segunda-feira, 10 de novembro de 2014

Maun Mari Alkatiri hafoer dala ida tan FRETILIN naran

.

Oan Kiak*

Ita hotu hatene ona katak desizaun duni juis no membru polisia ida hosi ita nia rain, desizaun politiku ida, ba proteije koruptor sira, ba Maun Xanana labele hafoer tan ninia naran iha mundu nia leet.

Ha'u la mai iha ne'e tan bá ha'u hakarak defende malae sira. Ha'u rasik hakarak hare'e Maubere Oan kaer nia destinu rasik,  Maubere Oan konkretiza ninia mehi, Ita nia Ukun Rasik Aan. Maibé ha'u mós hakarak justisa no lia loos ba ita hotu, ita la bele defende hahalok aat hosi ita nia lider sira, ita la bele fo'o razaun ba sira, uainhira sira komete sala no krimi  boot hasoru ita nia demokrasia, hasoru ita nia soberania no hasoru ita nia Estadu Direitu Demokratiku.

Tanbá sá mak Maun Xanana duni malae sira? Nia duni atu proteje ninia belun koruptor sira, ita lalika doutor ka espesialista ba hare'e lolos. Emília Pires atu ba julgamentu segunda-feira no lalais deit sesta-feira sira aprova rezolusaun ida ba hapara kontratu juis malae sira, tanba Prezidente Tribunal Rekursu nian dehan katak rezolusaun sala no la bele tuir, Guilhermino Silva fo'o sai ordem ida ba dehan ba juiz portugues sira bá kontinua hala'o sira nia servisu hanesan baibain. Uainhira Maun Xanana hatene ida ne'e, nia la iha dalan seluk, tenke duni (espulsa) malae hosi ita nia rai. Tauk saida Maun Xanana. Tauk mak juis sira ne'e bele hatama Emília Pires no Vicente Guterres iha komarka nia laran, tanbá juis balun mak koordena prosesu kriminal sira ne'e, no ida atu prezide senhora Emília nia julgamentu.

Sira duni juis sira ba proteije ema koruptor la'os ba proteije Maubere Oan ka nasaun nia soberania ka intrese nasionál. Razaun ida ne'e ke sira fo sai ba publiku, ida ne'e ba haruka rai rahun ba povu nia matan. Objetivu rezolusaun ida de'it, hanehan no sama estadu Timor nia sistema judisiariu, laiha razaun seluk.

FRETILIN dala ida tan hamutuk ho Xanana, la defende povu ka intrese nasional. Maun Mari mesak dala ida tan hafoer ita nia partidu nia naran. Nia la hatene, ka haluha tiha ona tane Maubere nia intrese aas liu ninia intrese privadu. Uainhira nia simu prezente Xanana nian, Maun Mari la hatene katak prezente ZEESM mai ho aimoruk boot, hodi estraga Maun Mari nia kareira politiku, ba hamate FRETILIN.Maun Xanana hatene katak Maun Mari hamrok ba poder, nune'e nia fo kedas aimoruk ZEESM ba kura ninia moras, nune'e mós Maun Mari nonok hela, la halo tan Maun Xanana nia ulun moras.

Hau le'e iha sapo.tl katak nia halo apelo ida ba lider sira hotu hamutuk ba luta kontra atakes hasoru nasaun Timor. Maun Mari diak liu nonok hela no la koalia sala no halo ita nia rain moe liu tan, diak liu nonok, keta hafoer tan Timor nia naran iha mundu nia leet. Imi sempre fo sala ba ema seluk, uluk kedas iha 1975, Timor Oan mak halo sala boot, imi mak oho malu no fo dalan ba indonesio sira tama. Ita seidauk aprende haree ita nia sala rasik, mesmo uainhira ita sala, ita la onestu atu hamrik no dehan ke ita mak sala.
.
Maun Mari haluha tiha ona katak situasaun ne'e hahu tanba Timor uza forsa no duni sidadaun portugues hosi Timor-Leste, Timor-Leste trata ema sira ne'e hanesan sira ema halo krime boot kontra ita nia estadu? Maun Mari haluha tiha ona katak poder politiku halo interfrensia iha poder judisiariu? Maun Mari haluha tiha ona katak ita iha sidadaun barak ke estuda iha Portugal no ita tenke iha relasaun diplomatika ida ke diak tebes. Maun Mari haluha tiha hotu tanba simu prenda ida hosi Maun Xanana, nune'e nia labele ona koalia lia loos...................

Sé mak hakarak atake ita nia rain Maun Mari? Se mak hakarak atake Maubere Oan? Nasaun seluk ka ita nia lider sira  rasik mak loron kalan, tinan-tinan halo atake ba ita nia rain no atake hasoru Maubere Oan, foti rezolusaun tun sae uainhira imi hanoin ema bele hatene ka denunsia imi nia hahalok aat hasoru Timor-Leste no Maubere Oan sira? Tinan-tinan governu ne'e halakon milaun ba milaun dolar, FRETILIN nonok hela tanbá sá lolos?

Tanbá sá Maun Mari la husu unidade ba kombate ema koruptor iha ita nia rain? Tanba sá Maun Mari la hamutuk hó lider seluk hodi investiga ministeriu finansas tanba asesor barak loos iha ministeriu ne'ebá, sira simu osan boot no to'o agora ita hare'e deit mak inkonpetensia no estraga Maubere Oan nia osan. Tanbá sá Maun Mari la husu unidade hosi líder hot-hotu uainhira kazu Bobby Boye mosu? Tanbá sá la husu  investiga liu tan senhora Pires, asesor ne'e servisu ba nia no naok osan barak.

Maun Mari dala ida tan hafoer duni FRETILIN nia naran, diak liu sai tiha hosi sekretario-geral partidu ne'e tanbá la serve ona Maubere Oan nia interese no nasaun nia interese, Maun Mari hatene deit mak serve ninia intrese rasik, haluha tiha FRETILIN nia prinsipiu. FRETILIN tenke duni sai ema oportunista hanesan Maun Mari tan hakarak uza de'it naran boot FRETILIN nian ba hetan benefisiu ba sira nia aan rasik, belun no familia.

Maun Mari dehan katak PN lakon kredibilidade, maibé nia la hare'e nia aan rasik no hamoe de'it ita nia partidu istoriku.

Hamutuk imi bele duni destroi Timor-Leste no hanehan POVU MAUBERE!

VIVA FRETILIN 1975! ABAIXU FRETILIN KORUPTOR 2000!

*Oan Kiak é um veterano timorense. O pai de Oan Kiak e o irmão mais velho  foram barbaramente assassinados pelos indonésios aquando da invasão, ambos faziam parte da Fretilin de 1975.:) Bjs maun Boot!
.

Sem comentários:

Publicar um comentário

Nota: só um membro deste blogue pode publicar um comentário.