quinta-feira, 11 de setembro de 2014

PN Husu Sosiedade TL Labele Monu Ba Desizaun Indultu Ba Lucia

.

Jornal Independente - 11 Setembru 2014

Díli - Parlamento Nasionál husu ba sosiedade sivil Timor-Leste tomak atu labele monu ba desizaun Prezidente Repúblika Taur Matan Ruak hodi fó indulto ba kondenadu korruptu Lucia Lobato, maibé esperitu luta kontra korrupsaun.

"Ita lalika monu ho desizaun Prezidente Republika nian atu hamenus no hatuun ita nia kkompromisu ne'ebé aas tebes ona prevene no kombate korrupsaun," dehan Vise Prezidente Parlamenti Nasionál, Aderito Hugo Costa, iha Parlamentu Nasionál,horseik.

Tuir Vise Prezidente Parlamento Nasionál, Aderito Hugo da Costa katak, desizaun ne'ebé Prezidente Repúblika foti ne'e tuir kompetensia konstituisionalidade.

Tan ne'e, nia husu ba sosiedade sivil, media, akademiku no parte kompetensia ba justisa hanesan Komisaun Anti Korupsaun, Ministériu Públiku no Tribunal kontinua mantein espiritu kombate korupsaun iha Timor-Leste.

Nia dehan, komponente tomak tenki kontinua hamutuk luta kontra korrupsaun atu nasaun ne'e bele atinji tarjetu ba moris di'ak ba povu.

"Hau fiar katak sosiedade tomak nia moral la tuun tanba de'it desizaun Prezidente Repúblika nian, kontinua luta ba kombare korrupsaun," nia afirma.

Maibe nia akresenta, apresia tebes sosiedade sivil no povu baun-bain pozisaun kritiku ba Prezidente Repúblika nia desizaun.

Aliende ne'e ho ezijénsia sosiedade sivil ba Parlamentu Nasionál atu halo lei, tuir Hugo dehan, komesa hanoin ona atu halo lei ida hodi regulariza fó indultu ba prizioneiru sira.

"Ami hanoin ona atu halo dekretu lei ida hodi bele regulariza ba kompetensia konstitusional fó indultu ba prizioneiru sira," nia afirma.

Tanba nia dehan sosiedade tomak iha Timor-Leste nia karakter sensitivu hodi kombate korrupsaun iha Timor-Leste.

Antes ne'e, Prezidente Ezekutivu GOPAC-Timor-Leste, Francisco Miranda Branco hatete, atu responde siruasaun ne'e sei tenta fó hanoin no halo pareser inklui proposta ba Parlamentu Nasionál atu fó perioridade no aprovasaun ba lei amnestia ne'ebé kaduka iha PN atu bele regulariza fó indultu no direitu sira seluk ba prizioneiru nian.

"Ami haree vakum ne'ebé ita iha hodi regulariza ita bele loke dalan para iha abuzu de poder hosi parte sira ne'ebé iha kompetensia konstitusionál atu fó indultu ba prizioneiru sira," dehan nia iha konferensia imprensa iha Parlamentu Nasionál.

Antes ne'e, sosiedade sivil, sosiedade, Parlamentu Nasionál, GOPAC-TL, kontra makas desizaun Prezidente Repúblika Taur Matan Ruak "liberta" korruptu Lucia Lobato ne'e hafoer imajen Timor-Leste iha rai laran no rai liur tanba TL ratifika ona konvensaun Nasoens Unidas (ONU) kona ba kombate korrupsaun.
.
Tuir sira katak, desizaun PR Taur ne'e loke dalan ba korruptu sira no ataka sistematiku ba justisa Timor-Leste.

Palasiu Presidensiál Responde Kritikas Sosiedade Sivil

Husi kritikas ne'e, Xefi Kaza Sivil Prezidensiál, Fidelis Magalhaes responde katak, desizaun Prezidente ne'e bazeia ba estadu konstitusionál nian Timor-Leste.

"Desizaun ida ne'ebé mak Prezidente Republika foti bazeia ba konsiderasaun ne'ebé aas ba rajoens umanitaria," dehan Xefi Kaza Sivil ne'e, liu husi nia diskursu iha Palasiu Prezidensiál Nicolau Lobato, Bairu-Pite, Dili, horseik.

Nia hatutan, Prezidente Repúblika responde ba povu nia fiar hodi hala'o nia mandatu konstitusionál tuir konstituisaun fó.Tanba ne'e maka desizaun sira ne'ebé mak Prezidente Repúblika foti bazeia rajoens umanitaria forte no Kredibel.

Nia dehan, estadu iha fiar ba justisa ho fundu justisa rua komo politiku ida fali komu oinsa atu fasilita re-integrasaun kada sidadaun bainhira depois re-integra nia pena iha prijaun.

"Prezidente Repúblika TL ne'e PR ida ne'ebé mak bijak katak desizaun hotu ne'ebé mak nia foti bazeia ba kondisaun hotu ne'ebé mak iha no situasaun real kada kazu," hatutan Fidelis.
.

Sem comentários:

Publicar um comentário

Nota: só um membro deste blogue pode publicar um comentário.