quinta-feira, 21 de agosto de 2014

Deskonfia "Rede" Boye iha TL, GOPAC husu Investigasaun

.

Jornal Independente - 21 Agostu 2014

Díli - Global Organizasaun of Parlamentarians Against Corruption (GOPAC) Timor-leste husu ba Ministériu Públiku (MP) atu loke investigasaun iha Timor-Leste hodi hamoos rede husi Bobby Aji-Boye.

Boye hanesan eis asesor Governu TL ne'ebé envolve iha fraude konspirasaun ne'ebé halakon estadu TL hamutuk millaun $3.5.

Iha fulan Juñu tinan ne'e autoridade seguransa Estadus Unidus, FBI (Federál Bureau of Investigation), kaer Boye iha aeroportu New Jersey - Amerika.

Relasiona ho kestaun ne'e Prezidente GOPAC TL, Francisco Branco dehan, Ministériu Públiku presiza loke prosesu nune'e bele evita kazu  ne'e akontese iha futuru.

"Ami hanoin se laiha kooperasaun husi autoris seluk iha ita nia rai tanba Bobby Boye mesak de'it nia labele halo, buat halo prejudika ita nia povu sai vitima," dehan Branco liu husi konferensia imprensa iha Parlamentu Nasionál, Segunda (10/08).

"Ita nia Ministériu Públiku bele prosesu Bobby Boye tanba ami preokupa mós Bobby Boye iha tempu ne'ebá sai mós asesor ba Lei Fundu Petroliferu, ami preokupa ba situasaun ne'e," dehan nia.

Nia dehan, presiza duni halo investigasaun hodi sai avaliasaun ba Estadu Timor Leste atu iha futuru labele akontese tan.

"Ami hanoin ita nia servisujustisa halo investigasaun ba kazu ida ne'e atu labele akontese tan iha ita nia rai," dehan Prezidente GOPAC-TL.

MF Emília Pires tenke koopera ho justisa.

Entretantu, Prezidente GOPAC-TL husu mós ba Ministra Finansas Emília Pires atu koopera ho justisa hodi tuir prosesu iha Tribunal.

"Ita hanoin ba tribunal ne'e normal ne'ebé husu Ministra Emília atu koopera ho justisa liuliu sistema Tribunal atu bele ita nia sidadaun Timor-Leste no estranjeiru kontinua fó konfiansa ba ita nia sistema Judisiariu iha Timor-Leste," Branco husu.

Tuir nia, presizamente MF Emília Pires koopera ho justisa bainhira iha ona notifikasaun husi tribunál tanba ne'e prosesu normal.
.

Sem comentários:

Publicar um comentário

Nota: só um membro deste blogue pode publicar um comentário.