terça-feira, 2 de setembro de 2014

Estadu Timor-Leste ke’e Ruin Saudozu Aquelis Freitas, Ponsiano dos Santos no Joao Teodozu

.
Foto: Maubere Gusmão
Maubere Gusmão

Dia 31 Agostu tinan 2014 estadu Timor-Leste hasai ruin husi Saudozu Aquelis Freitas, Ponsiano dos Santos no Joao Teodozo iha eis fatin Komandu Lobito Baucau. 

Saudozu na’in tolu ne’e hetan oho husi sira nia maluk rezisténsia (Komité Sentrál Fretilin) ba desintedimentu ba estratéjia Luta ba ukun rasik an. Lia la tuir malu entre kuadru Superior sira ba Luta no sira nia diferensa ne’e la too iha konsensus ba simu malu iha situasaun uluk nia. 

Tuir akuzasaun husi komité Sentrál Fretilin uluk nia katak Saudozu na’in tolu nee halo traisaun ba prosesu revolusaun no deskonfia iha kontaktu ho Indonézia. Maske sira mate ona maibé ema barak hatete akuzasaun hirak ne’e laloos.

Saudozu Aquelis nudár ezérsitu Portugés no komandante Kavalaria Iha Atabae no hamutuk harii Komandu Boru Kere iha Kelikai hodi halibur forsa armada tomak ba funu hasoru invazaun Indonézia nia, Ponsiano dos Santos mós hanesan ezérsitu Portugés ida iha Kuartél Jenerál Taibesi ne’ebé organiza kolega Tropas Timor oan sira hodi kontra Portugés, lider ida ba Kontra Golpe ne’ebé UDT halo no nudár komandante Operasaun iha estrutura Komandu Boruqure nia, tuir informasaun katak Saudozu Joao Teodozu lider UDT ida ne’ebé komandu Boruqure nia lider sira mak salva depois nia ba mate hamutuk ho saudozu na’in rua seluk iha Lobito.

Família sira husi saudozu na’in tolu ne’e hetan kuensikunsia kultura ida ne’ebé todan liu tanba funu hasoru Indonézia hotu iha tinan 14 liu ba maibé sira nia ema ne’ebé hadomi seidauk lori fila nia ruin ba nia knua moris fatin ka fatin dignu ruma hodi família sira tau netik lilin no afunan ruma.

 Kee ruin ne’e realiza tanba servisu hamutuk entre Prezidensia Repúblika Timor-Leste nia, Governu Timor-Leste no família sira hudi Saudozu sira nia. Ruin husi saudozu sira agora daudaun tau hela iha Ospitál Nasionál Timor-Leste hodi hein prosesu test DNA no serimónia Funeral.
.

Sem comentários:

Publicar um comentário

Nota: só um membro deste blogue pode publicar um comentário.