segunda-feira, 2 de junho de 2014

Planu Sosa Kareta BMW Ba Simeira CPLP; "Governu Tenki Deside Dignidade Ho Kondisaun Real"

.

Jornal Independente - Segunda-Feira, 02 Junu 2014 

Diretor Ezekutivu Organizasaun Naun-Govermental (ONG) Luta Hamutuk (LH), Mericio Akara husu ba Governu atu tenki deside nia dignidade nu'udar estadu no realidade kondisaun povu, ne'ebe sei diferensa ho nasaun sira seluk. 

Tuir Planu Governu, iha tempu besik nia laran sei sosa kareta hamutuk unidade 10 husi Indonezia ho marka BMW hodi fasilita simeira Comunidade dos paises da Lingua Portuguesa (CPLP) ne'ebe mak sei realiza iha fulan Jullu 2014. 

Tanba, ta'uk ema bele konsidera ladun etika iha mundu diplomatiku ida nian bainhira oferese kareta prado uzadu. Nune'e, tuir Akara katak, Governu TL tenke deside nia dignidade nu'udar estadu no uma nain ba simeira CPLP ne'e. 

Tanba povu iha TL no povu iha nasaun sira seluk sira nia nesesidade baziku rezolvidu ona, hahu hanoin sira nia dignidade nu'udar nasaun no konsiderasaun ne'e tama ona iha kategoria sira ne'e. "Tamba ne'e mak hau nia hanoin ita nia Governu mak tenke tetu de'it ho bijaksana ida ne'ebe mak diak liu, ita sai uma nain ba simeira CPLP ho saida mak ita iha (apa adanya) ka ita modifika ita nia realidade agora sai hanesan mos iha nasaun seluk," hateten Akara ba INDEPENDENTE iha Farol, sesta foin lalais. 

 Tan ne'e, tuir Akara, kondisaun sira ne'ebe mak oras ne'e povu no nasaun ne'e hasoru, diak liu Governu avansa ho realidade. 

 "No hahu hanoin, ba oin ne'e tenke halo diak liu katak sei laiha protesta no komplain bainhira ita nia nesesidade baziku hanesan uma, bee moos ne'e rezolvidu no la'o diak, ami fiar katak, Governu desidi atu sosa saida de'it ema sei la preokupa," tenik Akara. 

Akara dehan, Governu labele agoizmu demais ba planu atu sosa kareta foun ho marka BMW, maibe se bele uza de'it mak kareta sira ne'ebe mak oras ne'e dadaun iha Timor-Leste. 

Rekonese katak, iha nasaun barak bainhira hetan vizita husi ulun boot nasaun ida, ne'e uma nain tenki prepara ho kualdiade, hanesan mos bainhira Timor-Leste nia nain ulun ba vizita iha rai liur mos ema sempre oferese kondisaun ida hanesan ne'e. 

Maski tuir nia hare ne'e bazeia duni ba realidade iha mundu diplomata nian, maibe problema ida mak kondisaun TL ho nasaun sira seluk la hanesan iha Portugal, Japaun, Indonezia, Krea do Sul no seluk tan, sira nia kondisaun ekonomia no povu nian ne'e diak ona kompara ho Timor-Leste. 

Alende ne'e, planu Governu nian atu sosa kareta Luxu nee mak la implementa, opsaun seluk mak tenki aluga de'it, maibe Governu mak tenki tetu didiak opsaun ne'e, no tenki analiza ba kontinuidade no sustentablidade. 

"Se ita hola kuandu iha sustentablidade no kualidade ba oin, ne'e la buat ida," esplika Akara. 

Ikus liu, Akara mos fo sujestaun katak, atu sosa kareta tenki halo aprovizionamentu ho transparente, tanba normalmente atu sosa kareta luxu ne'e sempre hamosu kestaun barak tanba indika ema keta ba sosa fali karreta uzadu ida tan mai depois la kleur deit aat fali ona. 

Tuir padraun folin kareta BMW iha fulan-Maiu 2014, folin diferensa tuir modelu oioin, karun liu mak ho modelu BMW 7-Series 760 Li (A) RP. 3.389.000.000 (kuaze U$340.000 dolar Amerika. Baratu liu mak ho modelu BMW X1-sDrive 18i Business (M) ho folin RP.499.500.000 (Kuaze U$50.000 dollar Amerika).
.

Sem comentários:

Publicar um comentário

Nota: só um membro deste blogue pode publicar um comentário.