quarta-feira, 28 de janeiro de 2015

Angela: Mauk Moruk Sei La Rende Ba Governu Xanana

.

Jornal Independente - 28 Janeiru 2015

Prezidente Konsellu Revolusaun Maubere (KRM), Paulino Gama (Mauk Moruk) lakohi rende ba Governu ne’ebé lidera husi Primeiru Ministru Kay Rala Xanana Gusmão.

Porta-voz KRM, Angela Freitas haktuir deklarasaun, hafoin hetan telefone direita husi Mauk Moruk, tersa horsehik.

Nia dehan, Mauk Moruk lakohi rende, tanba deskonfia Xanana hanesan lider Governu halo manipulasaun barak iha povu ne’ebé buka justisa.

“Maibé importante liu mak ha’u hakarak hato’o ha’u nia konversa ho maun Mauk Moruk iha ohin dader nove (9) oras nia telefone mai ha’u, nia husu de’it para membrus Governo sira, membru paralamentu sira labele utiliza situasaun ne’e atu fó informasaun no deklarasaun sira ne’ebé ke la responsabilidade e buka oinsa para atu bele kria fali situasaun ne’ebé mak ita hotu lakohi,”haktuir Prezidente Partido Trabalhista, iha nia rezidensia, Bairus dos Grilus horsehik (27/01).

Tan ne’e, husi Mauk Moruk nia luta liu husi aktus iha Saelari hodi hatudu nia pozisaun ba povu katak luta kontra koruptu no defende intrese nasional liliu defende riku-soin.

“Nia raik hatete katak nia prontu hasoru Tribunál, maibé nia rezeita total lei ne’ebé mak kopia husi Portugal no Indonezia tanba durante 24 anus nia komanda luta ne’e hasoru se, ida ne’e mak nia pergunta, durante 24 anus ne’e nia luta hasoru se, se ita kontinua nafatin uza lei invazor nian atu mai kondena fali nia (Mauk Moruk) nia la konkorda ho ida ne’e,”hateten Angela.

Tan ne’e, Mauk husu ba povu tempu to’o ona atu disolve Governu no Parlamentu hodi harii Governu unidade nasional liu husi eleisaun antisipada.

Kona ba situasaun pasadu iha ailaran, Angela haktuir, ne’e responsablidade ema hotu nian tanba nasaun Timor-Leste la’os kompaña privadu.

Iha oportunidade ne’e, Angela lamenta tebes ba atuasaun husi forsa sira ne’ebé mak halo operasaun konjunta ho brutalmente hasoru povu kiik sira ne’ebé mak la involve iha violensia.

Nia mós rejeita informasaun ne’ebé sirkula katak ro rua ne’ebé KOK detein atu tula Mauk Moruk sai husi Timor-Leste. Angela konsidera informasaun hanesan maneira ida atu kondena tan Mauk Moruk ho terrorista.

“Ita sira ne’e mesak mate restu deit, ita sira ne’e mesak terus na’in de’it no Maromak ohin loron sei fó nafatin ita nia moris naruk, tanba ne’e dala ida tan ha’u hanoin katak tempu to’o ona ita tenke halibur Timor-oan hotu, atu bele neon ida de’it, laran ida de’it luta ba iha justisa luta ba koruptor sira, harii fali Governo ida ne’ebe boa-governasaun atu bele haree fila fali ba dezenvolvimentu ba futuru oin mai, ita labele lori fali situasaun ida ne’e, labele provoka fali sitausaun ida ne’e hodi rezulta anakismu,”dehan nia.

Entretantu iha sorin seluk, Komandante Komando distrital Baukau Superintedente Xefe Jose Neto Mok via telefona hatete, operasaun konjunta ne’ebe mak halo iha Baukau kontinua la’o hodi fó segrunsa ba povu. 
.
Nune’e, nia husu ba Mauk Moruk atu kopera ho parte seguransa hodi intrega an atu ba justisa, duke iha prosesu operasaun mak halo kapturasaun bele afeita ba ninia estabilidade no nia vida.

Entretantu, kona ba ninia vizita ba iha embaxada Estadu Unidos Amerika foin lalais, Angela dehan ba hanesan ema intelektual no hanesan lideransa partidu ida hodi fó hatene de’it ba nasaun rua ne’e bele marka audiensia hodi bele buka solusaun ba situasan iha rai laran.
.

Sem comentários:

Publicar um comentário

Nota: só um membro deste blogue pode publicar um comentário.