quinta-feira, 21 de agosto de 2014

KAK Sei Investiga Membru Governu Halo Uma iha Estranjeiru

.

Timor Post - 21 Agostu 2014

Komisaun Anti Korupsaun (KAK) dadauk ne'e tau hela ajenda hodi halo investigasaun ba membru sira ne'ebé deskonfia halo uma iha estranjeiru liu-liu Indonézia,

"Tama ona iha ajenda.Tanba ne'e ita halo koperasaun ho Komisi Pemberanta Korupsi (KPK) ne'e atu halo investigasaun ba membru sira ne'ebé halo uma iha Indonézia," Komisariu KAK Adérito Tilman dehan ba jornalista sira iha Palásiu Prezidente Repúblika Nicolau Lobato, Bairu Pitá, Díli, tersa (19/08), relasiona ho preokupasaun hosi membru Parlamentu Nasionál (PN) ne'ebé husu ba KAK atu loke investigasaun membru governu ne'ebé halo uma iha Indonézia, tanba iha sidadaun Timor barak maka halo ona uma iha nasaun Indonézia.

Kooperasaun ne'ebé sei halo ho KPK Indonézia ne'e atu bele fó baze legál ba iha KAK hodi bele loke investigasaun ba sidadaun Timor-Leste ne'ebé halo uma iha nasaun Indonézia.

"Ita labele ansi liu buat hotu tuir nia dalan. Prosesu investigasaun ne'e presiza tuir nia dalan", dehan Komisáriu Tilman.

Nia dehan, ho informasaun ne'ebé membru governu halo uma iha estranjeiru liu-liu Indonézia ne'e KAK tenke halo investigasaun hodi prosesa tuir lei ne'ebé iha durante ne'e.

"KAK iha kompeténsia atu halo investigasaun kuandu iha informasaun ka índisiu kona-ba krime sira ne'ebé akontese iha funsaun públika," nia tenik.

Antes ne'e membru PN Francisco Miranda Branco Prezidente GOPAC Timor Leste hatete, Komisi Pemberantasan Korupsi (KPK) fó sai ona faktu ba Komisaun Anti Korupsaun (KAK) ho Ministériu Públiku (MP) liu hosi konferénsia foin lalais, tanba ne'e hein koperasaun órgaun justisa estadu hodi investiga membru governu sira ne'ebé maka halo uma iha Indonézia.

Tuir Prezidente GOPAC Timor-Leste afirma kuandu membru governu ruma maka halo uma iha rai liur bele iha indisius ne'ebé mak presiza hatene.

KAK Iha Poder

Entretantu Vise Prezidente Parlamentu Nasionáo (PN) Adérito da Costa Hugo husu ba KAK atu labele para de'it ho semináriu sira kona ba problema korupsaun iha rai laran, maibé tenke hakat tan pasu ida hodi buka tuir informasaun sira ne'ebé hasai hosi Komisi Pemberanta Korupsi, Indonézia ne'ebé dehan deskonfia governante Timor-Leste balun iha riku soin barak iha Indonézia.

"Ita apresia tebes ba KPK no KAK ne'ebé iha kooperasaun di'ak atu oinsá atu detekta abut koruptor sira, Hau husu labele para de'it iha semináriu, maibé tenke ke'e tuir informasaun sira ne'e," hatete Adérito Hugo ba jornalista sira iha Parlamentu Nasionál, Kuarta (20/08).

Eis xefe redasaun Jornál Suara Timor Lorosae ne'e hatutan, kuandu entidade ruma mak oferese informasaun sufisiente, KAK iha kompetensia tomak atu buka tuir.

"Ida ne'e iha ne'ebé deit, KAK bele buka tuir," hatete Adérito.

Entretantu, antes ne'e Komisáriu Komisaun Anti Korupsaun, Adérito Tilman dehan iha tinan 2014, KAK haruka ona kazu korupsaun hamutuk 10 ba Ministériu Públiku no kazu hamutuk 20 persija kompleta tan dokumentus balun.

Komisáriu Adérito Tilman hatutan, depois simu mandatu foun iha fulan kotuk, informasaun ne'ebé nia simu hosi diretór investigasaun KAK, katak keixa públiku ne'bé tama ba KAK durante fulan ualu (8), Janeiru to'o Agostu 2014 hamutuk 30.

Hosi númeru kazu ne'e iha kazu partisipasaun hamutuk 10, haruka ona ba Ministériu Públiku no 20 sei presiza kompleta tan dokumentus atu nune'e haruka ba iha MP hodi loke investigasaun.

Nune'e mós, Komisi Pemberantasan Korupsi Indonézia detekta ona membru governu balun ne'ebé halo uma iha Indonézia maibé KPK seidauk bele asaun ruma tanba seidauk iha akordu entre KAK no KPK.

Espesialista Edukasaun no Atendementu Públiku KPK Indonézia, Wuryono Prakoso hatete, tanba seidauk iha akordu kooperasaun ho KAK, entaun labele halo intervensaun.

Maibé, kuandu iha ona akordu ruma ho KAK mak KPK bele halo ona intervensaun ba riku soin governante sira nian iha Indonézia. (jxn/uly/oky)
.

Sem comentários:

Publicar um comentário

Nota: só um membro deste blogue pode publicar um comentário.