quarta-feira, 30 de julho de 2014

Bancada CNRT Lakohi Fó Kargu PM ba Partidu Seluk

,

Jornal Independente - 30 Jullu 2014

Bankada Congresso de Reconstrução de Timor-Leste (CNRT) iha Parlamentu Nasional (PN) konfia nia rekursu umanu rasik hodi lakohi husik pasta Primeiru Ministru ba líder partidu polítiku seluk iha bloku koligasaun no FRETILIN.

Presidente Bancada CNRT, Natalino dos Santos Nascimento dehan, partidu CNRT mak manan maioria iha eleisaun parlamentar no iha rekursu umanu ne´ebé kualifikadu atu troca PM Xanana Gusmão.

"Ami respeita Maun Boot Xanana nia deklarasaun maibé ita tenke haree lai agora pozisaun Timor ne´e iha ne´eba, ita foti ba base konstrusaun Estadu hodi prepara an ba dezenvolvimentu," dehan nia iha PN horseik.

Tuir nia demokratikamente Kintu Governu ne´e harii husi partidu ne´ebé manan maioria, tan ne´e partidu CNRT mak iha poder no kompetensia atu foti desizaun hodi substitui PM Xanana Gusmão.

"Ami nia partidu liu husi konferénsia nasionál mak sei decide sé mak atu troka PM  Xanana Gusmão karik rezigna-aan mas ne´e mós iha kritériu," dehan nia.

Maibé nia dehan, partidu CNRT seidauk iha figura alternativu atu troka PM Xanana ne´ebé atual Prezidenti Partidu CNRT.

Entretantu, Bancada Partidu Demokratiku (PD) no Bancada FRETILIN iha Uma Fukun Parlamentu Nasionál laiha ambisaun atu kaer pasta Primeiru Ministru hodi substitui PM Xanana Gusmão bainhira rejigna-aan.

Iha fatin hanesan, Vise Prezidenti Bancada PD, Paulino Soares Babo rekoñese partidu PD nu´udar partidu ne´ebé hetan kadeira ualu (8) de´it laiha ambisaun ida atu kaer pasta PM iha Timor-Leste.

"Ami bancada PD seidauk iha ambisaun no la prontu atu kaer ka troca PM Xanana tanba ami manan minoria," tenik nia.

Maski nune´e, PD hanesan partidu polítiku prontu mós atu lidera Governu bainhira CNRT no Prezidenti partidu CNRT mak nomeia lideransa partidu nian.

"Ami prontu kaer kuandu Primeiru Ministru Xanana mak haruka," dehan nia.

Entretantu, membru Bancada FRETILIN, David Dias Ximenes "Mandati"  hatete, rezignasaun PM Xanana ne´e fó oportunidade no prepara jerasaun foun atu kaer Estadu no nasaun Timor-Leste.

"Ami hanoin tempu oportunu ona atu Xanana sees an husi kargu Primeiru Ministru hodi fó oportunidade ba jerasaun foun," tenik nia.

Nia konta, uluk iha funu laran mós hanesan ne´e figura ida sai tenke mosu fali figura ida hodi fó kontinuasaun ba luta libertasaun to´o hetan independénsia.

"Ami bancada Fretilin mós laiha ambisaun atu kaer kargu PM tanba partidu CNRT no bloku koligasaun mak iha poder atu hili substituisaun PM Xanana bainhira resigna-aan," tenik nia.

Entretantu, Vise Primeiru Ministru, Fernando Lasama de Araújo deklara lakohi fó komentariu ruma kona-ba rezignasaun Primeiru Ministru Xanana Gusmão nian.

Maibé, nia hein de´it bainhira mak PM Xanana resigna aan, tanba nia rasik la hatene no prefere ba Sekretáriu Jerál partidu CNRT mak hatene liu.

Hanesan Vise Primeiru Ministru iha V Governu ne´e, La Sama dehan, kompetensia tomak atu halo deklara rezignasaun ka lae ne´e depende ba iha Xanana Gusmão.

Tuir planu Primeiru Ministru Xanana Gusmão sei hato´o nia diskursu deklarasaun politika rezignasaun iha terseiru Konferénsia Nasionál estra-ordinária partidu Congresu Nacional de Reconstrução de Timor-Leste (CNRT).

Planu deklarasaun polítika rezignasaun PM Xanana, diáriu ne´e asesu iha ajenda konferénsia nasionál CNRT nian. Terseiru konferénsia nasionál ne´e, sei hala´o iha loron 2 to´o tolu fulan Agostu tinan ne´e iha Sentru Konvensaun Díli (SKD).

Antes ne´e mós, Prezidente partidu CNRT ne´e deklara ona nia planu rezignasaun husi nia kargu Primeiru Ministru iha fatin públiku Sentru Konvensaun Díli no fatin ne´ebé sagradu tebes iha Parlamentu Nasionál no Palásiu Prezidensiál Nikolau Lobato.

Eis Komandante da Luta ne´e deklara, sei hato´o nia rezignasaun hafoin konferénsia Comunidade dos Países de Língua Portuguesa, ne´ebé Timor-Leste sei lidera tinan rua.

"Ha´u nia rezignasaun sei fó sai depois Cimeira CPLP ne´e remata," dehan Xanana ba jornalista foin lalais ne´e.

Desizaun ne´e rasik, Xanana informa ona ba Prezidenti República, Taur Matan Ruak, eis PM Mari Alkatiri, eis Prezidenti Parlamentu Nasionál, Francisco Guterres Lu-Olo, eis Prezidente José Ramos Horta no publiku sira.

Nia dehan líder antigu sira, sei continua akompaña hanesan ho nia equipa líder veteranu istóriku sira husi tinan 1975 kona ba implementasaun politica Governu nian ba aspetu global tomak.

Antes ne´e, eis Prezidenti Repúblika Dr. Ramos-Horta fó konfiansa ba Fernando La Sama de Araújo atual Vise PM, Ágio Pereira atual Ministru Konselhu Ministrus no Rui Araújo atu kaer pasta PM.

Eis Primeiru Ministru Mari Alkatiri mós deklara, PM Xanana Gusmão konfesa ona ba nia loos duni atu rezigna-aan, maibé molok atu resigna sei halo retiru ho nia membru Governu sira.Tuir planu, PM Xanana Gusmão sei halo remodelasaun ba estrutura Governu.

Maibé, tuir Vise Ministru Fernando La Sama de Araújo dehan planu atu halo retiru ne´e boatu de´it, tanba tuir nia katak laiha ema ida hatene kona ba planu Xanana atu halo retiru molok atu rezigna-aan.
,

Sem comentários:

Publicar um comentário

Nota: só um membro deste blogue pode publicar um comentário.