segunda-feira, 11 de agosto de 2014

PN Komesa Hanoin Reve Lei Vitalísia

.
Foto, Facebook
Timor Post - 11 Agostu 2014

Díli - Segundu Vise Prezidente Parlamentu Nasionál. Adérito Hugo da Costa afirma katak, Parlamentu Nasionál sei ajenda proposta lei pensaun vitalísia no eis titulares hodi halo alterasaun.

"Agora dadaun deputadu sira resesu hela tanba ne'e iha fulan Setembru deputadu sira tama fali serbisu hanesan bai-bain sei tau lei sira ne'ebé mak agora iha hela meja PN para halo alterasaun hanesan pensaun vitalísia, lei rai bens i moveis inklui lei anti korupsaun no seluk tan," hatete Adérito ba jornalista iha (7/8) iha PN, Díli.

Hugo afirma, lei hirak ne'e iha hotu prioridade maibé hosi lideres bankada mak sei deskute hamutuk para bele halo alterasaun ba lei hirak ezemplu lei pensaun vitalísia ne'ebé mak ohin loron sai preokupasaun iha sosiedade.

Entretantu membru deputadi hosi komisaun A, deputadu Antoninho Bianco hosi Bankada FRETILIN afirma katak, agora dadaun bankada FRETILIN prepara ona deputadu balun hodi prepara proposta alterasaun lei pensaun vitalísia.

"Ami prepara tiha ona deputadu balun atu prepara projetu alterasaun lei, aleinde ne'e ami mos halo mós negosiasaun ho deputadu husi bankada sira selu para apoiu, maibé agora ita haree iha bankada PD mós iha proposta alterasaun lei pensaun vitalísia nian," deputadu Bianco hatete.

Deputadu afirma katak importante tebes tenke halo duni mudansa ba lei hirak ne'e tanba seidauk bele atu implementa iha Timor-Leste ba lei pensaun vitalísia no eis titulares.

Purtantu Prezidente PD, Maria de Lourdes Bessa afirma katak sira nia proposta alterasaun baixa tiha ona ba meja, nune'e ba futuru meja atu maneja.

Relasiona ho lei pensaun vitalísia no eis titulares sociedade civil kontinua ezije ba Parlamenti Nasionál atu bele hala'o tiha alterasaun tanba konsidera katak lei refere fo benefisiu de'it ba ema grupu ki'ik balun. (uly)
.

Sem comentários:

Publicar um comentário

Nota: só um membro deste blogue pode publicar um comentário.