sexta-feira, 1 de agosto de 2014

Emilia Ofisialmente Rezigna-an

.

Jornal Nacional Diário - 1 Agostu 2014

Rezignasaun Ministra Finansas (MF) Emilia Pires, ne’ebé mak durante ne’e sai mós debate públiku ne’e, la’os deit ona hela ba ipóteza, maibé tau duni iha prátika.

Fonte konfirmadu iha estrutura V Governu Konstitusionál ne’ebé lakohi públika ninia identidade ba públiku, Kinta feira (31/07), ba Jornal Nacional Diário informa katak, Ministra Emilia Pires ne’ebé mak kaer xave gaveta Orsamentu Jerál Estadu (OJE) desde IV governu konstitusionál to’o mai V governu ne’ebé la’o ona ba tinan tolu ne’e, ofisialmente entrega ona ninia karta rezignasaun ba Primeiru Ministru (PM) Kay Rala Xanana Gusmão, iha Palácio Governu.

Ho ida ne’e hahú Kinta feira (31/07/2014), Ministra Finansas Emilia Pires komesa lahala’o ona nia funsaun hanesan Ministra Finansas. No komesa loron ne’e kedas Emilia Pires laativu ona iha servisu.

Maske Emilia Pires hatama ona ninia karta rezignasaun, maibé seidauk hatene motivu saida maka Emilia Pires atu rezigna-an.

Nune’e mós karta rezignasaun ne’e PM simu tiha ona maibé seidauk prosesa no tuir informasaun husi fonte konfirmadu iha Governu ne’e dehan katak, karta rezignasaun Emilia Pires ne’e sei prosesa iha 22 Agostu 2014.

Antes ne’e mosu ona imprensaun no komentárius lubuk ida ona mak mosu iha públiku katak, Ministra Emilia Pires hatudu kedas sinal rezignasaun ne’e iha momentu debate Orsamentu Jerál Estadu (OJE) 2014, iha fulan Janeiru liu ba ho Emilia Pires nia aujensia iha debate ba OJE.

Alénde ne’e opiniaun públiku balun mós hateten katak, Emilia Pires hakrak rezigna-an tanba hetan presaun psikolojia no ninia kondisaun saude mak lapermite atu kontinua asume pasta Ministra Finansa.

I antes ne’e polítiku balun mós fó sira nia komentáriu katak, rezignasaun Ministra Finansa Emilia Pires nian, inklui Primeiru Ministru (PM) Kay Rala Xanana Gusmão koalia ona iha Bloku Koligasaun maibé seidauk tau ba iha serteza.

Nune’e mós kuandu issu konaba rezignasaun PM no membrus Governu balun la’o namanas iha públiku, Partidu Demokrátiku (PD) nia membrus polítiku iha Parlamentu deklara ona katak, PD prontu atu asume pasta sira iha estrutura Governu nian, liu-liu mós pasta Primeiru Ministru (PM).

Deputada Maria Loudes Bessa kualidade hanesan Xefi bankada Partidu Demokrátiku (PD) antes ne’e hateten katak, issu kona ba rezignasaun membru governu PD mós rona ona, maibé ne’e normal akontese, importante mak fatin ne’ebé labele atu subtitui hanesan fatin ba Primeiru Ministru nian mak sai problema.

“Iha ema (membru Governu) mak hakarak atu rezigna-an, sei iha ema seluk atu halo fali servisu ne’e,” nia hateten.

Nune’e, nia dehan, PD rasik prontu atu subtitui kuandu iha duni membru governu balun rezigna-an, tanba prinsípiu PD nian mak hateten ba nesesidade povu no estadu.

Nune’e mós deputadu bankada CNRT, kualidade Vise Prezidenti Parlamentu Nasionál (VPPN), Aderito Hugo da Costa mós hateten katak, iha duni membru governu balun mak atu sai, maibé seidauk iha justifikasaun loloos, sé mak atu rezigna-an.

Maibé nia dehan, karik iha duni membru governu balun hakarak rezigna-an ne’e hatudu sinal pozitivu, tanba sidadaun Timor ida hetan konfiansa atu kaer kargu ida, maibé depois senti labele konsentra liu ba servisu estadu nian husu atu sai.

“Di’ak liu tan karik rezigna-an ne’e tanba rekoñese nia inkapasidade, ne’e sinál di’ak ba kargu polítiku hotu-hotu atu sé mak laiha kapasidade ka laiha tempu atu fokus ba ninia kargu di’ak liu nia sai,” dehan Aderito Hugo da Costa, iha fulan Janeiru liu ba.

Antes ne’e mós eis Primeiru Ministru (Ex-PM), aktual Sekretáriu Jerál Partidu FRETILIN, Mari Bim Amude Alkatiri hateten katak, Partidu FRETILIN lakohi hatama nia kanoru tohar iha problema governu, tanba FRETILIN latama iha Governu.

Tuir informasaun ne’ebé mós fó sai husi ofisiál balun iha Governu hateten katak, depois Emilia Pires entrega karta rezignasaun ba Primeiru Ministru (PM) Kay Rala Xanana Gusmão, iha dia seguinte PM Xanana mós hahú halot ninia sasan iha Palácio Governu.ixo
,

Sem comentários:

Publicar um comentário

Nota: só um membro deste blogue pode publicar um comentário.