sexta-feira, 8 de agosto de 2014

PN Lamenta Kompañia Abandona Projetu Emerjénsia

.
Foto de, PT.
Jornal Independente - 08 Agostu 2014

Díli - Parlamentu Nasionál liu husi Komisaun E, lamenta Kompañia balun abandona projetu emerjénsia Simeira CPLP CPLP iha kapitál Díli.

Tuir observasaun no monitorizasaun husi Komisaun E PN, kompañia balu hahú abandona projetu emerjénsia ba estrada no valeta.

Tanba ne'e, Komisaun E PN husu ba Ministériu Obras Públikas (MOP) no Ajénsia Dezenvolvimentu Nasionál (ADN) atu halo monitorizasaun adekuadu hodi gasta orsamentu tuir nesesidade povu nian.

Membru Komisaun E, Inácio Moreira hatete, daudaun ne'e kompañia balun hahú abandona obra emerjénsia iha kapital Dili.

"Ami haree ona obra iha Bekora dalan STM nia ne'e abandona, ita haree estrada balun husi projetu emerjénsia ne'e laiha kualidade no balun komesa aat fila fali," dehan nia, iha Parlamentu Nasionál, horiseik.

Tanba ne'e, nia husu ba MOP nia responsabilidade atu bele asegura kualidade projetu emerjénsia hodi benefisiu povu.

Iha fatin hanesan Manuel Castro projetu emerjénsia iha Audian liuliu valeta sira ne'e hahú nakfera fali.

"Ami husu ba MOP no ADN atu halo fiskalizasaun ida adekuaddu para bele garante kualidade ba projetu emerjénsia hirak ne'e se lae ita estraga osan estadu de'it," nia sujere.
.

Sem comentários:

Publicar um comentário

Nota: só um membro deste blogue pode publicar um comentário.