iha Gaveta Deputadu PN"

.


Jornal Independente - Kinta-Feira, 05 Junu 2014

Deskonfia entre reprezetante povu iha Parlamentu Nasional hana'ok malu osan, Kamera CCTV konsege deteta na'ok teen ne'e foti osan iha deputadu ida nia gaveta laran.

Deputadu Manuel Guterres husi bancada CNRT rekonese katak, nia osan ne'e lakon duni fulan Abril liu ba, maibe kestaun ne'e lakohi levanta iha plenaria tamba nia konsidera la dun importante atu deskute. Maibe, deputadu husi Bancada FRETILIN, Manuel Gaspar sente preokupa, tan ne'e, nia levanta iha plenaria no husu meza atu halo klarifikasaun loloos.

Tuir nia katak, dala ruma osan lakon iha sala plenaria PN no bele halo deputadu ho deputadu duun malu no funsionariu tekniku sira ne'ebe mak servisu iha sala lenaria mos tauk.

"Hau preokupa ba naran diak ba PN nian no ba ita hotu inkluidu Prezidenti PN rasik no ba ita nia komponente iha Parlamentu uma fukun ida ne'e," dehan nia iha plenaria PN, tersa (02/06).

Tuir informasaun ne'ebe diariu ne'e asesu iha Parlamentu nasional katak, Deputadu Manuel Guterres nia osan lakon kuaze hamutuk rihun $3 Dolar Amerikanu.

"Hau rona mos lamentasaun pvu nian ne'ebe mak dehan katak, se ita boot sira ba iha ne'eba loron kalan hakilar malu jestaun no mal-administrasaun Governu nian maibe ita boot sira nia iha ne'eba ne'e akontesementu ne'ebe mak naok osan iha imi nia fatin rasik," dehan nia.

Responde ba kestaun ne'e, Deputadu Manuel Guterres (vitima) husi Bancada CNRT esplika, akontesementu ne'e loos duni no akontese iha loron 7 fulan-Abril, maibe to'o ohin loron nia seidauk aprezenta kazu ne'e ba oin no nia la hanoin kazu ne'e atu lori ba oin.

"Komu hau nia dekluidu ida mak akontese entaun ho haraik an tomak hau husu deskulpa bah au nia kolega deputadu no deputada sira inklui ba funsionariu sira ne'ebe mak hala'o knaar iha sala plenaria ida ne'e," nia dehan.

Nia dehan, osan ne'ebe lakon iha sala plenaria PN ne'e nia nunka duun ba ema ida tantu funsionariu no deputadu sira. "Iha momentu ne'eba hau seidauk duun ba ema ida no hau nein duun ba funsionariu no ba kolega deputadu sira," tenik nia.
.

Sem comentários:

Publicar um comentário

Nota: só um membro deste blogue pode publicar um comentário.