terça-feira, 30 de setembro de 2014

BLOGUE DE FÉRIAS

.

Olá queridos leitores,

Pois é... Isto aqui anda um bocado parado e infelizmente venho informar-lhes que vai continuar sem publicações até à próxima semana.

 Estamos de férias e não há tempo para fazer as publicações diárias. Apresentamos desde já as nossas desculpas por qualquer inconveniência. Logo que chegar a casa, publicarei as noticias como sempre. Quem quiser mandar os artigos de opinião por favor mande e logo que for possível serão publicados.

Até lá desejem-me boas férias, QUE EU BEM MEREÇO! ;)

Beijinhos para todos os nossos queridíssimos leitores.

Zizi
,

quinta-feira, 25 de setembro de 2014

Husu Kona-ba Desizaun Indultu, Resposta PR Taur La Koresponde

,

Jornal Independente-25 Setembru 2014

Quelikai - Prezidente Repúblika Taur Matan Ruak kontinua simu kritika husi komunidade iha suku Namanei, sub distritu Queliqai kona ba indultu ne'ebé fó ba eis kondenada korruptu Lúcia Lobato.

Komunidade husu pergunta kona-ba desizaun indultu ba Lúcia, Xefe Estadu ne'e hatan la koresponde ho asuntu ne'ebé husu, maibé hatoo nia preokupasaun kona ba oras ne'e sidadaun hotu kontribui ba korupsaun.

"Hau la preokupa no la haree de'it ba membru Governu ka sira ne'ebé servisu Administrasaun Públiku, maibé ha'u preokupa mak sosiedade hotu hakarak kontribui ba korupsaun ne'e," resposta Prezidenti Taur, hafoin komunidade ida husu ba indultu Lucia, iha dialogu aberta, kuarta, horseik.

Luis Maria Ximenes, komunidade Namanei preokupa tebes kona ba desizaun PR Taur hodi fó indultu ba kondenada korruptu Lucia Lobato. Nia husu Xefe Estado atu esplika rajaun fó indultu ne'e.

Iha fatin hanesan, Francisco Mateus Gusmão, reprejenta Klibur Estudante Namanei mós kestiona makás kona ba desizaun ne'e.

Nia hatoo kritika katak, iha kampaña Prezidensiál, Prezidente Taur hakilar katak sei la fó indultu ba ema ne'ebé tama prizaun tanba halo korrupsaun.

Maibé, la hatudu realidade, desizaun PR Taur hodi fó indultu ba Lucia ses husi promesas kampaña. Tan ne'e, nia husu atu esplika rajaun.

Iha dialogo ho komunidade, Taur hatete, korupsaun ne'ebé mosu iha sosiedade nia leet, tanba haree ba iha situasaun veteranu sira nian hodi hamosu dadus falsifikasaun, hanesan vendedór ne'ebé inventa folin sasan, joven sira barak mak inventa hetan izasah ba eskola.

"Ha'u haree iha ita nia rai ne'e sidadaun hotu hanoin no kontribui ba korupsaun ne'e mak mosu iha sosiedade nia leet, ita presiza haree ida ne'e labele haree de'it ba parte ida," hatutan Taur.

Tanba ne'e nia husu ba sidadaun hotu atu bele kontribui ba kombate korupsaun ne'ebé mosu iha sosiedade nia leet, tanba korupsaun iha sosiedade susar atu bele halakon.

Taur informa sidadaun ne'ebé halo korupsaun presiza ba hatan iha Tribunál atu bele hatudu ba sidadaun sira seluk hodi hatene katak, korupsaun sai hanesan moras ne'ebé hamate mentalidade sosiedade ninian.

Situasaun TL agora ne'e korupsaun mosu iha parte barak, maibé esforsu ne'ebé estadu iha atu bele halo kontrola ba iha korupsaun iha rai laran ne'e komesa kria ona komisaun no hala'o dadauk servisu, maibé ho situasaun no kondisaun ne'ebé presiza la'o neneik.

Iha tinan 2013, eis Ministra Justisa, Lúcia Lobato hetan pena prizaun tinan lima husi Tribunál tanba deskobre involve iha kazu korrupsaun.

Hafoin halo tinan ida resin iha prizaun PR Taur fó indultu iha loron Konsulta Popular 30 Agosto tinan ne'e.

Desizaun ne'e foti bazeia ba rekomendasaun Governu nian katak, kondenada Lucia merese liberdade, tanba haree husi fator umanismu. Lucia hetan moras iha prizaun laran no liu husi prosesu naruk mak foin bele halo tratamentu saúde iha rai liur.

Hafoin desizaun Prezidente Taur, Lucia mós rekoopera saúde no oras ne'e deskansa iha uma.

Maski nune'e, Lucia hetan fali akuzasaun foun husi Ministériu Públiku, tanba deskonfia involve iha korrupsaun.
.

Komunidade Laga Ezije Rezultadu Operasaun KRM no CPD ba Taur

.

Timor Post- 25 Setembru 2014

Baucau- Komunidade sub distritu Laga, Distritu Baucau, ezije Prezidente Repúblika (PR) Taur Matan Ruak atu esplika kona-ba rezultadu operasaun ba grupu ilegál tinan kotuk hanesan Konsellu Revolusaun Maubere (KRM) no mós Konsellu Demokrátiku-Repúblika Demokrátika Timor-Leste (CPD-RDTL).
.
"Hanesan komunidade ami hakarak husu no hatene kona-ba operasaun konjuntu ne'ebé mak foin dadauk halo ba grupu KRM no mós CPD-RDTL iha Lalulai ne'ebé mak ema hotu hatene no balu dehan tan katak ami sub distritu Laga ne'e risku mean hotu," hatete komunidade Filipe Barreto liu-hosi diálogu ne'ebé maka halo hosi Prezidente Repúblika Taur Matan Ruak ho komunidade sira iha suku Tequinomata, sub distritu Lafa, distrito Baucau, Segunda (22/09).

Nia dehan, to'o agora komunidade iha sub distritu Laga rasik seidauk hatene lolos kona-ba rezultadu operasaun ba grupu rua ne'e maka tuir governu ilegál no la merese atu ezisti iha pais ne'e.

Aliende ne'e, Augustu Fernandes reforsa tan, governu no estadu presiza halo esplika ne'ebé maka detalu kona-ba rezultadu operasaun nian tanba maiória komunidade kontinua halo pergunta operasaun.

"Ami loron túr husu malu dehan operasaun ba grupu rua ne'e hotu ona ga seidauk tanba depois governu hasau rezolusaun halo operasaun ba grupu rua ne'e no la esplika klaru kona-ba nia rezultadu liu-liu ba komunidade Laga," hatete Augustu.

Responde ba ezijensia komunidade suku sub distritu Laga, Prezidente Repúblika hatete, oras ne'e dadaun operasaun hotu ona tanba ne'e husu ba komunidade sira atu harii unidade no páz iha rai laran hodi dezenvolve nasaun nurak ida ne'e.

"Buat sira ne'e liu hotu ona tanba ne'e husu ba imi hotu atu hametin unidade no páz iha rai laran tenke serbisu hamutuk hodi lori nasaun ne'e ba oin. Sé ita la hamutuk susar ba ita atu dezenvolve rai ida ne'e," nia dehan. (jxn)
.

TDD Seidauk Simu Akuzasaun MP Ba Kazu Mauk Moruk

.

Timor Post-25 Outubru 2014

Díli- Sesaun séntral iha Tribunál Distritál Díli (TDD) to'o oras ne'e seidauk simu prosesu akuzasaun hosi Ministériu Públiku sobre kazu Mauk Moruk.

"Ministériu Públiku seidauk haruka akuzasaun Mauk Moruk mai, sesaun sentrál Tribunál Distritu Díli," dehan fonte konfirmadu ba Timor Post iha sesaun sentrál TDD, Tersa (23/09).

Antes ne'e, Tribunál Distritál Díli liu-hosi rezultadu interogatório, Sábadu (15/03), kondena líder Konsellu Revolusionariu Maubere (KRM), Mauk Moruk ho Komandante Labarik hetan prizaun preventiva no Cornélio Gama "L7" ho koordenadór CPD-RDTL, Aitahan Matak hetan Termus Rezidénsia (TIR).

"Mauk ho Labarik seidauk iha kondenasaun hasoru sira, maibé sira na'in rua kumpri lai prizaun preventiva, depois kumpri prizaun preventiva foin bele halo audiensia julgamentu," deklara defeza Mauk Moruk ho Komandante Labarik, Paulo Remédios ba jornalista Sábadu (15/03) iha TDD hafoin ramata rezultadu primeiru interrogatóriu.

Tuir nia, hosi informasaun ne'ebé nia asesu, foin lalais Mauk Moruk ba preta ona deklarasaun iha Ministériu Públiku sobre nia kazu, maibé dala ruma prosesu seidauk hotu, tan ne'e, MP seidauk haruka prosesu ne'e mai sesaun sentrál TDD.

Mauk Moruk tama iha sela prizaun preventiva hahú iha loron 15/03 to'o 15/09 (fulan 6 liu ona), maibé nia prosesu Ministériu Públiku seidauk haruka mai sesaun sentrál Tribunál Distritál Díli. (Max)
.

Santina Sei Troka Emília Pires

.

Timor Post- 25 Setembru 2014

"Kuandu Ministra Finansas Emília Pires tuir prosesu julgamentu Tribunál Distritál Díli, Vise Ministra Finansas mak sei troka nia fatin tuir prosesu ne'ebé mak iha,"Vise Primeiru Ministru Fernando Araújo La-Sama dehan ba jornalista sira iha salaun Parókia Same, Manufahi, kinta (18/09), relasiona ho Ministra Finansas Emília Pires ne'ebé deskonfia komete krimi nepotizmu (fó tender ba laen kaben hosi hatama fasilidade Óspital Nasionál).

Antes ne'e eis Vise Primeiru Ministru Mario Carrascalão hatete sidadaun ne'ebé de'it maka deskonfia komete krime de korupsaun hodi hamonu dignidade estadu no nasaun ninian tenke ba tuir prosesu julgamentu tanba sidadaun hotu-hotu iha lei nia okos.

"Ita labele haree ba ema nia kargu ne'ebé maka iha, maibé haree ema hotu hanesan lei nia oion. Tan ne'e, membru governu ne'ebé de'it maka deskonfia komete krimi korupsaun tenki tuir julgamentu tuir lei ne'ebé mak ita iha," Carrascalão hatete.

Bazeia ba informasaun ne'ebé maka iha, ora ne'e Tribunal Distritál Díli rejistu onakazu Ministra Finansas Emília Pires ho númeru prosesu úniku hanesan 12/12/2012/TDD ne'ebé involve arguidu na'in rua hanesan Ministra Finansas Emília Pires no eis Vise Ministra Saúde Madalena Hajam.(tin)
.

quarta-feira, 24 de setembro de 2014

Sidadaun Singapura Lori Halai US$ 57.000

.

Jornal Nacional Diário- 24 Setembru 2014

Sidadaun Singapura ida ho naran Sou Hok Huan lori halai osan Komite 12 Novembro nian hamutuk US$ 57 .000 (cinquenta e sete mil dollares americanos) ba Singapura.

Sidadaun Singapura ne’e ho inisiativa servisu hamutuk ho Komite 12 Novembro hodi halo koperativa maibe sidadaun ne’e lori halai tiha osan komite 12 Novembro nian ba Singapura.

“Iha komite 12 Novembru, iha kooperativa 12 Novembru nian, ema ida husi Singapura lori halai tiha osan, Kompañeiru sira komite 12 Novemru nian iha sira nia kooperativas, US $57 mil, ema Singapura ida naran Sou Hok Huan,”dehan Prezidente bankada Congresso Nacional de Reconstrução Timorense (CNRT), Natalino dos Santos iha plenaria Parlamentu Nasional (PN), Tersa (23/09).

Deputadu ne’e hatutan, komite 12 Novembro hato’o ona informasaun ne’e ba iha Parlamentu Nasional (PN) atu bele hola konsiderasaun.

Deputado ne’e mós husu ba Sekretária Estadu Asuntus Parlamentares atu hato’o informasaun ne’e ba Ministeriu Negosiu Estranjeiru no Kooperasaun (MNEK) atu bele buka informasaun sidadaun Singapura ne’e nian iha Singapura.

“Iha Segunda (22/09) sira mai fo hatene iha ne’e atu tau konsiderasaun i ha’u husu para señora Sekretária Estadu bele hato’o took ba Ministeriu Negosiu Estranjeirus atu haree tok oinsa tamba ema ne’e lori halai tiha sobreviventes 12 Novembro sira nia osan,”dehan Natalino dos Santos.

Iha fatin hanesan Sekretária Estadu Asuntus Parlamentares, Terezinha Viegas informa katak, husi preokupasaun sira ne’ebé membru Parlamentu hato’o nia parte sei en Camiña ba Governu liu-liu Ministeriu kompetente hodi haree ba kazu ne’e.dgx
.

Tempu Badak, PN Sei Eleje Kandidatu Ba PDHJ

.

Jornal Nacional Diário - 23 Agostu 2014

Kandidatu nain tolu (3) ba Provedor Direitus Humanus no Justisa (PDHJ), Silverio Pinto Baptista Maria, Francisco Maria de Vasconselhos no Oracio de Almeida, kompleta ona karta aseitasaun tanba ne’e iha tempu badak Parlamentu Nasional (PN) sei halo eleisaun.

“Sira nain tolu ne’e kompleta ona dokumentu no sira aseita ona,”informa Prezidente Interinu Adérito Hugo da Costa iha plenaria PN, Segunda (23/09).

Segundu Vice Prezidente PN ne’e hateten, kandidatu nain tolu ne’e mak kompleta ona dokumentus tamba ne’e liu husi konferensia lideres bankada partidus politikus iha Parlamentu Nasional diskuti ona hodi hala’o eleisaun iha tempu badak, nune’e bele troka atual Provedor Sebastião Dias Ximenes tanba tempu liu ona.

Alende ne’e Segundu Vice PN ne’e mós adianta katak, kona ba Komisaun Funsaun Públiku (CFP) nian meja PN anunsia ona iha plenaria no iha konferensia lideres bankada partidus politikus iha PN.

Tamba ne’e Prezidente ezersisiu, Adérito Hugo husu ba deputadu sira atu bele prepara nune’e iha tempu badak bele halo eleisaun ba Komisariu KFP nian.

“Komisaun Funsaun Públika nian mós meja anunsia ona iha plenaria no mós iha konferensia da lideres bankada nian para señor deputadu sira hatene no akompaña hodi nune’e kuandu ejiji iha tempu badak halo eleisaun, kandidatu hot-hotu priense ona rekejitus hotu atu hahú halo eleisaun,”Prezidente ezersisiu ne’e hateten.

PDHJ no Komisariu KFP nia mandatu remata ona iha fulan hirak liu ba tamba ne’e oras ne’e dadauk PN hahú fihir ona Timor-oan ne’ebé mak iha kapasidade hodi troka PDHJ no KFP nian.dgx
.

Komunidade Laga Krítika PR Taur

.

Jornal Nacional Diário - 23 Setembru 2014

Komunidade Subdistritu Laga, Distritu Baucau, iha diálogu Komunitária iha Suku Tequinomata, Segunda (22/09), krítika maka’as hasoru Prezidenti Repúblika (PR) Taur Matan Ruak, tanba fó indultu ba prizioneira eis Ministra Justisa (MJ), Lúcia Maria Brandão Lobato, iha fulan kotuk.

Tuir Xefi Suku Samalari João de Deus Xavier no Xefi Suku Sagadate Aureliano de Jesus, Sub-Distritu Laga Distritu Baucau, iha diálogu komuidade ho Prezidenti da Repúblika Taur Matan Ruak, iha Aldeia Caicasalari, Suku Tequinomata, Segunda, (22/09).

Lider Komunitáriu sira ne’e konsidera, Xefi Estadu Taur Matan Ruak rasik kumpri ninia promesa ne’ebé mak nia halao ba povu Timor tomak, iha kampaiña eleitorál ne’ebé mak hateten katak sé karik eleitu duni sai Prezidenti mak sei latolera ema ne’ebé halo korupsaun.

Maibé iha realidade, PR fó livre ba ema ne’ebé halo korupsaun. “Ami triste tebes wainhira rona ita boot (Prezidenti-red) fó indultu ba ema ne’ebé mak halo korupsaun ou naok povu nia osan tanba uluk iha ita bo’ot nia kampaiña ita bo’ot rasik mak promete katak sei latolera ema ne’ebé mak naok povu nia osan maibé ikus mai sai oin seluk,” hateten Xefi Suku, João de Deus Xavier.

Entretantu Xefi Suku Sagadati mós hatutan tan katak, sente triste tebes, tanba to’o oras ne’e korupsaun kontinua buras iha rai laran, tanba iha funsionáriu balun ho level ne’ebé mak ki’ik, maibé iha kareta no hela iha uma ne’ebé mak di’ak tanba ida ne’e presiza halo investigasaun.

Iha fatin hanesan, Casimiro Ximenes nu’udar komuidade husi Aldeia Itidao mós hateten katak, ho indultu ne’ebé mak Prezidenti da Republika fó ba eis prizioneira Lúcia Lobato bele espasu ba membru governu sira atu kontinua halo korupsaun, no sei latauk justisa.

Tanba iha hanoin katak, sé halo korupsaun mós, ikus mai sei hetan perdaun husi Prezidenti da Repúblika rasik.

“Ema na’ok povu nia osan depois tama kadeia Prezidenti ba hasai fali ho ida ne’e fó espasu ba membru governu balun kontinua halo korupsaun tanba sira iha hanoin ida katak, depois naok tiha tama komarka lakleur deit ita sai fali ona, tanba hetan perdaun husi PR. Ida ne’e ami lasimu no husu PR nia esplikasaun,” dehan Casimiro Ximenes.

Responde ba krítika sira ne’e Prezidenti da Repúblika, Taur Matan Ruak, hateten katak nia fó indultu ba Lúcia Lobato tanba nia hetan ona kastigu, maibé nia lakontinua kontra korupsaun no husu Komisaun Anti Korupsaun (KAK) kontinua halo investigasaun ba sira seluk.

“Ha’u fó indultu ba Lúcia tanba nia hetan ona kastigu durante tinan ida resin, maibé ha’u kontra korupsaun, sé mak naok povu nia osan liu husi korupsaun tenke investiga nafatin no ba hatán iha tribunál depois ba komarka ita labele tolera ema koruptór no ha’u dehan ona ba sira ne’ebé naok osan ki’ik depois tama komarka sira ne’e naok beik ten hakarak naok ne’e naok to’o miliar depois ba komarka tinan sanulu resin sai fali ona no goza mas ida ne’e la’e naok oituan deit depois ba komarka,” dehan Taur Matan Ruak.may
.

Xanana Sei Realiza Kumprimisu

.

Timor Post - 24 Setembru 2014 

Díli-Konselhu Politiku Nasionál partidu Congresu Nasional Rekonstrusaun Timor (CNRT), Aderito Hugo da Costa fiar katak Prezidente Partidu sei realiza kumprimisiu ba remodelasaun no re-struturasaun ba governu. 

“Primeiru Ministru mak deside sé mak atu tama iha lista remodelasaun no re-struturasaun, maibé atu hahú bainhira Primeiru Ministru mak deside. Ita fi’ar Primeiru Ministru sei realiza kumprimisu atu konkretiza nia promesa iha públiku, “atual Vise Prezidente Parlamentu Nasionál hatete ba jornalista sira iha uma fukun, Tersa (23/9). 

Nia afirma, liu hosi konferensia extra-ordinariu kuadru no delegadu partidu CNRT deside ona fó kompetensia no mandatu tomak ba Prezidente Partidu nu’udar PM indizitadu atu bele halo remodelasaun no re-strutura ba V governu konstitusionál ne’ebé mak ho strutura 55. 

 Relasasiona ho informasaun ne’ebé mak espalla iha públiku katak, PM semana hirak liu ba bolu ona entidade kapasitadu hosi partidu opozisaun FRETILIN atu tama lista remodelasaun hodi troka membru governu sira ne’ebé mak sei katik hosi prosesu remodelasaun. 

“Primeiru Ministru iha direitu perogativu, nia bele halo komunikasaun politiku ho forsa polítiku partidu sira ne’ebé mak asentu iha Parlamentu Nasionál, nia livre atu eskolla ba ninia postura governasaun no haree ba polítika iha Parlamentu Nasionál, “Adérito dehan. 

Maske iha partidu balun ne’ebé mak iha Bloku Koligasaun la prontu atu simu remodelasaun no reestrutura, tuir politiku nasionál partidu CNRT afirma, ukun atu responde ba mandatu ne’ebé mak povu fó fi’ar. 

“Importante atu serve povu no hadi’a dezenvolvementu rai laran, la’ós kestaun grupu ida nian ka partidu ida nian, nune’e respeita konfiansa povu fó iha eleisaun jerál ba mandatu tinan lima, “Adérito afirma. 

Ho postura polítika ne’ebé mak ohin loron iha deputadu sira espera katak governu ida sei reprezenta duni povu, tanba iha pratika iha prosesu ne’ebé mak Timor-Leste fó apoiu ba Guine-Bisau ohin loron ema hotu elojia, tanba governu ida forma hosi governu Guine-Bisau la-haree ba kór polítiku, maibé haree ba kapasidade hosi kuadru tomak. 

“Importante mak realiza povu nia mehi no promesa ne’ebé mak partidu polítiku sira kampaña ona iha eleisaun liu ba, “katak tan.
,

Irregularidade iha Ministériu Tomak, Xanana Hamosu Diagnostika Nasionál

.

Jornal Independente- 24 Setembru 2014

Díli- Sekretariu Estadu Fortalesimentu Institusional (SEFI), Francisco da Costa "Borlaco" hatete. Primeiru Ministru Xanana Gusmão aprova ona diagnostika nasionál hodi halo re-verifikasaun ba makina Ministériu sira.

Tanba tuir rejultadu monitorizasaun no fiskalizasaun ba ministériu hotu durante ne'e, SEFI identifika kontinua mosu mal-administrasaun, irregularidade no mal-jestaun iha V  Governu Konstitusional.

"Hamosu buat ne'ebé mak foun i ita presiza mos halo mudansa, maibé diagnostika nasionál ita hahu uluk iha Ministériu Saúde (MS) no Ministériu Obras Públika (MOP), tanba kompleksu hanesan Ministériu  Saúde halo atendimentu ba publiku no Obras Públika nia komplesu moos boot liu," hatete SEFI, Borlaco ba jornalista sira, Tersa (23/09), iha oficiu RTTL Caicoli, Díli.

Diagnostika Nasionál ne'e kompostu husi reprejentante Prezidente Repúblika, Parlamento Nasionál, PM, Vise PM inklui liña ministériu tomak.

Objektivu kria Diagnostika Nasionál ne'e, atu halo re-verifikasaun pratika ba servisu ministériu sira nian atu halakon iregularidade iha futuru.

Aliende ne'e, objetivu hamosu jestaun ne'ebé foun hodi uza hadi'a servisu administrasaun públiku tomak.

"Hotu-hotu estado tomak ita tenke halo fila para hadi'a fila, re-verifikasaun pratika, ita nia hahalok, Ministériu no ukun nia hahalok tinan sanulu liu ba ita tenke haree fila-fali para hadi'a fali ita nia-an. Ita hadi'a ita nia an iha ne'ebé, iha ita nia vizaun ita nia konsiensia, ita nia jestaun hotu kedas inklui sistema tenke muda no hadi'a fali," hatete Borlaco.

Programa ne'e, Governu liu husi Sekretariu Estadu Fortalesimentu Institusionál ne'ebé akompaña husi ajensia internasionál United Nations Development Program (UNDP) halo ona nia lansamentu iha loron hirak liu ba.

Nia dehan, diagnostika ne'e la'os de'it iha ministériu nivel nasionál, maibé sei ba too iha diresaun ministériu nian iha distritu sira,

"Ita tuun ba foti dadus, halo diskusaun grupu, no depois ita halo analiza faillansu situasaun ne'e iha ne'ebé loos katak ita nia vizaun mak seidauk di'ak ka lideransa mak seidauk di'ak , estrutura seidauk di'ak tenke hadi'a, komunikasaun seidauk di'ak, ita nia kultura organizasaun seidauk di'ak tenke hadi'a mós," dehan Borlaco.

Bainhira remata Dianostika Nasionál ne'e, SEFI sei rekomenda liu husi inkontru Konsellu Ministru hosi diskuti no hadia faillansu ne'ebé maka mosu.
.

ConocoPhilips Rezeita Subar Faktus Mafiozu Bobby Boye

.

Jornal Independente- 24 Setembru 2014

Díli- Kompañia Internasionál ConocoPhilips rejeita akuzasaun Governu katak subar faktus hahalok Bobby Boye nu'udar mafiozu perigu ida.

Semana kotuk, iha edisaun diariu ne'e, katak Governu Timor-Leste liu husi Ministériu Petroleo no Rekursu Minerais (MPRM), Alfredo Pires duun kompañia ConocoPhilips ne'e subar hahalok Boye hanesan mafiozu antigu ida no too ikus lori halai lakon osan estadu nian.

Husi akuzasaun ne'e, kompañia ConocoPhilips iha Díli responde katak akuzasaun governu nian ne'e lalos.

Kompañia Internasionál husi Estadus Unidos Amerika ne'e hatoo nia rejeitasaun liu husi karta iha tersa, horseik.

Iha karta ne'e hatete, kona ba mafiozu Boye, Conoco Philips hatoo tiha ona ba Governu Timor-Leste antes, en relasaun ho avaliasaun impostu ne'ebé Boye halo.

"No ami hatoo duni ba advogadu Timor-Leste Pierre richaer Prosper bainhira ami hetan informasaun katak Bobby Boye ne'e uluk hetan tiha ona sentensa krimi ho naran alias Bobby O. Ajiboye," hatete karta Conoco Philips ne'ebé diariu ne'e asesu horseik.

"Tuir ami nia haree katak Governu Timor-Leste no ConocoPhilips hetan hotu impaktu makás husi Bobby Boye nia hahalok. Ita nia laran sempre la kontente bainhira ema ida de'it nia hahalok bele lori impaktu negativu boot hanesan ne'e," iha karta ne'e hateten.

Maibé, karta ConocoPhilips hatete, ConocoPhilips fó valor aas ba ninia relasaun ho Governu Timor-Leste no iha komitmentu nafatin atu la'o hamutuk ba oin.

Ho esperansa katak relasaun ne'ebé halo metin iha tinan hira nia laran ne'e bele buiras no sai makás liu tan.

Edifisiu ConocoPhilips hatete, tinan 11 tiha ona mak ConocoPhilips opera kampu Bayu-Undan no ConocoPhilips orgullu ho relasaun ne'ebé forma tiha ona hodi bele fó benefisiu ba komunidade tomak.

Historikamente Bayu-Udan kontribui 90% resin ba rendimentu kada tinan TL tanba biliaun $17 mak ConocoPhilip ho konsorsiu Bayu-Undan hatama ba Timor-Leste nia Fundu Petroliferu husi tinan 2004.

Alende ne'e Karta ConocoPhilips dehan, pagamentu impostu no pagamentu fahe produsaun ba Governu ConocoPhilips no Konsorsiu Bayu-Undan hala'o programa investimentu komunidade nian.

Atividade sira ne'e mós fó oportunidade ba empregu no treinamentu, provisionamentu lokal no kapasitasaun iha komunidade ba area hanesan edukasaun, saude, protesaun meiu ambiente no arte.

Maibé tuir karta Conoco katak, resentemente media fó atensaun impostu balun ne'ebé servisu impostu Timor-Leste hasai kontra ConocoPhilips no membru konsorsiu Bayu-Undan sira seluk husi 2010.

"ConocoPhilips hatama ona prosesu iha Tribunál Timor-Leste nian no arbitrasaun internasionál atu rekopera ka hetan fila fali dolar tokon atus rua resin hat ba impostu no multa ne'ebé ConocoPhilips selu ho protestu," dehan karta ne'e.

Tuir dadus katak, Bobby Boye (la'os naran loos) haruka husi nasaun Noruega hosi sai asesor ba Ministra Finansa nian. Maibé mandatu seidauk remata, nia lori halai ona osan estadu nian ho montante millaun $3.5 dolar amerika.

"Kona ba aaesor ne'ebé mai nasaun Noruega mak fó asesor ne'e mai ita, ikus mai asesor ida ne'ebé ho backgroound la di'ak," dehan Alfredo ba jornalista sira foin lalais.

Alfredo lamenta tebes ho atitude ConocoPhilips ne'ebé lolos hatene hahalok Bobby Boye nu'udar mafia perigu ida, maibé la informa ba Governu.

Aliende ne'e, FBI Amerika mós husu Timor-Leste atu nonok ba kazu Bobby ne'e, tanba tauk halai sai husi Amerika ba fali nasaun seluk.
,

terça-feira, 23 de setembro de 2014

Matadalan Áswa’in

,

Maktuik: Sita Kehi -Juzito Rebelo- Dili, Timor Leste: 20 de Setembro de 2014

Uluk áswa’in, ohin asulear
Uluk sira tane, ohin sira riba
Uluk sira hahí, ohin sira hotar
Uluk sira hawelok, ohin sira haklelek
Uluk sira hana’i, ohin sira hakribi
Uluk sira hadomi, ohin sira heuwa’i
Maibé istória sei hafolin ó nia kolen
Maibé istória sei tane, hahí no hawelok ó nia kmanek
Maibé istória sei hakerek hodi hamorin nafatin ó nia naran
Hori otas ba otas sei la’
nakotu no sei la’ nanáhas
Katak ó mak matalan
Katak ó mak áswa’in
,

Irregularidade Sosa Kareta ba Bainaka CPLP

.

Timor Post- 23 Setembru 2014

Díli- Deputada bankada FRETILIN, Maria Angelica iha Parlamentu Nasionál (PN) deskonfia membru governu balun involve iha prosesu hola kareta Camry iha simeira CPLP (Comunidade Países de Língua Portuguesa).

"Iha CPLP (simeira) nian ita aprova osan 1,9 miloens hodi sosa kareta Camry 100% ona. Ha'u nia preokupasaun mak ne'e oinsá prosesu kareta Toyota Camry hamutuk 30 ba bainaka CPLP, folin hira. Tanba ita rona ministru balun nia kaben involve iha laran," deputada Maria Angelica dos Reis hatete iha plenária PN, segunda, horiseik.

Deputada dehan ida ne'e osan ne'ebé bo'ot no prosesu la'ós lais hanesan prosesu hola kareta Camry.

"Ita kuandu liu hosi provizionamentu entaun ita sei liu hosi tempu, prosesu kleur. Maibé kareta ida hola iha fulan rua no tolu nia laran, ita presija halo investigasaun para hola tuir duni dalan ka lae," deputadu bankada FRETILIN kestiona.

Nia dehan tan ejekusaun orsamentu ba item hola kareta 100% hosi kapitál menor $1.9 miloens, tanba ne'ebé presija iha klarifikasaun hosi ministériu relevante.

"Ministeriu Negosiu Estranjeirus mak sosa kareta ne'e hamutuk ho Ministériu Finansas, sira mak halo prosesu. Tanba ne'e hanesan orgaun fiskalijador ami husu ba governu para aprezenta sobre kareta saida de'it mak sosa, kareta hira no kada folin hira ho prosesu ne'e la'o oins'a," deputada Angelica dehan.

Entretantu Prezidente Nasionál ezersisiu, Adérito Hugo da Costa hatete desijaun hola kareta halo kleur tiha ona, no tuir prosesu normais. Tanba ne'e kuandu deputadu sira lamenta tenke ba halo fiskalijasaun.

"Dalaruma rama bengkel sai bengkel kontinua aat ba bebeik. Kareta ne'e hamutuk 37, ne'e prepara mós ba tinan 2015. Ne'ebé ita sosa la'os para atu uza lor-loron, la'os kareta luxu liu mas tuur iha laran Konfortabel.

"Desijaun ne'e ejekutivu ninian, tanba ne'e deputadu sira iha kompeténsia para buka hatene prosesu hola kareta Camry, iha mekanismu barak tanba ne'e deputadu sira iha direitu atu bele husu governu para halo justifikasaun ba adjudikasaun hola kareta hodi tula bainaka iha simeira CPLP," Prezidente PN exersisiu dehan.

Antes ne'e Primeiru Ministru, Kay Rala Xanana Gusmão hatete kareta 37 pertense ona ba patrimonio estadu.

"Kareta ne'e la'os karun demais, pelo menus bele garante ita nia dignidade, kareta ne'e mós pertense ona ba património estadu, tanba ita uza hodi atende bainaka sira e depois hamoos no rai metin para tinan 2015 ita lalika preokupa," PM Xanana dehan.

Tuir Xefe Governu kareta Camry ne'e sei rai iha fatin lijistika kareta nian iha Balide, tanba Balide sai hanesan ofisina nasionál ba patrimóniu estadu nian.

PM Xanana mós husu ba Ministériu Finansas atu rai didi'ak kareta refere, atu nune'e bele uza iha tempu naruk hodi atende bainaka sira hosi estranjeiru.

Razaun kria ofisina nasionál ne'e PM Xanana esplika, kada tinan governu sempre lakon osan hosi halo manutensaun ba kareta estadu nian, maibé laiha rezultadu pozitivu, tanba kontinua tama de'it ofisina (bengkel).

"Dalaruma tama bengkel sai bengkel kontinua aat ba bebeik. Kareta ne'e hamutuk 37, ne'e prepara mós ba tinan 2015. Ne'ebé ita sosa la'os kareta luxu liu mas tuur iha laran ita sente konfortabel," PM Xanana dehan.

Antes ne'e diretora Patrimonio Estadi Evangêlina Guterres afirma desijaun hola kareta hosi ejekutivu, Primeiru Ministru mak deside hodi sosa kareta atu nune'e bele fasilita tula bainaka sira ne'ebé mak mai halo vizita estadu mai Timor Leste.

Kareta Camry nia folin tuir sekretáriu jerál MNEK, Francisco Cepeda hatete, folin ba kada kareta BMW US$81 mil no kareta ho tipu Camry tun uitoan hosi kareta BMW. (uly)
,

Advogadu Emília Pires Rejista Rekursu Kontra Akuzasaun

.

Timor Post - 23 Setembru 2014

Díli- Advogadu Ministra Finansas, Emília Pires, rejista ona karta kontesta hasoru akuzasaun Ministériu Públiku (MP) iha Tribunál Distritál Díli.
.
Advogadu José Camões lori dokumentu kuaje atus ida resin tama ba Tribunál Distritál Díli (TDD) hodi ba seksaun sentrál iha oras 14:29 ka oras tuku 2:29. Kuaje menutu 10 resin iha sala seksaun sentrál nian, advogadu ne'e rejista duni kontestasaun hasoru akuzasaun Ministériu Públiku. Kontestasaun ne'e rejistadu ona iha Tribunál Díli ho númeru entrada 2267.

"Ha'u foin mai lori dokumentu sira ne'e hodi rejista ba Tribunál. Dokumentu sira ne'e kona-ba Emília Pires nia kazu", hatete advogadu José Pedro Camões ba Timor Post iha Tribunál Díli, Mandarin Segunda (22/09).

Camões hatutan, nu'udar advogadu sempre la'o tuir koridor legál ne'ebé mak iha hodi defende sidadaun hotu kuandu hetan alegasaun hosi Ministériu Públiku kona-ba kazu saida de'it.

Iha dokumentus rua iha ne'e. Ida kontestasaun no ida fali rekursu preliminariu hasoru akuzasaun no juíz natural ne'ebé kaer kazu ne'e," nia dehan.

Nia esplika karta kontestasaun ne'ebé rejista iha Tribunál nu'udar dalan ida atu responde ba Ministériu Públiku nia akuzasaun hasoru Emília Pires kona-ba kazu fornese kamas ba Hospitál Nasionál Guido Valadares iha tinan hirak kotuk.

"Iha parte ida ne'e, Ministériu Públiku halo tiha ona akuzasaun no parte defeza halo defeza liuhosi kontestasaun. Depois mak ita hein Tribunál nia desijaun ne'e atu sai oinsa loos, ita haree de'it," nia esplika.

Ministra Finansas, Emília Pires hetan akuzasaun hosi Ministériu Públiku kona-ba kazu fornesimentu ekipamentu saúde ba Hospitál Nasionál Guido Valadares hanesan kama ba pasiente sira ne'ebé hatama hosi empreza hosi Australia Maz Metal Craft. Nain hosi empreza ne'e mak Emília Pires nia kaben rasin.

Kona-ba kestaun ne'e Tribunál Díli ajenda ona hodi halo julgamentu ba Emília Pires iha Novembru tinan ida ne'e. (Oki)
.

Viajen Estranjeirus Aas, OGE 2014 Hakdasak

.

Timor Post- 23 Setembru 2014

Díli- Deputada komisaun C ne'ebé mak trata asuntu finansa públika, Maria Angelica dos Reis preokupa ho ejekusaun Orsamentu Jerál Estadu (OJE) 2014 ne'ebé mak iha item dezenvolvimentu kuaze zero maibé ejekusaun orsamentu ba viajen estranjeirus sa'e hosi 100 % to'o 300%.

"Ami halo ánaliza no sai preokupasaun bo'ot ba ita orgaun fiskalijador, tanba ejekusaun ministériu hotu-hotu iha dezenvolvimentu kapitál menor kuaze zero, agora ejekusaun ba viajen estranjeirus hosi ministériu tomak sa'e 100 ital to'o 300 ital pursentu, no orgaun Parlamentu Nasionál mós sa'e to'o 116%, deputada Maria Angelica hatete iha plenária (22/09), PN, Díli.

Tanba ne'e deputada husu Governu atu esplika klean sobre ejekusaun orsamentu ba kapitál dezenvolvimentu, tanba saida mak estrada kontinua kuak nafatin no bee moos sai nafatin problema ne'ebé maka nunka rezolve.

Kona-ba ejekusaun dezenvolvimentu kapitál umanu, polítika estradu preve osan atu asegura joven ba eskola bolsu estudu hodi hasa'e rekursu umanu. Tanba durante ne'e iha bolseiru timor-oan ba liur infrenta problema kona-ba finanseiru maibé orsamentu kapitál umanu governu ejekuta seidauk atinji 50%.

Alende ne'e deputadu Virgilio da Costa Hornai hosi bankada PD husu atu governu tenke halo jestaun ba rekursu umanu ne'ebé mak hetan kapasitadu hosi orsamentu bolsu estudu.

"Ha'u hanoin redifinasaun ba numeru funsionáriu atu nune'e kolioka tuir nia méritu," deputadu Hornai dehan.

Entretantu Sekretaria Estadu Parlamentar (SEAP), Maria Terezinha Viegas afirma, sei hato'o deputadu sira nia preokupasaun ba ministériu relevante.(uly/mj6)
.

Kazu Foun Lúcia Lobato:Deskonfia Tendénsia Vingansa

.

Timor Post- 23 Setembru 2014

Díli- Responsável AVR Aquilino Guterres alias Ete Uku, haree hosi aspeitu politiku, deskonfia momos kazu foun eis kondenada Lúcia Lobato iha tendénsia vingansa polítiku tanba kazu rua ida antes ho foun ne'e hanesan de'it. Lazu ne'e krimi partisipasaun ekonomia maibé nusa prosesu la'o ket-ketak.

"Ha'u só haree iha lójika politika ninian. Ha'u lakohi tama to'o área judisiáriu tanba ha'u nia kapasidade la to'o.Maibé nu'udar ema politiku no ha'u lé jornal no haree fiha televisaun fó sai katak kazu Lúcia Lobato iha dahuluk no nia kumpri ona prizaun tanba prátika korupsaun ho osan $4000, nia simu tinan lima prizaun. Maibé agora Ministériu Públiku akuza tan ho kazu foun ne'ebé deskonfia partisipasaun ekonomia, kazu ne'e tipu ida ne'e nusa nia prosesu la'o ket-ketak?

Maibé ema balun pratika koruptu liu ida ne'e tuir lojika polítiku iha diskonfiansa kazu foun Lúcia Lobato mosu tendénsia polítiku," informa Ete Uku ba jornalista iha Hotel katuas, Segunda (22/09).

Antes ne'e tuir Prezidente Tribunál Distritál Díli (TDD) Duarte Tilman informa, kazu foun eis kondenada Lúcia Lobato, Tribunál distribui ona ba Juis ne'ebé maka atu kaer prosesu refere, hodi hein de'it ba julgamentu. Tanba Tribunál distribui ona ba juis ne'ebé kaer prosesu. No tuir akuzasaun hosi Ministériu Públiku ba kazu foun eis kondenada Lúcia Lobato prátika krimi partisipasaun ekonomia relasiona ho projetu reabilitasaun Prizaun Gleno.

Nia hatutan, haree hosi perspektiva politiku, triste tebes haree situasaun ida ne'e hasoru eis kondenada Lúcia Lobato. Keta lei maka nune karik, ita la'os ema jurista, maibé triste tebes.

Lolos, tuir nia, Ministériu Públiku tenke tau prerioridade ba kazu Boby ema estranjeru ne'ebé lori povu nia osan ho montante boot halai, tanba ne'e krimi públiku, inklui membru governu ne'ebé tuir novidade Komisi Pembenrantas Korupsi (KPK) Indonézia. Lolos MP halo ona prosesu investigasaun hosi identifika osan hosi ne'ebé sira halo uma iha ema nia nasaun.

"Ezemplu kazu rua mensiona iha leten ne'e krimi públiku.La presiza ema ba hato keixa, maibé ida ne'e Ministériu Públiku nonók no tau prioridade ba kazu Lúcia Lobato. Ida ne'e ha'u haree hosi lójika politiku ida deskonfia maka'as ódiu vingansa, maibé ita la hatene MP mós iha rajaun," nia hatutan. (Max)
.

quinta-feira, 18 de setembro de 2014

Kazu Foun Lúcia Hein Julgamentu

.

Timor Post - 18 Outubru 2014

Díli - Prezidente Tribunál Distritu Díli (TDD), Duarte Tilman informa, kazu foun eis kondenada Lúcia Lobato, Tribunál distribui ona ba juiz ne'ebé maka atu kaer prosesu refere, hodi hein de'it ba julgamentu.

Duarte Tilman hato'o kestaun ne'e ba Timor Post iha nia knar fatin, kuarta (17/9).

Antes ne'e defeza Lúcia Lobato, José Pedro Camões katak, to'o oras ne'e nia parte seidauk hetan informasaun hosi nia kliente, sobre akuzasaun foun hosi Ministeriu Publiku ba nia kliente.

"Ha'u pesoalmente seidauk hatene, Ministériu Públiku akuza tan Lúcia Lobato. Lolos nia nain maka hatene prosesu ne'e uluk, notifika uluk nia, agora hanesan advogadu ha'u seidauk rona no hatene," dehan Camões ba TP iha Tribunál Tersa (16/9).

Tuir nia, prosesu ne'e Tribunál distribui kleur ona, no oras ne'e ema fó sai los iha media komunikasaun sosial sira, hanoin ema barak akompaña.

"Ha'u koalia fil-fila ona, kazu eis kondenadu Lúcia Lobato hein de'it julgamentu ou bele lae, mais Prezidente TDD ne'e la deklara klaru, rajaun saida dehan laiha tanba okupadu ho serbisu, mais husu atu hein de'it  to'o julgamentu," hatutan nia.

Iha oportunidade ne'e nia husu públiku atu kalma labele ansi para sira konsentra hodi halo serbisu, prosesu hotu sempre la'o tuir nia dalan, tan ne'e, husu imi públiku nia komprensaun hein to'o prosesu ne'e la'o julgamentu.

Entretantu tuir informasaun ne'ebé Timor Post hetan iha Tribunál Díli katak, Ministériu Públiku hato'o akuzasaun ne'e ba iha seksaun sentral Tribunál Díli iha loron Kinta (11/09) lorokraik kuaje 16:24 ka oras tuku 4:24. Entrtantu, Juíz Administrador Tribunál Distritu Díli, Duarte Tilman rekonese katak, Tribunal Díli simu ona akuzasaun foun ne'e hosi Ministériu Públiku no oras ne'e dadauk sei iha hela prosesu laran hodi halo distribuisaun ba juiz prosesu. (Max)
.

Mandatu Maijor Lere Remata iha Outubru 2015

.

Jornal Independente - 18 Outubru 2017

Díli- Komandante F-FDTL, Maijor Jeneral Lere Anan Timur, sei remata nia mandatu iha fulan Outubru 2015.

Maibé terminasaun ba nia kargu nu'udar Komandante F-FDTL ne'e kompetensia governu nian tanba kareira ne'e hanesan kareira politika.

"Ha'u nia kargu ne'e desijaun politika, governu dehan atu prolonga ba tinan ida (ka) rua pasiensia ita aguenta," dehan Maijor Lere ba jornalista sira hafoin soromutu ho Prezidente Repúlika, Taur Matan Ruak, iha Palasiu Prezidensial Nicolau Lobato, horiseik.

Nia dehan, nia sei simu kualker desizaun ne'ebé governu foti. Bainhira haruka nia para, nia simu no se husu atu kontinua, nia sei simu mós.

Kona-ba enkontru semanal ho PR Taur, Lere dehan, nia informa kona-ba situasaun jeral iha Timor Leste no koalia mós kona-ba vizita veteranus Indonezia mai Timor-Leste foin lalais.
.

Calistro Aprezenta Aan Ba Komandu Jerál PNTL

.

Jornal Independente - 18 Setembru 2014

Díli - Eis Komandante Servisu Investigasaun Kriminal Nasionál (SIKN), Calistro Gonzaga, aprezenta aan ba Komandu Polisia Nasionál Timor-Leste (PNTL).

Komandante Jeral PNTL, Komisariu Longuinhos Monteiro dehan, Calistro mai hodi aprezenta aan ba PNTL.

Nia dehan, praju medida prevensaun ba Calistro, loron 180, remata ona, tanba ne'e, Calistro tenke aprezenta aan periodikamente ba PNTL hodi hein desizaun Tribunál.

"Laiha dalan seluk, nia (Calistro) tenkeser mai fila fali, laos dehan atu servisu, nia tenkser mai fila fali hodi aprezenta aan, aprezenta periodikamente hodi hein desizaun Tribunal ninian," dehan Komisariu Longuinhos ba jornalista sira iha Kuartel Jerál PNTL, horiseik.

Nia dehan, PNTL kontinua hein desizaun husi Tribunal Rekursu molok foti prosesu disiplinar ba Calistro.

"Ami ezije nafatin Tribunal Rekursu tenke fó desizaun ruma par ita bele haree took ninia prosesi disiplinar lao oinsa," dehan nia.
.

quarta-feira, 17 de setembro de 2014

MAUN TAUR AMI LAOS BEIK KA IGNORANTE, MAUN MAK BOSOK POVU

.

OAN KIAK

Ha'u lee Maun Taur nia diskursu iha PN kona ba indultu que nia fó ba Mana Lucia Lobato no ha'u hanoin kala Maun Taur no nia media sira hanoin que POVU beik no sira hakarak soe rai rahun ba ita nia matan.
.
Diskursu badak sira publika ho lia ingles iha sira nia Facebook dehan "I SAW SOME CRITICISMS, WHICH DEMONSTRATE IGNORANCE – AND WHICH ARE UNFAIR " - "Ha'u haree kritikas balun que hatudu ema nia beik no la justu".

Kala imi hotu hanoin que ami ema beik duni no imi mesak mak matenek no bele halo diskursu tun sae, habosok ema hotu no ami rona de'it no nonok, tanbá saida de'it mak imi dehan, povu tomak tenki hakruk.

Maun Taur ami laos beik ka ignorante, Maun mak bosok povu uainhira fó indultu ba itaboot nia belun koruptor no katuas ida que halo violasaun sexual ba nia beionan rasik. Imi bosok, ami mak sala? Ida ne'e la loos  Maun Taur, tanbá Maun la honestu ho Povu Maubere, Maun uja Maubere Oan ba hetan poder no depois hanesan sira seluk buka de'it famozu no pior liu haluha no bosok fali povu hodi hanehan Maubere Oan sira.

Maun mós dehan katak indultu ba Mana Lucia la halo interfrensia iha setór  justisa. Maun Taur nia hahalok hafraku tebes setór ne'e no haforsa koruptor sira, Maun boot bele dehan saida de'it maibé realidade mak ne'e, ita lalika matenek boot ba hatene ida ne'e, labarik sira mós hatene que uainhira sira halo sala, karik inan no aman la fó kastigu ba sira, sira hatene que sira bele halo hahalok ne'e beibeik. Ami la'os labarik Maun Taur no ami la'os beik ka ignorante. Tanba ami ignorante mak ita manan funu naruk ida no duni Indonezia hosi ita rai lulik ka? La loos ona.

Maun boot sira tur hela iha poder nia laran no haluha tiha hotu saida que ita hakarak bainhira funu ramata. Timor ida que livre no justu ba Timor Oan hotu, la'os de'it ba imi, tanba ema barak mos funu hodi rai lulik ne'e hetan independensia, imi mesak, ita sei la hetan to'o ohin loron. Imi mau pagador duni.

Imi ho naran boot hanesan Maun Taur no Maun Xanana uja imi nia naran ba halo buat hotu hasoru povu maubere no imi sei iha justifikasaun oin-oin ba hahalok aat que imi halo.Maun Taur dehan que  justisa tenki umanu. Tanbá sá mak umanu de'it ba ema boot, tanbá sá mak umanu de'it ba koruptor sira? Tanbá sá povu kiik labele hetan imi nia justisa? Maun Taur ami povu bele maubeik no kiak ba bebeik maibé imi maun boot sira, uluk heroi boot ba rai lulik ne'e, foin sai maulohi no traidor ba povu, diak liu sai maubeik duke lakon ami nia prinsipiu no dignidade.

Maun Taur promete mós que sei la fó indultu ba ema que pratika krime sexual, saida mak foin halo? Fó indultu ba katuas ida ke halo violasaun sexual ba nia beioan rasik  no depois ita mak beik no inzustu ka Maun Taur?
.
 Justisa no umanismu ba pae Mauk Moruk iha ne'ebé loos Maun Taur?

Imi koalia ba justisa no imi haluha que Komandante FALINTIL ida imi taka iha Prizaun Bekora no haluha tiha nia iha ne'ebá? Imi perdoa otonomistas, kriminozu, koruptor sira maibé tanbá sá mak imi labele hakoak imi nia maluk ida hanesan komandante Mauk Moruk que ohin loron moras no terus iha komarka nia laran. Imi mak haforsa duni injustisa iha ita nia rain lulik ne'e. Krimi saida que Pae Mauk Moruk  halo ba rai doben ne'e? Tanbá sá mak nia sei hela iha komarka ne'ebá Maun Taur? Nia naok povu nia osan? Nia halo saida hasoru Povu Maubere?

Tanbá sá Maun Taur nia fuan kona de'it ba ema aat no korruptor sira? Tanbá sá imi nia umanismu la kona bá luta nain ida ke imi sulan iha hotel Bekora no nunka mais hanoin nia? Pae Mauk Moruk moras iha ne'ebá, imi hanoin nia ka lae? Lae, imi husik imi nia maluk ida terus mesak ika Bekora ne'ebá.Maun Taur iha tan korazen ba dehan Iha Facebook que ami que kritika maka'as imi, ami beik no injustu? Antaun ami atu bolu saida ba imi ukun nain sira? Bolu justu no matenek ka? Keta halimar no sama tan ami Maun boot, ami laos beik, Maun hatene katak se pae Mauk Moruk la ajuda Maun Taur, oras ne'e Maun Taur iha ne'ebé loos, karik lakon ona. Imi sai ema boot no haluha imi nia dignidade no haluha imi nia maluk que terus hamutuk ho imi. Ita nia matebian sei hatudu ba ita hotu lia loos no sei babeur imi hotu.Tanbá justisa no lia loos sempre manan.

Ita nia independensia la'os imi mesak mak hetan, la'os imi mesak mak funu ba rai lulik ne'e, maubere barak fó nia isin, klamar, ruin no ran ba ohin loron imi sai fali ema boot nomos ema traidor ba povu no rai doben ne'e. Imi nia mautabele no maulambe que loron loron defende imi no dehan que ami labele kritika maka'as imi, no halo atake tun sae iha Facebook ba ema que halo kritikas ba imi, tanba sira tauk lakon sira nia kadeira no lakon osan que sira tau iha sira nia bolsu, Maubere nia osan, no sira mós sai traidor ba Maubere nia oan. Imi la'os Maromak, imi tama iha politika, karik imi sala, povu tenki kritika tanba imi demais liu ona, imi ema que laiha moral ona. Imi hanoin ema hotu tenki rei imi nia ain ka? Tanbá sá? Imi mak tenki rei Maubere nia ain, tanba povu mak luta hamutuk ho imi ba rai lulik ne'e hetan independensia, imi mak tenki rei Maubere nia ain tanbá povu mak fó permisaun ba imi sai boot, tur iha kadeira ne'ebá ba servisu ba povu, ba defende povu nia intrese laos ba tur iha ne'ebá ba hanehan povu, ba sama Povu Maubere dala ida tan. Imi mak injustu, imi mak traidor, imi mak moe laiha, la'os Povu Maubere. Kompriende Maun Taur?  

Maun Taur Povu Maubere mak iha Maun boot nia kotuk, la'os koruptor no oportunista sira. Keta trai ami Maun Taur, tanba 2017 Maun boot bele hetan surpreza boot ida, ha'u dehan deit ba Maun Taur keta sai mau pagador.
,
Imi bele hakribi no sama ami, maibé lia loos no justisa sempre manan Maun Taur, ita nia historia hatudo ida ne'e ona ba ita hotu. Ami sei manan dala ida tan. Povu Maubere sei manan dala ida tan.
.

terça-feira, 16 de setembro de 2014

PN Husu Lúcia Lobato Pasiénsia

,

Timor Post - 16 Agostu 2014

Díli -Deputadus iha uma  fukun Parlamentu Nasional (PN) afirma ba Ministra Justisa governu Aliansa Maioria Parlamentar (AMP), Lucia Lobato atu bele pasiensia hasoru akujasaun foun ne’ebé mak agora dadaun rejista ona iha Tribunal Distritu Dili (TDD).

“Kazu ne’e iha desijaun ketak ne’e prosesu foun fali, entaun ida akuzadu (Lucia Lobato) tenke pasiensia ba hasoru fali prosesu julgamentu foun. Normal ne’e tuir sistema justisa, ohin ita sai hosi prijaun aban ho kazu seluk,” deputadu bankada FRETILIN, Antonino Bianco hateten ba jornalista (15/9) iha PN Dili.

Prosesu ida uluk diferente ho prosesu foun ida ne’ebé mak ohin loron Ministeriu Publiku akuza tan konaba rehabilitasaun prijaun Gleno.

“Ne’ebé ha'u hanoin eis ministra Justisa, Lucia Lobato tenke infrenta duni, ne’e ita la halo buat ida tamba sistema Justisa ita mak kria no prosesu lao tuir regras” deputadu Bianco dehan.

Entretantu iha fatin hanesan Vise Prezidente Parlamentu Nasional, Aderito Hugo da Costa hatete, prosesu normal justisa iha nasaun demokratiku sempre la'o nafatin no Ministeriu Públiku mak kaer segredu justisa, tanba ne’e maski eis Ministra Justisa Lucia Lobato hetan ona indultu hosi Prezidente Repúblika Taur Matan Ruak maibé ba kazu foun tenke la'o nafatin tuir prosedura justisa ne’ebé iha.

“Tanba ne’e eis ministra ne’ebé mak hetan ona indultu livre ba kazu ne’ebé mak nia hetan, nia bele livre ho buat seluk, ne’e lae sekarik nia iha hela prosesu investigasaun Ministeriu Públiku ka iha ne’ebé deit nafatin tenke ba prosesu,” deputadu Aderito dehan.

Tanba instituisaun estadu ba justisa mak kaer segredu justisa nune’e nia mak iha direitu tomak atu dezenvolve kazu hodi investiga ema sira ne’ebé mak involvidu.

Atu dezenvolve prosesu kazu ida presija foti evidensia, kuandu forte ona MP bele foti alegasaun hodi haruka ba tribunal hodi halo julgamentu.

“Ba Senhora Lucia Lobato nune’e, indultu nia bele hetan maibe, kuandu kazu sira iha hela prosesu ida agora notifika ona nia tenke halao tuir prosesu justisa,” Aderito dehan.

Eis Ministra Lucia ho nia eis direitora prijaun Gleno alega tan krimi  partisipasaun ekonomika no negosiu ho numeru prosesu 2045/10. PDDIL.
.
Iha loron 30 komemorasaun loron konsulta popular Prezidente Repúblika fó indultu ba eis Ministra Lucia Lobato hodi hetan liberdade hosi komarka Gleno Ermera.
,

Mákina Governu La Funsiona

.
Timor Post
Timor Post - 16 Agostu 2014
.
Díli -Membru Conselu Politiku Nasional (CPN) partito CNRT, Aderito Hugo da Costa idenfika no observa katak membru governu sira ohin loron la halao servisu no hein deit ona remodelasaun.

"Ami observa no identifika ministeriu sira dokumentu barak finaliza hotu ona, maibé membru governu hanesan ministru no sekretariu estadu sira la asina, tamba sira hein hela prosesu remodelasaun. Nune’e afeta servisu lubuk ida. Prosesu lao, hanesan administrasaun, tenderizasaun ba projeitu, ajudikasaun iha, maibé to’o iha meja ministru no sekretariu estadu nian butuk hela, tanba deit remodelasaun ministru sira la brani atu asina buat sira ne’ebé mak finalija tiha ona. Ida ne’e mak planu remodelasaun ne’e lais liu se lae impaktu ba servisu governu nian,” dehan membru CPN nomos Vice Prezidente ba jornalista sira (15/9) iha uma fukun Díli.

Bainhira husu konaba informasaun karik iha remodelasaun no re-estruturasaun Xefe Governu sita ona atu bolu kuadru politiku hosi partidu FRETILIN ne’ebé mak iha kapasidade no profesional iha area relevante atu bele troka membru governu sira ne’ebé mak naran tama iha lista remodelasaun, Aderito Hugo hatan katak bele akontese tanba kna’ar tomak partidu atribui ona ba Prezidente Partidu para deside.

“Ba remodelasaun no re-estrutura situasaun hotu (bolu kuadru kapasitadu FRETILIN-red) bele akontese, durante nia hakarak estabilidade ba governasaun buat hotu bele akontese,” Aderito dehan.

Tanba estabilidade governasaun presija maioria hosi Parlamentu Nasional atu bele asegura liu tan governu ba futuru ho komprimisu atu bele funsiona governasaun to’o remata.

Hosi governu Bloku Koligasaun forma hosi partidu CNRT, Frente Mudansa no PD ho deputadu nain 40 hodi garante estabilidade governasaun.

Tanba ne’e vice prezidente Parlamentu Nasional Aderito dehan, inkontru entre kuadru politiku partidu CNRT ne’ebé mak asumi kna’ar iha governu no Parlamentu Nasional foin lalais sorumutu ho Prezidente partidu iha nia rezidensia koalia liu sobre problema sira ne’ebé mak akontese iha governu. No halo avaliasaun ba membru governu Bloku Koligasaun nia servisu durante tinan 2 inklui kinerja servisu membru governu hafoin partidu mais votadu deklara halo remodelasaun ba V Governu Konstitusional.

Aliende ne’e koalia mos sobre avaliasaun jeral ba situasaun sosial no ekonomia nasaun inklui asuntu justisa no governasaun inklui avaliasaun ba Parlamentu Nasional ne’ebé mak maioria hosi deputadu CNRT.

Tanba ne’e atu halo remodelasaun kompetensia tomak partidu fo ona ba Primeiru Ministru indizatadu atu bele deside remodelasaun no re-estruturasaun ba governu.

Vice Prezidente Parlamentu Nasional afirma, tuir desijaun hosi konferensista partidu CNRT fo kna’ar no mandatu tomak ba Prezidente Partidu nu’udar Primeiru Ministru.

“Nia mak iha poder no desijaun tomak atu bele hili se-se tama iha remodelasaun no re-estruturasaun” Aderito dehan.

Nia espera katak ho situasaun ida agora bele aselera liu tan atu halo remodelasaun nune’e labele fó impaktu ba prosesu administrasaun estadu Timor Leste.

Fó Sai Lista

Iha fatin ketak, Vise Primeiru Ministru, Fernando La-Sama de Araújo deklara katak Primeiru Ministru, Kay Rala Xanana Gusmão deside lista remodelasaun la’os liu husi inkontru segredu ruma, maibé sei fó sai ba públiku. Tanba tuir Vise Primeiru Ministru, dala barak ona Primeiru Ministru deklara ona ba públiku hodi halo duni remodelasaun ba Kintu Governu Konstituisional.

Maski Prezidente Partidu CNRT atual Primeiru Ministru, Xanana Gusmão konvoka inkontru segredu ida hodi koalia kona-ba asuntu remodelasaun inklui deskuti asuntu mina-rai, maibé Vise Primeiru Ministru fiar katak Xanana sei la subar inkontru ne’e.

“Ha’u hakarak hatete katak remodelasaun ne’e la’os buat segredu ida, Primeiru Ministru deside remodelasaun ne’e sei hatete fó sai ba públiku atu halo ki’ik ka atu halo bo’ot tan ka, ne’ebé Primeiru Ministru la subar ida,” Vise Primeiru Ministru, Fernando La-Sama de Araújo ba jornalista sira, iha PN, Segunda (15/09).

Tuir La-Sama, asuntu remodelasaun Primeiru Ministru sei fó sai bainhira fila husi Nova Iorke.

“Kona-ba Bloku Koligasaun ne’e buat ketak, ida dehan membru governu ida la serve ka hasai ne’e kompetensia Primeiru Ministru ninian,” tenik La-Sama.
         
Enkuantu Prezidente Partidu Frente Revolusionário Timor Leste Indenpendente (FRETILIN), Francisnco Guterres ‘Lu-Olo’ deklara, Fretilin seidauk deside atu bele tama iha estrutura governu, maibe fó apoiu ba Primeiru Minstru (PM) atu halo remodelasaun.

“Ami fó apoiu ba PM Xanana halo remodelasaun, maibé ami labele adianta uluk dehan, ami atu ba Ministru ida ne’ebé. Ami seidauk ko’alia ida ne’e”, dehan Lu-Olo iha Parlamentu Nasionál, Segunda (15/09).

Eis Prezidente Parlamentu Parlamentu (PN), hatete, maski PM Xanana husu ba Fretilin atu tama iha estrutura governu ninian wainhira hamosu remodelasaun, maibé Fretilin rasik mós presiza haree no tetu didi’ak hafoin bele deside.

“Ami presiza ko’alia oituan, ne’e la’ós dehan husu ne’ebé ami halai ba de’it. Ami apoiu remodelasaun ne’e”, haktenik Lu-Olo.

Fretilin husu no fó apoiu ba iha PM Xanana Gusmão atu halo remodelasaun ba governu ne’ebé sai hanesan polemika iha rai laran.

“Ami fó apoiu ba PM atu halo remodelasaun, maibé atu halo oinsá ne’e só PM Xanana mak bele hatene ida ne’e”, dehan Prezidente Partidu Fretilin.

Lu-Olo mós dehan, lista sombra ne’ebé durante ne’e espalla iha públiku seidauk bele dehan  los, tanba iha ema ida-ida mak halo sira nia hodi públika.

Entretantu Eugelino da Costa, nudar Estudante Universidade Oriental (UNITAL), Fakuldade Dereitu Semester VI konsidera katak remodelasaun seidauk realize ne’e tanba Primeiru Ministru Xanana tauk.

 “Hau hanesan jerasaun foun no estudante ida rona lia fuan ida remodelasaun, hau triste lahalimar. Uluk  maun boot Xanana promete atu halo remodelasaun, maibe laos koalia deit iha Timor iha mundu Internasional hotu katak nia sei halo remodelasaun ba ministériu sira ne’ebé mak la implementa sira nia programa ho diak, maibe maun boot tauk halo remodelasaun, se lae ministru no sekretariu estadu sira tensaun sae mate iha fatin,”dehan Eugelino ba Timor Post iha kampus UNITAL Becora, Segunda Feira (15/09).

Estudante ne’e relembra katak partido CNRT fpoin lalais halo konferensia estraordinaria no kompromete tenki duni remodelasaun hodi halo mudansa ba estrutura governu.

“Hau hanesan zerasaun foun ida, hau  nia hakarak ne’e remodelasaun ne’e tenki halo duni, se maun boot Xanana mak lahalo remodelasaun husik nafatin hanesan ne’e entaun tinan oin mai, maun boot koalia ema sei lafiar, tanba deit promesa maibé la realiza,” esplika Eugelino.

Nia sugere remodela Ministériu Saúde, Edukasaun, Agrikultura, Turismu, MCIA no Obras Públikas.

Nia tenik, ministru no Sekretariu estadu sira servisu lalos, la tuir nia area, haksoit ba-mai. Tanba ne’e servisu mos lao tuir hanesan ne’e. Se karik remodelasaun ne’e mak akontese governu tenki hare didiak ema mak tau iha ministériu no sekretariu estadu sira, se lae servisu lalao koruptor mak baras iha laran.(uly/vas/jxn/ fer) 
 .

PR Taur Ezijé PN Aprova Projétu Lei Anti Korrupsau

.

Jornal Independente - 16 Setembru 2014

Díli - Presidente República Taur Matan Ruak ezijé ba Parlamentu Nasionál atu aseleira lalais projetu lei anti korrupsaun, tanba lei ne'e importante tebes atu garante kualidade boot ba projetu serbisu sira estadu nian no hamosu instrumentu foun ba serbisu justisa.

Maski Xefi Estado Taur ne'e foin fó indultu ba kondenada korruptu Lucia Lobato tanba tuir nia kompetensia konstitusional, maibe enkoraza serbisu justisa hodi bele investiga no julga ema sira ne'ebé mak involve an iha korrupsaun.

Tanba tuir nia katak, korrupsaun ne'e ladiak, halo tohik estadu no halo fraku nasaun, tanba dezenkoraza investimentu externu no hamosu instabilidade institusionál.

Tan ne'e iha nia diskursu bainhira partisipa iha kongresu terseira lezislatura Parlamentu Nasionál, Segunda horiseik apela ba deputadu sira atu fó importansia ba lei ida ne'e hodi aprova lalais.

Nia mós husu ba Serbisu Investigasaum Kriminál no Tribunál sira tenki sai firme no hasoru korrupsaun no tenki serbisu ho independensia no sein iha interferensia.

Aliende ne'e, Xefi Estadu ne'e mós ezijé ba Parlamentu Nasionál atu altera lei pensaun vitalisia, aprova lei droga, lei rai no lei protokolu estadu nian.

"Ha'u husu ba Parlamento Nasionál no ba Governo atu fó prioridade ba lei sira ne'e, espesialmente lei pensaun vitalisia, lei rai, lei anti korrupsaun inklui lei protokolu estadu," dehan Prezidenti Repúblika Taur iha nia diskursu.

Entretantu Vise Parlamento Nasionál hatete, sei halo tuir ezijensia Prezidenti Repúblika nian hodi tau importansia ba lei hirak ne'e, nune'e bele ajuda dezenvolvimentu Timor-Leste la'o ba oin.

Iha fatin hanesan, PR Taur mós apela ba Parlamento Nasionál atu kria kondisaun hodi prevene no persege krime organizadu.

"Ita tenke reforsa atu halo kombate hasoru trafiku ba ema, inklui trafiku ba feto sira, trafiku droga, nomós fase osan, tanba sira ne'e hafoer konxiensia ema ho neon di'ak,"hatutan Taur.

Taur konsidera katak atividade ne'e bele ameasa nasaun Timor-Leste nia valor no koezaun sosial, inklui bele hamate estadu.

Ne'e duni, sistema justisa, Parlamentu Nasionál no nasaun tomak tenke fó atensaun ba fenomena sira ne'e hodi aprova lei sira. Aliende ne'e hametin an ho rekursu nesesariu atu kombate ameasa sira iha nasaun.
,

Lúcia Lobato foi constituída arguida pelo Ministério Público

.

Timor Hau Nian Doben - 16 de agosto de 2014

No dia 10 de setembro a antiga ministra da Justiça, Lúcia Lobato, foi constituída arguida pelo Ministério Público (MP), num caso de alegada corrupção, noticiou ontem o Jornal Independente.

A nova acusação está relacionada com a reabilitação da prisão de Gleno onde alegadamente "o Estado perdeu muito dinheiro".

Foi constituída também ré no mesmo processo judicial a antiga diretora de serviços da prisão de Gleno, Elena Madeira.

O juiz administrador do Tribunal Distrital de Díli (TDD), Duarte Tilman, confirmou ao citado matutino que já recebeu a nova acusação do MP e que esta seguirá os trâmites legais.

"O juiz do processo é quem tem competência para marcar o julgamento ou rejeitar a acusação", explicou.

O advogado privado de Lúcia Lobato, José Camões, disse ao Jornal Independente que rejeita e afirmou não ter recebido a nova acusação.

A ex-ministra da Justiça  foi condenada a uma pena de cinco anos de prisão pelo TDD, no ano passado, por participação económica em negócio e encontrava-se a cumprir a sentença no estabelecimento prisional de Gleno até ao passado dia 30, quando foi indultada pelo Presidente da República, Taur Matan Ruak.
.