sexta-feira, 11 de julho de 2014

Kazu Pekulatu; "MP Akuza Arguidu Pena Tinan 3 To'o Tinan 10"

.

Notisia Husi TVTL - Kinta-Kalan, 10 Jullu 2014

Tribunal Distrital Dili (TDD) hala'o audensia julgamentu ba kazu krimi pekulatu hasoru funsionariu kontratadu husi servisu Autonomu medikamentu no ekipamentu de saude (SAMES).

Kazu pekulatu ne'ebe envolve husi funsionariu kontratadu SAMES nain tolu (3) hanesan, arguidu Rogerio Caitano Santos, Januario da Silva no Trisanto Monteiro, Ministeriu Publiku (MP) akuza arguidu nain tolu ne'e ho krime pekulatu tamba uza kombustivel ne'ebe Governu kontratu kompania Mega Petroleu ba bens de servisu hamutuk U$25.000 dolar Amerikanu iha tinan 2011, arguidu nain tolu uza ba nesesidade privadu.

Kombustivel ne'ebe prepara ba jerador atu fasilitaservisu SAMES, arguidu sira uza ba transporte privadu ne'ebe ekivalensia osan U$7000 (Rihun hitu) maibe arguidu sira konsege fo fila osan U$4000 (rihun hat) no falta tan osan U$3000 (rihun tolu). Iha deklarasaun ne'e arguidu sira rekonese, erru ne'ebe sira komete no pronto kompleta osan U$3000 (Rihun tolu) iha fulan 3 (Tolu) nia laran.

Hafoin halo deklarasaun husi arguidu sira, Tribunal la konsege rona testamunha ne'ebe marka ona prezensa iha Tribunal tamba laiha duvidas hodi kontinua ba alegasaun.

Ministeriu Publiku ne'ebe reprezenta Angelina Saldanha bazeia ba artigu 295 kodigu penal Timor-Leste ne'ebe akuza arguidu sira bele hetan pena husi tinan 3 to'o tinan 10, maibe hare ba komportamentu arguidu sira nian no rekonese sala ne'ebe sira halo no pronto rekopera fali maka arguidu Rozeiro Caitano Santos Ministeriu Publiku akuza tinan 3 suspende ba tinan 3, arguidu Januario da Silva tinan 2 suspende ba tinan 2 no Trisanto Monteiro tinan 2 suspende ba tinan 2.

Aleinde ne'e, tuir defensor publiku Fernando Carvalo husu ba Tribunal atu aumenta tan fulan 6 to'o tinan 1 ba arguidu sira no fo fila osan ne'ebe sira uza, ho razaun tamba arguidu sira funsionariu kontratadu ne'ebe vensimentu ki'ik. Akordaun ba kazu refere sei halao iha loron 25 fulan Jullu tinan ida ne'e iha Tribunal Distrital Dili.
.

Sem comentários:

Publicar um comentário

Nota: só um membro deste blogue pode publicar um comentário.