terça-feira, 3 de junho de 2014

"PD-FRETILIN Hakarak Revee Lei Pensaun Vitalisia, CNRT Sei Pasivu"

.

Jornal Independente - Tersa-Feira, 03 Junu 2014 

Bancada Partidu Demokratiku (PD) no Bancada FRETILIN iha uma fukun Parlamentu Nasional konkorda ona atu halo revizaun ba lei pensaun Vitalisia, maski nune'e, Bancada CNRT rasik seidauk foti pozisaun ba asuntu ne'e. Bancada PD, Segunda (2/6) hatama ona proposta alterasaun Lei Pensaun Vitalisia, Numeru 1/2007 no Lei pensaun eis Titular Numeru 7/2007, ba meza PN. 

"Bankada PD hanoin tempu oportunu ona atu halo revizaun ba rejime juridiku ne'ebe kontempla atensaun no regalias sira seluk ne'ebe atribui ba titular no kargu politiku, liliu ba lei pensaun vitalisia," dehan Prezidenti Bancada Demokrata (PD), Maria Lurdez Bessa, iha uma fukun PN horsehik. Tuir nia, regalias oioin ne'ebe atribui iha lei pensaun Vitalisia no lei pensaun Eis Titular fo impkatu Negativu ba Orsamentu Jeral estadu (OJE), liu-liu moris tempu naruk povu nian. 

"Ami hanoin iha faze ne'e orjenti no tempu to'o ona halo revizaun ba diloma sira ne'e," dehan nia. Alterasaun seluk ne'ebe Bankada PD hakarak mak aumenta tempu minimu husi fulan 42 sa'e ba tinan lima (5), inklui mos idade minimu ba benefisiariu sira ne'ebe atu hetan pensaun vitalisia. Iha fatin hanesan, Vise Prezidenti Bancada FRETILIN, Josefa Pereira hateten, proposta lei revizaun husi Bancada PD ne'e diak no oportunu atu halo revizaun ba lei pnesaun mensal Vitalisia ba Eis-Titular sira. 

"Hau la hatene tanba saida, no razaun saida mak uluk iha segunda lezislatura, Bancada FRETILIN hatam ona proposta lei maibe ita nunka tau iha ajenda hodi deskute, ne'ebe agora mak ita foin hakfodak to'o kaduka (invalidu)," nia afirma. Entertantu, membru Brancada FRETILIN, Estanislau da Silva hateten, Bancada FRETILIN mos prepara ona proposta lei ba revizaun pensaun vitalisia, maibe seidauk hatama, tanba presiza asina husi Bancada Parlamentar sira seluk. 

Tanba ida ne'e, Bancada FRETILIN lakohi halo aproveitamentu politika ba kestaun revizaun lei pensaun vitalisia. "Ami nia propsota ne'e sei husu Bancada CNRT no Frente Mudanca asina hotu mak ami hatama ba meza Parlamentu Nasional," tenik nia. 

Maske nune'e, reprejentante povu husi Bancada CNRT iha uma fukun Parlamentu Nasional sei pazivu hela ba asuntu ne'e, Bancada CNRT lakohi atu koalia asuntu ne'e tanba seidauk haree kona ba lei ne'e. 

"Bancada CNRT seidauk hare asuntu revizaun lei pensaun vitalisia, tanba seidauk halo reuniaun no membru Bancada sira," dehan Prezidenti CNRT, Natalino dos Santos. 

Antes ne'e, iha tempu kampania Eleisaun Parlamentar, iha fulan Junnu to'o Jullu 2012, Partidu Politiku hotu-hotu, inklui Partidu hat (4) neebe oras ne'e dadaun hetan asentu iha PN halo promesa ba povu tomak hodi halo revizaun ba lei pensaun vitalisia no eis Titular nu'udar programa perioridade. 

Maski nune'e, hafoin tuur iha kadeira mamar Parlamentu nian besik tinan rua ona, maibe promesa ne'ebe faan ba militante sira ne'e seidauk realiza, agora daudaun foin mak esforsu husi Partidu Demokratiku no FRETILIN ne'ebe sei iha prosesu negosiasaun nia laran. 
.

Sem comentários:

Publicar um comentário

Nota: só um membro deste blogue pode publicar um comentário.