terça-feira, 19 de agosto de 2014

Tribunál Rekursu:Lei KomSos Inkonstitusional - TLPU Konsidera Moe Boot ba PN

.

Jornal Independente - 19 Agostu 2014

Díli-Tribunál Rekursu (TR) konsidera artigu balun iha lei Komunikasaun Sosial (KomSos) ne'ebé Parlamentu Nasionál ne'e aproba inkonstitusional, tanba fó duni limitasaun ba atividade jornalista.


Tuir Prezidente Tribunál Rekursu, Guilherme da Silva hatete, Prezidente Repúblika duvida ba artigu haat (4), mak artigu 20, 24, 40 no 44, maibé hafoin tribunál Rekursu halo analiza, iha artigo tolu de'it mak kontradis ho konstituisaun.

Artigu tolu ne'ebé mak inkonstitusional hanesan artigu 20, ko'alia kona ba Konstitui Deveres ba Jornalista husi alinea a too alinea g, artigu 24 ne'ebé ko'alia kona ba Kapital Estranjeiru no artigu 40 mós ko'alia kona ba Kontra Ordenasaun.

Husi rejultadu analiza ne'e, Tribunál Rekursu mós hatoo ona karta notifikasaun ba Parlamento Nasionál no Prokurador Jerál ho prazu loron 10 hahú iha loron 10 fulan'Agosto liu ba.

Maibé karta notifikasaun ne'e, tuir Prezidente TR ne'e dehan, Prokuradór Jerál mak responde tiha ona no Parlamentu Nasionál laiha resposta.

Maski nune'e, Tribunal Rekursu kontinua desidi, hodi haree tuir rekerimentu husi Prezidente Repúblika ne'ebé kestiona ou duvida kona ba artigu balun iha lei KomSos ne'e.

Antes ne'e, Prezidente Repúblika fó loron 25 ba Tribunál Rekursu estuda lei neºe.

Iha parte seluk, Prezidente Repúblika Taur Matan Ruak hatete, ezatamente Tribunál Rekursu konsidera artigu balu iha lei KomSos ne'e inkonstitusional.

"Imi hatene ke Prezidente da Repúblika haruka ba iha Tribunal Rekursu agora ita hotu hein ida ne'ebé mak sira deside ida mak ita kumpri, ezatamente pelu faktu sira (Tribunal Rekursu) iha duvidas, " dehan PR Taur, bainhira halo vizita ba Grato, Sub Distritu Same, Distritu Manufahi, Sabadu.

Maibé, PR dehan, Lei KomSos seidauk bele identifika no dehan inkonstitusional tanba Tribunál seu analiza no seidauk aprejenta ba nia (Prezidente) hodi deside.

"Purqe ita labele dehan inkonstitusionál kuandu la'os konstitusionalista tanba ne'e mak haruka ba iha Tribunál Rekursu para sira halo analiza no desijaun, ne'ebé mak sira fó sai ida ne'e mak la'os konstitusinál," dehan Taur.

Entretanto, Prezidente Timor-Leste Press Union (TLPU) José Antonio Belo konsidera lei ne'ebé kontradis ho konstituisaun ne'e fó moe boot ba Parlamentu Nasionál ne'ebé antes ne'e konsidera lei KomSos ne'ebé sira produs si'ak liu iha ASEAN no iha mundu.

Hanesan Prezidente Press Union senti moe, senti triste ho membru Governu iha V Konstitusionál ho Parlamentu Nasionál nu'udar lei na'in sira aprova lei inkonstitusionál ida hodi kontra fila-fali Konstituisaun Repúblika.

Tan ne'e nia apresia servisu jornalista nasionál no internasional inklui sosiedade sivil sira hodi foti kestaun ba lei ne'e.

"To'o ikus ita hatene katak artigu balun husi lei ida ne'e konfronta duni hanesan uluk ida hatete kedas konfronta duni ho konstiruisaun republika, lei oan viola lei inan ne'ebé produs husi Governu no Parlamentu Nasionál," dehan Belo.

Nia dehan, iha artigu 20 no 40 ko'alia kona ba deveres jornalista ninian. Tuir nia katak, artigu ida ne'e hamate ona artigu sira seluk kona ba penalidade.

Tuir nia dehan, kuandu Tribunál dehan inkonstitusionál iha artigu 20 entau artigu 11 mós mate. Tanbá lei ne'e hanesan korenti. Kuandu artigu deveres ne'e mak inkonstitusionál entaun sira seluk mós kona.

"Iha momentu ne'ebá ami husi Timor-Leste Press Union hato'o preokupasaun ba PN Komissaun A mais komissaun A lakohi rona.Depois ami hodi membru 115 jornalista ne'ebé servisu loron-loron iha media TL hatoo preokupasaun ba PN. Sira la preokupa, too ikus aprova lei ne'e, hamoe TL hanesan estadu ireitu Demokratiu," dehan jornalista senior ne'e.

"Se mak hamonu rasik naran ne'e, V Governu Konstitusionál ho Parlamentu Nasonál mak hamoe rasik."
.

Sem comentários:

Publicar um comentário

Nota: só um membro deste blogue pode publicar um comentário.