quinta-feira, 13 de novembro de 2014

Movimentu estudante no juventude ezije hametin justisa

.
Foto- Facebook
Timor Hau Nian Doben - 13 Outubru 2014

Iha komemorasaun Masakre Santa Cruz ba dala-23 horiseik (12/11), juventude jerasaun foun no estudante universitariu sira iha Dili manifesta ezijensia hodi hametin justisa iha nasaun ne’e. Manifestasan ne’e halao liu husi lori spanduk oin-oin no orasi iha Semiterio nian oin.

Asaun manifestasaun ne’e mosu iha serimonia komemorasaun nian laran no la tama ba programa husi komisaun organizadora. “Ne’e asaun espontaniku, no ami la hatene buat ida. Maibe tanba ninian substansia ne’e importante ba nasaun ne’e iha kontextu aktual, maka ami mos husik hela alin sira ne’e halao asaun ne’e”, dehan responsavel seguransa ida husi Komisaun Organizadora.

Tuir Inocencio ne’ebe nudar estudante UNTL ne’ebe involve iha asaun ne’e informa katak estudante sira maizumenus ema nain 1000 ne’e mai husi universitariu UNTL, UNDIL, UNPAZ, UNITAL, IOB no juventude bairo balu. Nia mos dehan katak, ezijensia sira nian mak Estado tenki firmi hodi hamtin justisa iha nasaun ne’e, se justisa la forte maka jerasaun foun mak sei moris susar.

Ezijensia ba hametin justisa ne’ebe sira ezije mak: (1) Abaixo Pensaun Vitalisia, tanba lei ne’e so garante deit ema balu nian moris – liuliu tan ema sira ne’ebe uluk la mehi ukun a’an ne’e mos agora goza pensaun vitalisia. (2) julga autor krimi kontra umanidade sira, tanba se la julga mak sei haburas deit impunidade, no ema sira uluk komete iha krimi hirak ne’e agora sai deputadu no ministro ne’ebe halo politika ba aumenta dependensia fali ho Indonesia; (3) julga koruptor sira hotu, tanba sira mak naok osan povu, no se la julga sira karik maka aban-bainrua osan minarai maran, nasaun ne’e sei moris kiak.
.

Sem comentários:

Publicar um comentário

Nota: só um membro deste blogue pode publicar um comentário.