quarta-feira, 11 de março de 2015

ALKATIRI HANESAN HITLER FOUN IHA TIMOR-LESTE

.

Oan Kiak

Ha'u admira tebes ho liafuan Mari Alkatiri nian, nia husu ba estado uza forsa hasoru Mauk Moruk no ninia membru sira tanba 'sira halo atakes iha Baguia'. Maun Mari hakarak uza forsa hasoru Maun Mauk tanba sa? 
.
Maun Mari mos dehan, 'grupu ida uza kilat tiru Polisia, sunu Kareta Estadu, Sunu Uma ne’e hatudu katak aprosimasaun no dialogu la serve ona'. Faktus ne'e loos ka lae? Polisia halo ona investigasaun klean ba kazu Baguia ka imi rona de'it Vicente Guterres ninia istoria? Maun Mari ema politiku ka ema polisia no ajente justisa nian? Ita bot estuda lei iha Moçambique ne'eba los ka lae? Hanesan ema politiku no jerasaun tuan  ita bot tenke fo sai ezemplu ida ke diak ba jerasaun foun no la bele koalia hanesan mau beik ida.

Uainhira pae Mauk Moruk ba julgamentu no ita nia tribunal fo'o sentensa kulpadu ida, entaun Maun Hitler Mari bele bolu nia kriminozu, tanba ema hotu to'o sentensa tranzita julgadu sei inosente, naran prezunsaun inosensia iha ita nia lejislasaun. Mauk Moruk mos sidadaun Timor nian, nia mos iha direitu kona ba prezunsaun inosensia. Universidade iha Moçambique hanorin ka lae ida ne'e ba ita nia Maun Mari? Karik nia okupadu liu hakiak coelho em vez de estuda, nune'e ninia beik sai uainhira nia koalia ba ita nia media.

Maun Mari hakarak uza forsa hasoru pae Mauk, tanba dialogu la serve ona? Dialogu saida mak halo to'o agora? Imi  nia dialogu iha Centro de Convenções iha tinan 2013 laos dialogu, imi halo mak akuzasaun de'it, bolu ema traidor no foti imi nia aan rasik ba leten. Uainhira imi halo 'dialogu' hau iha ne'eba no hau la bolu imi nia asaun dialogu ida. Imi hotu hamutuk ba hatun Pae Mauk Moruk, imi nia dialogu mak gava imi nia aan rasik no habosok istoria Povu Maubere nian.

Maun Mari diak liu rezigna an hosi sekretariu jeral FRETILIN nian tanba dala barak nia hafoer partidu historiku ninia naran, hatun ita nia istoria. Partidu FRETILIN la presiza ema hanesan Alkatiri ba lidera partidu ida ne'e. Maun Mari ema traidor ba partidu FRETILIN, nia haluha tiha ona partidu nia prinsipio no haluha defende Maubere Oan ninia direitu. Karik Nicolau Lobato sei moris, nia rasik kaer kilat hodi hasoru traidor Alkatiri.

Semana balun liu ba ami simu mensajen balun ho notisia kona ba membru Alkatiri nia familia, iha mensajens sira ne'e ema balun konta istoria ke polisia kaer mane ida, Alkatiri nia familia, tanba mane ne'e involve iha problema droga iha Timor-Leste. Ha'u konfesa katak ha'u hakarak publika istoria ne'e iha Timor Hau Nian Doben, maibe ha'u nia Mana Doben ida hirus tebes ha'u no Mana dehan katak mane ne'e laos politiku ka figura publika no to'o tribunal kondena nia, nia ema inosenti, nia bandu ami publika iha blog ne'e. 

Maun Mari diak liu haree ita bot nia uma laran, tanba karik alegasaun droga nian loos duni, entaun Maun Mari tenke hamos ita bot nia uma laran, tanba droga mos kestaun seguransa estadu Timor nian, no polisia tenke kaer duni ema ke koko estraga ita nia nasaun ho droga. Lalika hatudu liman ba ema seluk uainhira Maun Mari ninia familia rasik  polisia  deskonfia involve iha asuntu droga.

Maun Mari diak liu servisu makas ba ita nia rai Oekusi tanba governu investe osan barak ba ita bot nia projetu no to'o agora ita haree mak foto-festa barak, ema hemu tua barak, kee cake, maibe ita sei la hatene saida lolos mak imi halo tan iha Oekusi ne'eba.

Problema Mauk Moruk ho Maun Xanana laos foin mak akontese, imi keta tau imi nia kanuru tohar iha laran no hamanas tan problema ne'e. Forsa laos solusaun, lider sira tenke tur hamutuk hodi rezolve problema ne'e ho ulun malirin no justisa ba ema hotu, justisa mos ba Pae Mauk Moruk.

Tuir ha'u nia hanoin, diak liu polisia investiga saida lolos mak akontese iha Baguia, koalia lae ho Vicente Guterres nia familia no buka sasin ba atake iha Baguia ne'eba. Ita labele rona de'it parte ida, tenke rona ema hotu.

Maun Mari ha'u husu mos ba Maun atu tau matan ba problema droga iha Timor tanba droga mos asuntu seguransa estadu nian no perigozu liu Mauk Moruk, tanba afeta povu barak nia moris nomos sira nia seguransa.

Alkatiri hakarak sai Hitler no uza forsa hasoru Maubere Oan sira, karik diak liu uza forsa iha ninia uma laran, sai Hitler foun ida iha ninia uma laran, iha ita rai doben ita terus barak ona, ita lakohi tan violensia ka uza forsa hasoru ema inosenti, Indonésia uza forsa makas hasoru ita maibe sira la manan. Maun Mari mos la ba manan ho forsa hasoru Maubere Oan sira.

Ha'u fiar katak justisa sei manan, laos ditadura ka ditador sira.
.

Sem comentários:

Publicar um comentário

Nota: só um membro deste blogue pode publicar um comentário.