terça-feira, 15 de julho de 2014

Saida los mak CPLP nia benefisiu ba Timor-Leste?

.


Saida los mak CPLP (Comunidade dos Paises da Lingua Oficial Portuguesa) nia benefisiu ba Timor-Leste?

Uluk liu, klaru katak ita tenki manten ita nia lasu solidaridade ho paises makdalen portugues nian tanba ita nia luta tomak, sira mak sempre hamrik ho ita. CPLP hanesan dalan diak liu ba ita atu hametin lasu ne'e. Ita hotu-hotu tenki haksolok ho amizade nebe ita hakiak ho paises amigos sira ne.

Maibe, problema ba ita mak ita nia lider sira deit mak sente ligasaun entre ita nia nasaun ho paises CPLP. Sira mak repot liu ho CPLP hodi dudu ses hotu vendedor kik sira husi tasi ibun, halo projetu emergencia barbarak iha Dili laran, hadia estrada, hadia jardin, be dalan, loke hotel bobot, no sst. Povu baibain sente katak cimeira CPLP nebe atu mai la lori benefisiu nein ida. Afinal cimeira ne lori tan mak miseria ba sira. So ema nebe moris iha Dili mak sei benefisia husi projetu emergencia sira ne. Ema iha foho sei moris hanesan buat la kona sira. Karik miseria mak aumenta tamba governu agora konsentra hotu ba Dili deit tanba cimeira ne.

Oinsa mak cimeira ne sei benefisia ita? Balu komesa koalia kona ba turismo, dehan atu atrai ema sira husi CPLP mai visita no gasta osan iha Timor-Leste. Iha Dili laran agora sira husi governu hasae iklan ka promosaun bobot kona ba fatin furak iha Timor laran. Problema mak primeiru, paises CPLP sira mesak dok deit. Maioria iha Africa. Nasaun CPLP bot liu mak America Latina. Sira mak atu mai visita Timor-Leste? La hetan! Sira mos maioria mesak ema hanesan ita, ka kiak liu. Sira buka osan iha nebe atu mai gasta iha ita nia rain?

Cimeira CPLP mos hatudu daudauk katak ita nia nasaun ne la hanesan ona ho nasaun nebe mak asuwain sira hanesan Nicolau Lobato no Vicente Reis "Sahe" sira mehi ba. Ohin ita nia governu sira preokupa liu mak ho sira nia naran. Povu kik sira sa sira tau ba kotuk. Husu deit ba vendedor kik sira nebe fan sasan iha dalan ibun, husi Lita Store nia oin to Hali Laran. Husu ba povu kik sira iha foho nebe presiza tebes projetu emergencia atu hadia sira nia eskola, ospital, estrada, no infrastrutura vital sira seluk. Povu kik sira sai prioridade kik iha Xanana nia Timor-Leste. Prioridade bot mak Xanana nia naran, dignidade Xanana, ministru ho membru parlamentu sira, no ema elite sira nebe hela iha Dili laran. Timor-Leste ohin sai fali pesadelo ka mehi at ida ba aswain matebian sira. Timor-Leste ohin laos Maubere nian maibe kolonialista sira nian.

Tuir lolos cimeira CPLP bele sai hanesan oportunidade ida ba Timor-Leste atu hatudu ba nasaun CPLP sira seluk konaba dezenvolvimentu nebe mai husi okos mak sae ba leten. Ba membru CPLP sira iha Africa, nebe maioria governu mesak koruptu deit, Timor-Leste tuir lolos sai hanesan ezemplu ida ba sira atu hamoris politica dezenvolvimentu ida nebe Africano sira ne rasik mak inspira ita: anti-colonialismo, anti-imperialismo ho solidaridade masimu ba povu kik sira hanesan Maubere.

Maibe ohin loron, Xanana nia Timor-Leste buka fali atu kompete ho paises sira atu hare, se mak bele esplora povu kik sira makas liu. Infelismente, Timor-Leste ho lideransa Xanana nian parese atu halo liu fali paises CPLP barak hodi hakuak capitalismo ho elitismo no hanesan povu kik, povu Maubere sira!

Bemvindo CPLP!
 .

Sem comentários:

Publicar um comentário

Nota: só um membro deste blogue pode publicar um comentário.