quinta-feira, 31 de julho de 2014

Aselera Teste DNA Ba Ruin Saudozus

.

Timor Post - 31 de Jullu 2014

Díli - Sekretáriu Estadu Veteranus Antigus Kombatentes Libertasaun Nasionál (SEVAKLN), Júlio Sarmento "Meta Mali" hatete, Governu liu hosi Ministeriu Solidariedade Sosiál (MSS) hamutuk ho Ministériu Saúde (MS) sei esforsu hodi aselera lalais prosesu teste DNA ba ruin hosi saudozu sira.

"Prosesu ba teste ida ne'e sei hahú entre fulan Agustu ho Setembru nia laran, tanba ami deside tiha ona tinan 2014 ne'e saudozu sira nível komite sentral tenke halo hotu tiha ona", deklara "Meta Mali", iha Palasiu Prezidenti, Bairo Pité, Díli, Kuarta (30/7).

Metan Mali hatutan, ekipa hosi MSS rasik ba to'o tiha nasaun Indonézia hodi halo akordu no diskussaun sobre testa DNA, nune'e bele aselera lalais prosesu ne'e.

Alende ne'e nia parte mós ko'alia ona ho ministru saúde atu haree fali kona-ba ruin balun ne'ebé labele halo teste DNA iha Indonézia no sei ba halo fali iha nasaun seluk.

Antes ne'e MSS servisu hamur«tuk ho Universidade Airlanga-Surabaya (Indonésia), hodi halo akordu ida ba hala'o teste DNA, maibé seidauk determina lolos loron hodi hala'o teste DNA ba iha saudozu sira ne'ebé presiza halo teste.

Tanba kooperasaun ne'ebé halo dadauk ne'e sei iha prosesu maske akordu ne'ebé asina tiha ona, maibé sei hein prosesu lolos mak foin bele define loron atu teste DNA. (jxn)
.

Sem comentários:

Publicar um comentário

Nota: só um membro deste blogue pode publicar um comentário.