quinta-feira, 7 de agosto de 2014

Taur Husu Opiniaun Bankada CNRT Kona-ba Remodelasaun

.

Timor Post- 06 Agostu 2014

Díli - Prezidente Repúblika, Taur Matan Ruak, tersa (05/08) hasoru malu ho reprezentante deputadu sira hosi bankada CNRT hodi husu sira nia opiniaun sobre issu remodelasaun ne'ebé durante loron hirak nia laran manas iha publiku nia le'et.

Maibé durante diskusaun besik oras rua nia laran, Prezidente Repúblika husu opiniaun ba deputadu nain lima reprezenta hosi bankada CNRT kona-ba remodelasaun ba estrutura bloku koligasaun ne'ebé forma hosi partidu tolu, CNRT, PD no Frente Mudansa.

Maibé iha diskusaun feixada ne'e, deputadu nain lima la responde ba xefe estadu ninia preokupasaun kona-ba remodelasaun. Tanba ho razaun katak remodelasaun ne'e, konferensistas sira fó puder tomak ona ba Prezidente Partidu CNRT, Kay Rala Xanana Gusmão.

"La ko'alia kona-ba remodelasaun, só (PR Taur) husu de'it mak bankada ninia desizaun kona-ba ida ne'e, mais remodelasaun ne'e konferénsia fó kompetensia tomak ba prezidente partidu, hanesan primeiru-ministru," deputadu Ancelmu da Conceição hatan ba jornalista sira iha Palásiu Prezidénsia Repúblika, Díli, tersa, (5/8).

Nia haktuir katak bankada CNRT mai iha Palásiu Prezidénsia, ne'e hanesan inkontru regular fulan-fulan ho Prezidente Repúblika, hodi husu xefe estadu nian hanoin ba bankada kona-ba aktividade sira ne'ebé atu hala'o lor-loron.

Iha inkontru ne'e eis gerileiru fó hanoin kona-ba lala'ok dezenvolvimentu ne'ebé ladun iha kualidade, i oinsá mak bele servisu hamutuk atu bele fó solusaun di'ak ba povu. (gim)

.

Sem comentários:

Publicar um comentário

Nota: só um membro deste blogue pode publicar um comentário.