sexta-feira, 22 de agosto de 2014

Deputadu FRETILIN: Sérgio Lobo Laiha Étika

.

Timor Post - 22 Agostu 2014

Díli - Relasiona ho deklarasaun Ministru Saúde, Sérgio Lobo hasoru deputadu bankada FRETILIN katak bosok-ten, mosu lamentasaun no konsidera membru governu refere laiha étika.

Partifu FRETILIN ne'ebé mak moris iha tinan 1974 to'o ohin loron seidauk bosok ema ida pelu faktu partidu uniku ida ne'ebé mak luta ba ukun rasik-an no nunka bosok.

"Maibé to'o ikus ministru hakarak defende-an hodi konsidera katak deputadu bosokten, ida ne'e hatudu  membru governu laiha étika, no hatun dignidade ita nu'udar deputadu hosi orgaun estadu ida," deputada, Maria Angelica hatete iha plenária (21/08), PN,Díli.

Tuir deputadu bankada FRETILIN hatete pelu faktu problema saúde mosu hosi nasionál to'o area rurais tuir fiskalijasaun deputadu sira nian, problema ida mak foin lalais funsionáriu Saúde greve hasoru ministru ba jestaun rekrutamentu.

Deputada haktuir mos katak pessoal Saúde sira hosi Oecusse hato'o katak ministru Saúde foin lalais ba Oecusse iha aviaun leten de'it la tun atu halo sorumutu ho funsionáriu sira, maski funsináriu hein dader to'o meudia.

"Hanesan ami ba Oecusse komunidade kamentam tanba sira hein ministru hosi dader to'o meudia, atu halo reuniaun ho ministru Saúde. Maibé hein to'o tuku rua loraik, maibé ministru to'o Oecusse ho aviaun nia leten de'it, ida ne'e atetude membru governu saida mak hanesan ne'e," deputada Maria Angelica haktuir.

Tanba ne'e deputada dehan kuandu Ministru Saúde mak la satisfas ho deklarasaun hirak ne'e bele lori deputadu ba Ministériu Públiku, atu nune'e deputadu sira hasai imunidade hodi ba hatan.

Nune'e deputadu Paul Moniz hosi bankada FRETILIN afirma katak problema Saúde levanta hosi bankada parlamentar hotu ba Saúde hosi nasionál to'o baze sobre sistema no jestaun, maski buat balun di'ak maibé iha buat balun ministru tenke rekonhese.

"Ha'u haree Ministru nia konsiderasaun hatun parlamentu nia dignidade, deputadu nia dignidade no FRETILIN nia dignidade," deputadu Moniz dehan.

Iha fatin hanesan Florentina Smith bankada FRETILIN, hatete kritika ba ministériu Saúde la'os atu koalia át maibé kritika para hadi'a tanba kna'ar nu'udar fiskalijador no monitoriza servisu governu no povu nia sofrementu.

"Agora ita husik ba Ministériu Públiku mak haree, ministru mos iha direitu atu defende maibé labele koalia fali deputadu hosu FRETILIN bosok-ten, tanba ne'e husu ba membru governu para hadi'a linguajen," deputadu Smith hatete.

Entretantu antes ne'e Ministru Saúde, Sérgio Lobo hatete ba jornalista sira konsidera deputadu sira bosok ten, tanba koalia laiha dokumentu no faktus.

"Deputadu sira mak inventa sasan sira ne'e, ne'e ha'u bele dehan bosok ten. Tanba ita nu'udar reprezentante povu aprezenta kazu ida ne'e katak ita tenke iha faktus no dokumentu, maibé to'o agora sira aproveita mídia katak, ha'u laiha situasaun ida, ha'u labele akuza sira. Tanba sira iha imunidade ba justisa, tanba ne'e hau nonok de'it," Ministru Sérgio Lobo hatete.

Maske kazu ne'e rasik bankada FRETILIN hato'o ona ba PJR maibé to'o oras ne'e, parte justisa seidauk bolu Ministru Saúde ho nia estrutura atu ba resposta ba sobre keixa.(uly)
.

Sem comentários:

Publicar um comentário

Nota: só um membro deste blogue pode publicar um comentário.